ЁВА 26 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ЁВА 26

¹ І сказаў у адказ Ёў:

² «Як жа выслухаў ты кволага? І [так] ты падтрымліваеш плячо таго, хто нядужы?

³ Якую параду даў ты таму, хто не мае мудрасці? І разважнасць сваю паказаў ты вялікую.

⁴ Каго ты захацеў павучыць? І чый гэта дух, што выходзіць з цябе?

⁵ Вось жа цені дрыжаць пад водамі і тыя, што жывуць разам з імі.

⁶ Пекла аголена перад Ім, і няма ніякай заслоны для Абадону.

⁷ Ён расцягвае поўнач над пусткаю і павесіў зямлю на нічым.

⁸ Ён закрывае воды ў хмарах Сваіх, каб не зліваліся яны адначасна на зямлю.

⁹ Ён закрывае выгляд пасада Свайго, расцягваючы над ім хмару Сваю.

¹⁰ Ён акрэсліў наўкола мяжу водам, аж пакуль скончацца святло і цемра.

¹¹ Слупы нябесныя дрыжаць і баяцца гневу Яго.

¹² Магутнасцю Сваёю Ён прыстрашыў мора і мудрасцю Сваёй перамог Рагаба.

¹³ Дух Яго распагодзіў нябёсы, і рука Яго знішчыла ўцякаючага скарпіёна.

¹⁴ Вось такія межы шляхоў Яго; і, паколькі мы чулі хіба што малую кроплю слоў Яго, то хто змог бы адчуваць грымоты велічы Яго?»