TOBIT 10 - BUKUIT NE TILIIL Sireet ne Dutero Kanon

Kaimetapkei ne po sigiik

¹ Eng' tai, ko ki peetuut age tugul, ko ki iiti Tobit kole tya peetuusyek che kimakyingei Tobias kwo ak koweek. Ak kingo kagobataita peetuusyek ak koma itu weeriinnyi,

² kobwaat ineendet kole, “Tos imuuch ko ki kenam ak kerat ineendet? Anan ki kome Gabael si koma piit chii ne igoochin ineendet robiinik?”

³ Ak ki toi ineendet ko kereer met.

⁴ Ki mwa kwondonyi Annah kole, “Kogowoong'gei lakweennyu ak ma kosabei.” Ak ki toi koriir ak koiimgei agobo weeriinnyi, koleen,

⁵ “Pwo eng' anee, wee lakweennyu! Kilya si achamun iwe inyee ne ii lapkeiyetap konyekyuk?”

⁶ Ago ki testai Tobit koleenji ineendet, “Chebyosennyu, kaigai siisingei amata iimgei, ayani ale mi lakweet komyee. Imuuch ko kobiit kiy ne koraany ineendet eng' olooto. Chiichooto ki pa tuwai ko chii ne kiyani ak ko age eng' tilyennyo. Amata iimgei agobo ineendet, itu inee ko neegit.”

⁷ Kowolji `Annah ineendet koleenji, “Siis inyeendet! Pagaakta, amat ityem ing'aalaa. Kogome lakweennyu.” Ki cham komandoi kochaaktoi peetuut age tugul kole kooro ooreet ne kigabun weeriinnyi, ak ki ma koepchin iit chii age tugul. Kingo rorokto asiista koweek kwo kaa ak koriir kemout komugul, ak ki ma sichei rwondo agot kitigin. Ye kingo keskei peetuusyek tamanu ak ang'wan che po igoortap katunisyet che kiga iyasyo Raguel kole keyai agobo cheptonyi, konyonji `Tobias ineendet ak koleenji, “Iyookto aweektagei, amu angen ale ma koyani kwandanyu ak kamennyu kole ta kogeera kogeny. Asoomin anyun abba ale chamwa awo si amuuch aweekyigei kwandanyu. Kaasip aaroorun agobo ole ki abagaakte ineendet.”

Kotau panda Tobias ak Sarah

⁸ Ago ki leenji `Raguel Tobias, “Lakweennyu, kaigai tebi kobooto; ayooktoi piik koipchi ng'aleek kwandang'ung' Tobit ak pendi icheek si komwachi ineendet agobo inyee.”

⁹ Ago ki le ineendet, “Achicha! Asoomin ale iyookto aweekyigei kwandanyu.”

¹⁰ Ara ki igoochi `Raguel Tobias kwondonyi Sarah, kobooto kebebertap tuguukyik tugul: otwogik che murenik ak che tiibiik, eiik ak keechiirek, sigiroik ak tambeesik, ngoroik, robiinik ak tuguugap ko che korooron.

¹¹ Ki isaiseret icheek, ak konam Raguel koue eunekyik Tobias ak kole, “Lakweennyu, saisere, ui panda ne myee. Ingoberuurin `Kiptaiyatap kipsengwet inyee ak kwondong'ung' Sarah, ak amuuch ageer lagokwok kotom alil.”

¹² Kitorooch cheptonyi Sarah ak koleenji, “Cheptonyu, koonyit kapyugoing'ung' ak korgeng'ung' po yugoi, amu kong'etee nguno ko kergei icheek ak chooto kisichin. Uui eng' kaalyeet, lakweennyu, ak inagas ng'aleek che myach agobo inyee kotee asabe.” Ki igoochi icheek saisere ak kotyakta koba. Ki leenji `Edna Tobias, “Lakweennyu ak ko tupchet ne achame, ingomutwak oweege komyee Kiptaiyatap kipsengwet, ak asap kot ageer lagokwok inyee ak cheptonyu Sarah kotom alil. Eng' taitap Kiptaiyat agoonin cheptonyu, meyachi kiy ne ya ne igoochin koriir eng' peetuusyek tugul che po sabeeng'ung'. Uui eng' kaalyeet, lakweennyu. Kobooch nguno ko aa kamenng'ung' ak Sarah ko kwondong'ung' chamaneet. Ongiberuurogen acheek tugul peetuusyek tugul che po sabeennyo.” Kitorooch icheek tuwai ak kosaiseret koleenji koba komyee.

¹³ Kibeesyo anyun Tobias ak Raguel kotinyei poiboiyet, kolasu Kiptaiyatap kipsengwet ak ng'wony, Laitoryat ne pou tugul, amu ki koyai pandanyin kosulda. Ne po let anyun, ko kimakyi `Tobias Raguel ak kwondonyi Edna kaberuret ak koleenji, “Kagong'ata Kiptaiyat agoonyitok peetuusyekyuk tugul che po sabeennyu.”