TOBIT 12 - BUKUIT NE TILIIL Sireet ne Dutero Kanon

Melekto ne po Raphael

¹ Kingo keskei igoorto ne po katunisyet, koguur `Tobit weeriinnyi Tobias ak koleenji, “Lakweennyu, keer ile kegoochi melekto chiichi ki kobe tuwai, ak itesyi ineendet kosiir.”

² Kowol kole, “Abba, tos che tya che agoochini ineendet? Ma mi kiy ne ya ye agoochi ineendet kebebertap tuguuk che ko ki ibu.

³ Amu ki kondoiywo agoi aweekyingei komyee, ki isap kwondonyu, ki koip robiinik kobooton ak ki kosobin. Tos tya che amuuchi atesyi kosiir?”

⁴ Kole Tobit, “Ee weeriinnyu, nyoljin ineendet konyoor kebebertap tuguuk tugul che ki oibu.”

⁵ Koguur anyun Tobias ak koleenji ineendet, “Ip kebebertap tuguuk tugul che ki kiibu koek melekto, ak amagun panda ne myee.”

⁶ Koguur anyun `Raphael icheek tuwai koba ung'at ak koleenji, “Otoroor Kamuktaindet ak omwaite eng' taitap tugul che saptos agobo tuguuk che myach che ki koyaiywok. Oberuur ak otyenji kalasunet kainennyi. Omwachi piik tugul poisyonik che po Kamuktaindet eng' koonyit ne nyoljin. Amat ong'etye omwaitoi ineendet.

⁷ Myee keriip koma kimwaita ung'ootigap laitoryat, ago omwaite ak ong'aang'de poisyonigap Kamuktaindet, ak eng' koonyit ne nyoljin omwaite agobo ineendet. Oyai ne myee ak eng' nooto koma koi namak yaityet.

⁸ “Myee keyai saaet kobooto karugutetapkei, ago ne kaigai kosiir chooto tuwai ko kagoochinoik kobooto imanit. Kaigai che tutigin kobooto imanit kosiir mogornateet kobooto yaetap yaityo. Kaigai ki koito konunoik kosiir kegonor thahabu.

⁹ Amu kagotoetap konunoik kosaru eng' meet ak ko tiliili tengek age tugul. Poibenjin sabeet tugul che igoitoi konunoik,

¹⁰ ago chooto yaei tengekto ak ko yae nooto ya ko ipchingei ng'emisyet icheegei.

Kong'ang'ugei Raphael

¹¹ “Amwaun imanit tugul ak ma ung'enen kiy. Ka asip amwaun agobo nooto ye ko amwa ale, Myee keriip koma kimwaita ung'ootigap laitoryat, ago ibarte kobooto koonyit poisyonigap Kamuktaindet.

¹² Ye ki osaae inyee ak Sarah, ko ki anee ne ki aibu ak asoman sireetap saaeng'ung' eng' taitap toroornatetap Kiptaiyat, ak ki uu nooto kotugul ye ki ogonori che kagobek.

¹³ Ak kasarato ki ma ieesye iwe ibagaach amitwogiguk che po koskoleny ak iwe igonor ineendet ne kiga kome.

¹⁴ Kiga kiyokwo anyo atyemin. Ak eng' kasarta ne kergei koyokwo Kamuktaindet anyo asaabin ak asoop Sarah kwondap weeriing'ung'.

¹⁵ Aa Raphael, agenge eng' malaikaisyek tisap che tonondos ak ko chobootiin kobendaate taitap liilindap Kiptaiyat.”

¹⁶ Kikwong'io icheek tuwai amu ng'aleechooto, ki keer ng'wony icheek amu ki aragenso.

¹⁷ Ago ki leenji icheek, “Amoyweisye; ingotep kaalyeet kobootok. Otoroor Kamuktaindet koigeny.

¹⁸ Agobo anee, ye ki ami kobooten, ko ki ma ayaei kiy eng' magennyu, ago eng' mageetap Kamuktaindet. Iberuur ineendet peetuut age tugul; tyen agobo kalasunoikyik.

¹⁹ Nganda ki oriibo, koma am ak ma aee kiy, ago nooto ki ogeer ko ng'ang'utyo.

²⁰ Ong'eetyee anyun nguno ak otoroor Kamuktaindet. Ogeero, atogostoi nguno ole mi ineendet ne ki iyookwo. Osir anyun tuguuchooto tugul kogoityok.” Ak ki togosta ineendet.

²¹ Ki tononso anyun icheek, ak mata kogeer ineendet kogeny.

²² Ki testai koberuur Kamuktaindet ak ko tyeni kalasunoikyik, ak ki itoroor Kamuktaindet amu poisyonikyik che kikwong'e, ye kingo kagomong'ji `malaikaiyatap Kamuktaindet icheek.