Íseáia 3 - An Bíobla Naofa 1981 An Bíobla Naofa 1981
Íseáia 3

¹ Sea, féach, tá an Tiarna Dia na Slua, ag dul an uile chrann taca a bhaint de Iarúsailéim agus de Iúdá, (taca aráin agus taca uisce);

² gaiscíoch, ceithearnach, breitheamh agus fáidh, fear feasa, seanóir,

³ ceann feadhna, ceannasaí, comhairleoir, draoi agus ceard.

⁴ “Tabharfaidh mé ógánaigh mar phrionsaí dóibh, agus beidh siad faoi réir ag lucht baoise.”

⁵ Tá na daoine ag déanamh leatroim ar a chéile agus sin idir comharsana; an gasúr ag caitheamh sotail leis an seanduine, agus an daoscar leis an uasal,

⁶ ionas go bhfaighidh gach aon greim ar a dheartháir i dteach a athar: “Tá brat agat, bí i do thaoiseach orainn, agus tóg an fothrach seo de theaghlach idir lámha.”

⁷ Tabharfaidh an fear eile mar fhreagra air, an lá sin: “Ní fear leighis mise, níl arán ná brat i mo theach; ná déanaigí taoiseach díomsa ar an teaghlach.”

⁸ Go deimhin, tá Iarúsailéim ag dul in ainriocht, tá Iúdá ag titim i bhfothracha, óir, a gcaint agus a ngníomhartha i leith an Tiarna, is masla iad ar a ghlóir.

⁹ A sotal féin, is fianaise ina n‑éadan é, déanann siad gaisce as a bpeaca, amhail Sodom. Is trua a gcás, mar rinne siad a gcreachadh féin.

¹⁰ Abraigí: “Is méanar don fhíréan, mar íosfaidh sé toradh a ghníomhartha;

¹¹ Is mairg don ainbheartach, tá an t‑olc anuas air, caithfear leis de réir saothar a lámh.”

¹² A phobal liom, atá faoi ansmacht gasúra agus faoi anfhorlann ag mná. A phobal liom, tá do lucht rialtais ar seachrán agus iad ag milleadh an bhealaigh romhat.

¹³ Tá an Tiarna ag dul suas chuig a chathaoir bhreithiúnais, tá sé ina sheasamh chun a phobal a chiontú.

¹⁴ Tá an Tiarna ag daoradh seanóirí agus prionsaí a phobail. “Is sibhse a chreachann an fíonghort agus a cheileann seilbh an bhochtáin in bhur dtithe.

¹⁵ Cén ceart atá agaibh chun mo phobál a bhascadh, agus aghaidh na mbochtán a bhrú?” Is é sin fáistine Thiarna Dia na Slua.

¹⁶ Dúirt an Tiarna: “De bharr dhíomais iníonacha Shíón, mar go siúlann siad lena gceann suas agus iad ag caitheamh catsúile, mar go dtéann siad de ghearrchoiscéim, ag baint ceoil as a bhfáinní coise,

¹⁷ Fágfaidh an Tiarna a gcloigeann gearbach agus a náire tarnocht.”

¹⁸ Sa lá sin, tabharfaidh an Tiarna chun siúil fáinní múrnáin, corráin, síogairlíní,

¹⁹ bráisléid, caillí, filléid,

²⁰ cóiriú gruaige, slabhairíní coise, criosanna, boscaí cumhráin agus briochtaí,

²¹ fáinní, sróiníní,

²² éadach luachmhar, fallaingeacha, cábaí, sparáin,

²³ scátháin, línéadach mín, turbain agus caillí cloiginn.

²⁴ In ionad an chumhráin, lofacht; in ionad creasa, súgán; in ionad gruaige cóirithe, cloigeann bearrtha, agus mar éide mhaiseach, éadach róin; in áit áilleachta, lorg an iarainn dheirg.

²⁵ Titfidh do chuid fear leis an gclaíomh, agus do ghaiscígh sa choimheascar.

²⁶ Beidh do gheataí ag caoineadh agus ag déanamh mairgní; agus beidh tú i do shuí ar an talamh, tarnocht.