ПСАЛТЫР 97 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Госпад заваладарыў! Хай радуецца зямля, хай весяляцца шматлікія астравы.

² Аблокі і туман — навокал Яго; справядлівасць і закон — гэта падмурак Яго пасаду.

³ Агонь ідзе перад Ім і паліць наўкола Яго непрыяцеляў.

⁴ Маланкі Яго асвятляюць сусвет: бачыць і трымціць зямля.

⁵ Горы, як воск, растапляюцца перад Госпадам, перад Госпадам сусвету.

⁶ Нябёсы вяшчаюць справядлівасць Яго, а ўсе народы бачаць Яго хвалу.

⁷ Хай пасаромяцца ўсе, што пакланяюцца ідалам і што выхваляюцца балванамі сваімі. Пакланіцеся Яму, усе анёлы Яго.

⁸ Чуе гэта і весяліцца Сіён, і радуюцца гарады Юды дзеля прысудаў Тваіх, Госпадзе.

⁹ Бо ты, Госпадзе, праслаўлены на ўвесь свет, надзвычайна ўзвышаешся Ты над усімі багамі.

¹⁰ Любіць Госпад тых, што ненавідзяць ліха; сцеражэ Ён душы святых, — з рукі грэшніка вызваліць іх.

¹¹ Для справядлівага ззяе святло, і для праўдзівых сэрцам — радасць.

¹² Цешцеся, справядлівыя, у Госпадзе, і вызнавайце памяць святасці Яго.