TOBIT 11 - BUKUIT NE TILIIL Sireet ne Dutero Kanon BUKUIT NE TILIIL Sireet ne Dutero Kanon
TOBIT 11

¹ Ye kingo it ole neegit Kaserin, ole itoorchingei ak Nineveh, kole Raphael,

² “Ingen inyee ole ki kibagaktaite kwandang'ung'.

³ Ngeebe kindoen kwondong'ung' si kechop koot yeta kobwonei icheek eng' ooreet.”

⁴ Ye kitese tai kobendi tuwai koleenji `Raphael ineendet, “Inemu ng'wonetap injiryot kochobok.” Ak ki isubi seset icheek eng' let.

⁵ Eng' saisyechooto ko kitebyei ng'wony Annah kogoni ooreet ne kigabun weeriinnyi komang'u koweek.

⁶ Ye kingo keer `Annah weeriinnyi konyone, koleenji kwandanyi, “Keero! Nyoonei weeriing'ung' kobooto chiichooto kigaba tuwai!”

⁷ Kotoom konyoor kwandanyi Tobit, koleenji `Raphael Tobias, “Angen ale yaataksei konyekyik kogeny.

⁸ Iilee konyekyik ng'wonetap kipsegetetyetap njiryot; yaei kerichechuuto ole leel koweek ak koboolgei eng' koonyek, ak keertoi kwandang'ung' kogeny ak kogeer lapkeiyet.”

⁹ Ki labat anyun Annah kwo kotorookta weeriinnyi ak kotorooch ineendet, komwae koleen, “Aasai lakweennyu, nguno anyun ko kaageerin, achoboot alil.” Ak ki riir anyun ineendet.

¹⁰ Ki ng'eet agine Tobit konyo koterteeryanu eng' ole ki imuung'ee eng' kurgeet saang'. Ki wo Tobias kotorooch ineendet,

¹¹ kotinyei ng'wonetap injiryot eng' eunnyi, ki nam anyun komyee ak koguutyi tuguuchooto konyekyik, koleenjin, “Abba, nyiganitu.” Kimwaei ng'aleechuuto koondechi kerichek konyekyik,

¹² ak ki yai niito koonyek kosapcho.

¹³ Ne isubi, ko kiboisyee eunekyik aeng' konemji tuguuchooto leelach eng' tabanwegap konyekyik. Ki inaam kosoita Tobit kogeer weeriinnyi ak koue eunekyik ineendet.

¹⁴ Ki riir ineendet ak koleenji weeriinnyi, “Ageerin inyee, weeriinnyu, lapkeiyetap konyekyuk!” Ki tes kole, “Iberuurot Kamuktaindet, ak iberuurot kainennyi ne toroor, ak iberuurotin malaikaisyekyik tugul che tiliileen. Ingolasunok kainennyi ne tiliil eng' ibinwek tugul.

¹⁵ Nganda ki koityo nyalil, ko kagoboorwa ineendet rireenet. Nguno ageere weeriinnyu Tobias!” Ki wo ko Tobit ko paibai ak kolasu Kamuktaindet eng' tuugeennyi ne po parak. Ki arorchi `Tobias kwandanyi koleenji ko koek sere pandanyi, kole ko koweech robiinichugiche, kole kogotun cheptap Raguel nooto Sarah, ak ki mi ineendet ooreet konyonei ak neegit koit kugetap Nineveh.

¹⁶ Ki wo anyun Tobit ko paibai ak kolasu Kamuktaindet, kwo kotorooch kwondap weeriinnyi eng' kurgeetap Nineveh. Ye kingo keer `piigap Nineveh Tobit konyonei, kowendoti kochaaaktoi ineegei ak koma mi chii ne toreti, ko ki kwong'yo icheek.

¹⁷ Ki mwachi anyun `Tobit icheek tugul agobo ole ki iboorchindo `Kamuktaindet ineendet rireenet ak kotoret kogeerto kogeny. Kingo nyoor `Tobit Sarah kwondap weeriinnyi, koberuur ineendet koleen, “Nyoo ko anyun cheptonyu, ii tagaat. Iberuurot Kamuktaindeng'ung' ne kagomutun inyonjech, cheptonyu. Iberuurot kwandang'ung' ak kamenng'ung', iberuurot weeriinnyu Tobias ak iberuurot inyee, cheptonyu. Nyoo anyun koong'ung', ak ii tagaat kobooto kaberuret ak poiboiyet. Nyoo ko, cheptonyu.” Ara peetuunooto ko ki ek peetuutap poiboiyet ne oo eng' kwenutap Yahudik tugul che ki mi Nineveh.

¹⁸ Ki mi ak icheek Ahikar ak Nadab ne po ooreetap Tobit kopchee tugul poiboiyet. Ki poiboenji igoortap katunisyetap Tobias eng' kasartap peetuusyek tisap, ak ki kigoochi ineendet konunoik che chaang'.