ПСАЛТЫР 95 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Прыходзьце, узрадуемся Госпаду; уславім гучна Бога збаўлення нашага.

² Успрымем загадзя аблічча Яго, у вызнанні і ў псальмах гучна ўславім Яго.

³ Бо вялікі Госпад і вялікі валадар над усімі багамі.

⁴ Бо ў руцэ Яго глыбіні зямныя і вышыні горныя — у Яго.

⁵ Бо ў Яго — мора, і Ён стварыў яго, і сушу яго рукі сфармавалі.

⁶ Прыходзьце, паклонімся, і ўкленчым, схілім калені перад Госпадам, Які стварыў нас,

⁷ бо Ён ёсць Бог наш, мы ж народ пашы Яго і авечкі рукі Яго. О, каб вам сёння

⁸ паслухаць голас Яго: не закамяняйце сэрцаў вашых,

⁹ як у Мэрыбе, як у дзень спакушэння ў Масе ў пустыні, дзе спакушалі Мяне бацькі вашы: выпрабоўвалі Мяне, хоць і бачылі справы Мае.

¹⁰ Сорак гадоў надакучала Мне гэтае пакаленне, і сказаў Я: «Яны — народ аблудных сэрцам. І яны не пазналі шляхоў Маіх;

¹¹ дык пакляўся Я ў гневе Маім; не ўвойдуць яны ў супачынак Мой».