ПСАЛТЫР 96 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 96

¹ Спявайце Госпаду новую песню, спявай Госпаду, уся зямля.

² Спявайце Госпаду, дабраслаўляйце імя Яго, абвяшчайце з дня ў дзень Яго збаўленне.

³ Абвяшчайце між паганамі хвалу Яго, сярод усіх народаў — цуды Яго.

⁴ Бо вялікі ёсць Госпад, і годны хвалы бязмежнай, варты ўшанавання больш за ўсіх багоў.

⁵ Бо ўсе паганскія багі — марнасць, Госпад жа стварыў нябёсы.

⁶ Велічнасць і прыгажосць перад абліччам Яго, магутнасць і аздоба — у свяцілішчы Яго.

⁷ Прыносьце Госпаду, сем’і народаў, прыносьце Госпаду хвалу і магутнасць,

⁸ Прыносьце Госпаду хвалу імя Яго. Прыносьце ахвяры і ўваходзьце ў дзядзінец Яго.

⁹ Пакланіцеся Госпаду са святой урачыстасцю. Трымці перад абліччам Яго, уся зямля.

¹⁰ Кажыце сярод народаў: Госпад заваладарыў, бо Ён выправіў сусвет, які не пахіснецца; будзе судзіць Ён народы па справядлівасці.

¹¹ Хай весяляцца нябёсы і радуецца зямля, хай шуміць мора і ўсё, што яго запаўняе.

¹² Хай цешацца палі і ўсё, што на іх. Тады ўзрадуюцца ўсе лясныя дрэвы,

¹³ перад абліччам Госпада, бо Ён прыходзіць, бо Ён прыходзіць судзіць зямлю. Будзе Ён судзіць сусвет справядліва і народы паводле Сваёй праўды.