ПСАЛТЫР 139 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 139

¹ Кіраўніку хору. Давідаў. Псальм. Госпадзе, Ты выпрабаваў і ведаеш мяне,

² Ты ведаеш мяне, калі сяджу і калі падымаюся. Ты разумееш думкі мае здалёк,

³ Ты бачыш, калі я хаджу і калі кладуся. І ўсе дарогі мае Ты праглядаеш,

⁴ бо няма яшчэ слова на языку маім — і вось, Госпадзе, Ты пра ўсё ведаеш.

⁵ Абхапляеш Ты мяне ззаду і спераду, і кладзеш на мяне руку Тваю.

⁶ Вельмі дзівосным сталася Тваё веданне адносна мяне, узнёслае, і не спасцігну яго.

⁷ Куды пайду я ад Духа Твайго, і куды ўцяку ад аблічча Твайго?

⁸ Калі пайду ў неба, Ты там; калі спушчуся ў цемру, Ты там прабываеш.

⁹ Хоць бы ўзяў крылы зараніцы, хоць бы апынуўся на ўскрайках мора,

¹⁰ нават там вяла б мяне рука Твая, і трымала б мяне правіца Твая.

¹¹ Калі скажу: «Можа, цемра пакрые мяне і ноч будзе святлом вакол мяне»,

¹² нават цемра не будзе скрытай ад Цябе, і ноч, як дзень, не асвятліцца — як цемра Яго, так і святло Яго.

¹³ Бо Ты сфармаваў мае ныркі, заснаваў Ты мяне ў жываце маці маёй.

¹⁴ Буду вызнаваць Цябе, што так дзівосна створаны я; дзівосныя справы Твае, і душа мая добра ведае [гэта].

¹⁵ Не былі ўхаваныя ад Цябе косці мае, хаця я створаны быў таемна, сфармаваны ў глыбінях зямлі.

¹⁶ Зародак мой бачылі, вочы Твае, і ў кнізе Тваёй былі запісаны ўсе дні: яны былі ўпарадкаваны, ды яшчэ аніводнага з іх не было.

¹⁷ Для мяне ж незвычайна каштоўныя задумы Твае, Божа; надзвычай вялікая колькасць іх.

¹⁸ Калі б пералічыў, дык болей іх, чым пяску, калі б дабраўся да канца, я ўсё яшчэ з Табою.

¹⁹ Хаця б Ты, Божа, знішчыў грэшнікаў; ухіліцеся ад мяне, прагныя крыві.

²⁰ Яны прамаўляюць ліхое супраць Цябе: узносяцца дарэмна супраць Цябе

²¹ Ці ж мне не ўзненавідзець тых, што зненавідзелі Цябе, і ці не адцурацца мне тых, што бунтуюць супраць Цябе?

²² Страшнаю нянавісцю ненавіджу я іх, непрыяцелямі сталі яны для мяне.

²³ Правер мяне, Госпадзе, і ўведай сэрца маё, выпрабуй мяне, пазнай сцежкі мае

²⁴ і пабач, ці ёсць ува мне дарога марнасці, і выведзі мяне дарогай вечнай.