ВЫСЛОЎІ 2 - Біблія (пераклад А.Бокуна) Біблія (пераклад А.Бокуна)
ВЫСЛОЎІ 2

¹ Сыне мой, калі ты прыймеш словы мае і захаваеш у сябе прыказаньні мае,

² прыхіляючы вуха тваё да мудрасьці і схіляючы сэрца тваё да разважлівасьці,

³ калі вось клікаць будзеш розум і голас твой уздымеш, заклікаючы развагу,

⁴ калі шукаць яе будзеш як срэбра, і прагнуць яе будзеш як багацьця,

⁵ тады зразумееш страх перад ГОСПАДАМ і знойдзеш пазнаньне Бога.

⁶ Бо ГОСПАД дае мудрасьць, і з вуснаў Ягоных — веданьне і разуменьне.

⁷ Ён захоўвае цьвярозы розум правым, Ён — шчыт для тых, якія ходзяць беззаганна.

⁸ Ён пільнуе сьцежкі правасудзьдзя, захоўвае шляхі багабойных Сваіх.

⁹ Тады зразумееш праведнасьць, суд і справядлівасьць, і кожны шлях добры,

¹⁰ калі ўвойдзе мудрасьць у сэрца тваё, і веданьне ўсьцешыць душу тваю.

¹¹ Разважлівасьць будзе пільнаваць цябе, і розум будзе захоўваць цябе,

¹² каб выратаваць цябе ад шляху ліхога і ад чалавека, які гаворыць хлусьліва,

¹³ ад тых, якія пакідаюць шлях просты, каб хадзіць сьцежкамі цемры,

¹⁴ якія цешацца, робячы злое, і радуюцца з ліхіх учынкаў,

¹⁵ у якіх шляхі крывыя і якія блукаюцца на сьцежках сваіх,

¹⁶ каб выратаваць цябе ад чужой жанчыны і ад чужаніцы, што гаворыць лісьліва,

¹⁷ якая пакінула сябра маладосьці сваёй і забылася на запавет Бога свайго.

¹⁸ Бо дом яе нахіліўся да сьмерці, і шлях ейны — да мёртвых;

¹⁹ усе, хто да яе ўваходзяць, назад не вяртаюцца і не знаходзяць сьцежак жыцьця.

²⁰ Дык хадзі ж ты шляхам добрых і трымайся сьцежкі праведнікаў,

²¹ бо правыя будуць жыць на зямлі, і беззаганныя застануцца на ёй.

²² А бязбожныя будуць вынішчаны з зямлі, ліхадзеі будуць выкарэнены з яе.