Kasta
149 Biblian jiskʼa tʼaqanakapajja, Luratanakan suma uñnaqtʼapatwa parli
Alajjpachajj Diosan khapak cancañap yatiyi, alajjpachajj amparanacapan luratap khanañchi.
Diosasti take cuntejj lurcän ucanacan sumätapwa uñjäna. Uqhamatwa sojjtïri urojj phokhasïna.
Diosan jan uñjcay yänacapajj jupan luratanacap tokew uñacht'ayasi. Khanpachwa uñacht'ayasi cunapachatejj aca orakejj luratäcäns ucürutpacha jupajj Diosätapa, ch'amapajj jan tucusquiriraquïtapa. Ucatpï jakenacajj jan cunjämats jupat jaltapcaspatejja.
Cunapachatejj juman lurat alajjpach uñatatcta, juman uchat phajjsimpiru, warawaranacampir uñtcta ucapachajj sistwa: “¿Cunarac jakesti, jupat amtasiñamataquisti? ¿cunarac jiwir jakesti ch'am churañamataquisti?”
¡Tatay, luräwinacamajj waljapuniwa! Yatiñ cancañampiw take cuns lurtajja, orakejj luratanacaman phokhantatawa. Lamar kotajj jan tupt'cayawa, jan jact'cay jaquirinacaw utji; jach'anaca, jisc'anaca;
Alajjpach uñtapjjam ucatsti uñatatapjjaraquim: ¿Qhitis take ucanac uscojja? Qhititejj jupanacar mayat mayat jalanokqui ucajj sapakat mayniruw sutitcam jawsaraqui. Wali jach'aw ch'amapajja munañanïñapasa, janiraquiw maynis chhakquiti.
Takpach orakejj Tatitunquiwa, ucan utjirinacas jupanquiwa, takpach jaquirinacas jupancaraquiwa. ¿Qhitirac khapak marcanquir Reyisti? ¡Take atipir Tatituwa! ¡Jupaw khapak marcanquir Reyejja! Jupaw aca orakerojj lamar kotjjar utt'ayi, jupaw jawiranacjjarojj utt'ayaraqui.
“Jumanacajj ucatjja cusisitaw mistunjjapjjäta, marcamarusti sumaquiw cuttawayjjapjjaraquïta. Jumanacar uñjasinsti montenacasa, kollunacasa cusisiñat k'ochupjjani, pampanquiri kokanacasti amparanacapwa t'ajjllisipjjaraquini. Ch'aphi alinac lantisti pinonacaw alipjjaraquini, athapillunac lantisti suma pankaranacaw jilapjjaraquini; ucaw Tatitun sutipjja jach'ar aptani, ucasti wiñayataqui khanañchäwiraquïniwa, janiw t'unjatäcaraquiniti.”
Tatitojj ch'amapampiw aca orake luri, amuyt'apampiraquiw aca oraksa sayt'ayi, ch'iqhi cancañapampiw alajjpachsa uscuraqui. Jach'a arupampisti, alajjpachanjja umanacas warariraquiwa, kenayanacsti aca oraken mä thiyapatwa maqhatayaraqui, jallunsa llijullijunacjja khantayaraquiwa, thaysti imañapatjja apsuniraquiwa.
Alajjpachajj cusispan, orakejj c'uchiraspan, lamar kotan utjirinacas cusisipjjpan; pampanacasa, ucan utjirinacas jallallapjjpan, ch'uminquir kokanacas cusisiñat wararipjjpan,
Tatitusti yatiñampi, ch'iqhi cancañampiwa sayt'ayi alajjpachsa, acapachsa. ucatsti jaya maranacaw jacasïta, cusisitaw sarnakasiraquïta. Jupasti yatiñampiwa lamar kotsa jaljtayi, jallsa kenayata puriyaraqui.
Ucatjja Esdrasajj saraquïnwa: “Jumaquïtawa Tatitojja, uqhamarac janiw yakha Diosajj utjquiti. Jumaraquiw alajjpachsa lurtajja, uqhamarac alajjpachata juc'amp altoncqui ucsa, ucatsti take warawaranacsa; jumaraquiw oraksa lurtajja take cunatejj ucan utjqui ucanacamppachsa, jach'a kotanacsa, uqhamarac cunatejj ucan utjqui take ucanacsa. Jumaw take cunanacarus jacaña churtajja. Ucataracwa alajjpachanquir angelanacas jumar yupaychapjjtamjja.
Takpach chuymajjampiw Tatitur jach'añchä, ¡Tatitojjay, Diosajjay, jach'a ch'amanipunïtawa! C'ajquir khapak cancañampiw isthapistajja, Jumaw uma jalsunacat jawiranac utjaytajja, kollu taypinjam jalañapataqui; uca jawiranacat pampanquir animalanacajj umapjje, ch'uminquir asnonacas umat pharjatajj umt'apjjaraqui. Jawir jac'anacan jamach'inacajj jacasipjje, layminac taypin chhiwekepjjaraqui. Jumaw alajjpachatpach kollunacarojj karpantajja, alajjpach umampiw orakerojj sisantaytajja. Uywanacataquiw koranac jiltaytajja, jaken yapuchat alinac jilayaractajja, oraket mank'añ apsusiñapataqui, ch'amanchir t'ant'a jicjjatañapataqui, chuymapar cusisiyir vino apsusiñapataqui, ajanupar lliphipiyir aceite jicjjatañapataqui. Kokanacajj umat pharjatap apakasipjje, Tatitun ayrut Líbano orakenquir cedro kokanacasti ucat umt'apjjaraqui. Uca kokanacanjja, jisc'a jamach'inacamppachaw tapachasipjje, cigüeña jamach'inacasti ucan jacasipjjaraqui. Karkanacajj cabranacatac uchatawa, mic'ay kollunacasti añathuyanacan imantasiñapawa. Phajjsirojj pachanac jaqhuñapataquiw uchtajja, intejj jalantañap uñt'asiwa. khana isimpiw llawuntastajja. Alajjpacharojj isir uñtat janatattajja.
Jupa tokeracwa Diosajj luri take cunatejj alajjpachansa acapachansa utjqui ucanacjja, jan uñjatäqui ucsa, uñjatäqui ucsa. Take ajayunacan ch'amanïtapsa, munañan apnakerïtapsa, jupa tokew luri, jupataquiraqui.
“Jupanquiw alajjpachas acapachasa. Juparaquiw acapachsa uqhamarac take ucan utjirinacsa lurejja. Jupajj janiw jaken lurat templonacan jacquiti. Janiraquiw uca Diosajj jaken cunanaca jupataqui lurañapsa munquiti. Jupajjay take jiwasanacarojj jacañsa, samañsa, take cunanacsa churchistojja.
¡Tatitojj jach'ar aptatäpan! Tatiturojj alajjpachatpach jach'añchapjjpan, Tatiturojj alajjatpach yupaychapjjpan. animalanaca, uta uywanaca, orakenjam jisqhanaktir animalanaca, thoknaquir jamach'inaca. Tatitur jach'añchapjjam, acapachanquir reyinaca, takpach jilïrinaca, acapach apnakerinaca. Tatitur jach'añchapjjam; chachanaca, warminaca, waynanaca, ch'ama karitanaca, wawanaca. Tatitun sutip jach'ar aptapjjam, sutipaquiw muspharcañajja. Jach'a cancañapajj alajjpachats orakets jilanquiwa. ¡Jupaw marcaparojj ch'amañchi! ¡Jupaw iyawsirinacapar jach'ar aptayirejja, ajllit Israel marcapar jach'añchirejja! ¡Tatitojj jach'añchatäpan! Tatitun angelanacapa, jupar jach'añchapjjam, takpach tamanacapa, Tatitur jach'añchapjjam. Inti, phajjsi, c'ajquir warawaranaca, Tatitur jach'añchapjjam. Alajjpacha, Tatitur jach'añcham, alajjpachanquir umanaca, Tatitur jach'añchapjjam. Tatitun sutip jach'ar aptapjjam, arupamp arsusaquiw take cun utjayäna; jupaw wiñayatac take cun utt'ayäna, jan tucusquir camächit aru ucharaquïna.
¿Cawquincäyätas jumajja cunapachatejj nayajj aca orake utt'aycäyät ucapachajja? ¡Jumatejj chekpacha suma yatsta ucapachajj uca jisct'aru arusjjatita! cunapachatejj putunacaparu imantasipjje, jan ucajj kora taypinacarusa imantasipjje mä cunaru catuntañataquisa, ucapachajja? ¿Qhitis cuervo sat jamach'inacan wawanacaparojj mank'ayejja, cunapachatejj mank'a thakasa aywinakapjje, uqhamaraqui jach'at warart'asisa nayat mank'aña mayipjjaraquitu ucapachajja? ¿Yattati aca oraken kawkch'äñapäcäntejj ucjja? ¿Qhitisa aca orakjja uqhama lurejja? ¿Cunjjaru utt'ayatas cimientonacapajja? ¿Qhitisa jach'a kala uscuraquejja ucjjaru utt'añapataqui, uccañcamasti khanjtaniri warawaranacan k'ochupjjañapcama, uqhamaraqui alajjpacha sirvirinacan cusisiñapcamajja?
Yatiñ cancañamp alajjpach luririru: qhuyapayasiñapajj wiñayawa. Uma patjjar orak jant'act'iriru: qhuyapayasiñapajj wiñayawa. Intimp phajjsimp luririru: qhuyapayasiñapajj wiñayawa. Urun khanañapatac inti uchiriru: qhuyapayasiñapajj wiñayawa. Arum khanañapatac phajjsimpi, warawaranacamp luririru: qhuyapayasiñapajj wiñayawa.
Tatitun luratanacapajj muspharcañawa, luratanacapar munirinacajj sum uñaquipapjje. Jupan luräwipajj c'ajquiriwa, muncañaraquiwa, asqui cancañapajj wiñayawa;
Diosasti horasaparuwa take cunsa suma luri; uqhamaraquiw jupajj jaken chuymaparu amuyt'ayi cunatï wiñayäqui uca, janisay jakejj takpacha amuyt'cpan Diosan luratanacapa, uqhamaraqui cuntï lurcani ucanacata.
Acapach mic'ay kollunacajj amparapanquiwa, kollunacan ch'utunacapas jupanquiwa. Jach'a lamar kotajj jupanquiwa, jupaw lamar kotarojj utjayi, amparapampiw waña orak utjayaraqui.
Nayaw acapachsa uqhamaraqui jakenacsa uscta, alajjpachsa amparajjampiraquiw janatatta, uqhamaraqui take cunanacatejj alajjpachan utjqui ucsa nayaw lurta.
Take cunasa Diosat juti, jupan lurataraquiwa, jupataquiraquiwa. Uqhamajj Diosajj wiñayataqui jach'achatäpan. Uqhamäpan.”
“Tata, nanacan Diosajja, jumajj asquïtawa jach'añchäwi, gloria, uqhamarac munañanïña catokañataquejja. Jumaw take cuns ina ch'usat lurtajja, munañamataracwa take cunas jacascaraqui, juman uscutaraquiwa.”
Diosajj alajjpachjja jan cunjjaruquiwa janatatänjja, acapachsa jan cunjjaruquiwa warct'araquejja. Jupaw umanacjja kenayaru apjjäsiraqui, kenayanacasa janiraquiw uca jathi umampejja phallapquiti;
Nayajj kenaya taypin cürmi uscta, ucasti mä unanchäwina cuna amtäwtejj aca orakempi lurcta ucatjja.
Korajj wañsuwayjjaquiwa, pankaras ancuntawayjjaquiraquiwa; ucampis Diosan arunacapasti wiñayataquipuniw jacaraquini.”
Jupaw alajjpacharojj kenayanacamp phokhanti, oraketac jallu waquichi, ch'umi mankhanacan koranac ch'ojjñaptayi. Jupaw uywanacarojj mank'añ churi, juparaquiw allkamarin chhiwlinacaparojj wararipqui ucapachajj mank'añ churi.
Jan ucajj ¿cunapachacha jumajj c'ajquiri warawaranacarusa, ururusa khanjtaniñapataqui arsuraquïyätajja? ¿Uqhamaraqui khananjja take aca orakpacharu saratatañapa, uqhamat ñankha lurir jakenacajj imantasiñapataqui?
ch'umi mankhanquir animalanacajj nayanquituwa, kollunacajjanquir warank waranka animalanacas nayancaraquituwa. Alajjanquir jamach'inacajj nayan uñt'atawa, pampanacan utjirinacas amparajjanquiwa.
Naya Tatituw sista: ¿Janit jumanacajj nayaru ajjsarapquista? ¿Janit naya nayrakatan qhathatipcta? Nayaw kota thiyjja uscta jach'a kotataquejj korpäcaspas uqhama, uca korpsti janiw jach'a kotajj pasancaspati. Mathapinacapas inamayaquiw ucan sartasqui, khothutisipquiwa, ucampis janiw pasanipcaspati.
Diosan utjäwipajj cunatejj aca orakerojj imjjatqui ucanquiwa, jakenacarusti t'ijut'ijunacäcaspas uqhamwa uñjaraqui. Jupasti alajjpachjja mä carpäcaspas uqhamwa janatati, mä guerran nuwasiñ carpäcaspas uqhamwa janatati.
“¿Cunatsa jumanacajj isinacamat wal llaquisipjjtajja? Uñjapjjam cunjämtï pampan pankaranacajj jilasqui uca, jupanacajj janiw kapupquisa ni cuns lurapcaraquiti. Nayasti sapjjsmawa, janiw rey Salomonas uca pankaranacjamajj sum isthapiscänti take utjirinïtap laycusa.
Nayranacajjampiw kollunac uñatatta: “¿cawquitarac yanapast nayatac jutani?” sasa. Yanapajj Tatitut nayatac jutani, alajjpach acapach lurir Tatituta.
Iyawsäwi laycuraquiw yattan Diosajj arupampi acapach luratapa, cuntejj jichhajj uñjtan ucajj jan uñjcayat luratätapa.
Cunapachatï Diosajj alajjpacha lurqui jach'a kota patjjaru ucqhajja, nayajj qhayancascäyätwa. Nayajj qhayancascaraquïyätwa, cunapachatï Tatitojj alajjpachana kenaya utjaycäna, uqhamarac kota mankhenquiri uma jalsunacsa utjaycäna ucqhasa, uqhamarac ucancascäyäta cunapachatï kotan umanacaparusa, jupajj siscäna jan waña orakeru pasantañapataqui, uqhamarac aca orake utt'aycäna ucqhasa,
¿Qhitis jach'a lamar kotjja amparapampi tupt'ejja; jan ucajj luc'anapampi alajjpachan kawkch'ätapsa tupt'ejja? ¿Qhitiraquis mä sapa tupuru take aca oraken lak'anacapsa apthapejja? ¿Jan ucajj take kollunacsa mä balanzar apjjatasin waytejja?
take luratanacam apnakañapataquiw catuytajja, take cun uñjañapataquiw catjjaruyaractajja: ovej tamanaca, vacanaca, ch'uminquir animalanaca, alajj chek thoknaker jamach'inaca, lamar kotanquir chawllanaca, lamar kotan take utjirinaca.
Ucampis Diosajj jupanacarojj yatiyänwa jupan jacatapa, jakenacar asqui luratap toke. Jupajjay jallsa, suma cosechanacsa churchistojja, uqhamarac walja mank'añanacsa jiwasanacan cusisiñasataqui —sasa.
Take montenquir animalanacajj jach'añchapjjetaniwa, kollu anunacasa, avestruz jach'a jamach'inacasa, wasaran uma jalsuyatajj laycu, jan achuri k'ara orakenacansa jawiranac jist'aratajjata, uqhamat ajllit marcajjar uma churañataqui. Cawquïr marctejj nayajj uywasta nayan sutejja yupaychañapataqui.
Tatay, munasiñamajj alajjpachcamaw puri, asqui cancañamasti alajjpachcamaw jict'asi, chekapar uñjañ cancañamajj jach'a kollunacjamawa, arsutanacamasti jach'a lamar umanacjamawa. Tatay, jumaw jakenacarusa, animalanacarus uñjasctajja.
Tatitun arsutaparjamaw jach'a thayajj sartäna, thayasti jach'a mathapinac sartayäna: lakaru amstaru, mankhäjjar jaknakataw uñjasipjjäna, liwnakcäwejj aynacht'atäjjapjjänwa, machatanacjamaw aytilipjjäna, yatitanacapajj janiw cunataquïcänsa. T'akhesiñancasinsti Tatitut art'asipjjäna, jupasti t'akhesïwit waysüna. Jach'a thayarojj llamp'u thayaruquiw tucuyäna, lamar kota mathapinacasti llamp'uchataw uñjasïna.
Muspharcañ khapak cancañamat jupanacarojj yatiyasini, nayasti muspharcañ luratanacamat parlaraquï.
Tatitojj jach'a ch'aman Diosawa, c'ari diosanacat sipan munañaniwa. Acapach mic'ay kollunacajj amparapanquiwa, kollunacan ch'utunacapas jupanquiwa.
Diosasti saraquïnwa: “Alajjpachanjja khananacajj utjpan, urumpi arumampi yakhachañataqui, uca khanasti tiemponaca, urunaca, maranaca señälañataquiraquïpan. Uqhamaraqui alajjpachat aca oraker khananiñapataquiraqui” sasa. Ucatsti uqhampuniw lurasïna.
Uywanacataquiw koranac jiltaytajja, jaken yapuchat alinac jilayaractajja, oraket mank'añ apsusiñapataqui, ch'amanchir t'ant'a jicjjatañapataqui, chuymapar cusisiyir vino apsusiñapataqui, ajanupar lliphipiyir aceite jicjjatañapataqui.
Tatitun sutip jach'ar aptapjjam, sutipaquiw muspharcañajja. Jach'a cancañapajj alajjpachats orakets jilanquiwa.
Lamar kotamp ucan utjirinacampejj khothutipjjpan, acapachasa, ucan jaquirinacas ojjtapjjaracpan; jawiranacajj amparanacap t'ajjllirasipjjpan; kollunacajj mayachasisin cusisiñamp art'asipjjpan,
Nayaw jawir umanaca sartayä wasara kollunacana, vallenacansti uma jalsunacracwa utjayaraquï; wasara orakenacasti wali umani orakenacaruw tucuyaraquï, waña orakenacatsti umwa jalsuyaraquï. Wasaransti cedro kokanaca ayruntä, acacianaca, arrayanes, uqhamaraqui olivos kokanaca; waña orakensti pinonaca, abetonaca, cipreses sata kokanacwa jilayaraquï, ¿Qhitis uca inti jalsu tokenquir reyirojj utt'ayejja, qhititejj take chekansa atipiripuni mistqui ucarojja? ¿Qhitis juparojj take marcanac catuyi, uca reyinacarus jisc'achjaraquejja, ucat espadapampi, arcopampi uca reyinacar tucjañapataqui, ucatsti t'unar uñtata liwtañapataquejja? uqhamat takenis uñjapjjañapataqui, yatipjjañapataquiraqui, wal ist'apjjañapataqui, amuyt'apjjañapataquiraqui, naya, Tatitun, take acanacjja ch'amajjampi luratajja, naya, Israelan Kollan Diosapa, take ucanacjja uscutajja.”
“Uñtapjjam, nayajj mä machak alajjpachampi mä machak orakempi uscü. Cunatejj utjcän ucajj armatäjjaniwa, janiraquiw qhitis mayampsa jupanacatjja amtascjjaniti. Wiñayataqui cusisiñampi c'uchirt'asiñampi phokhantasipjjam, cuntejj nayajj usccä ucanacata, nayasti mä cusiscañ Jerusalén lurt'araquï, ucan jaquir jakenacasti c'uchiquïpjjaraquiniwa.
‘Tata, jumaw jach'a ch'amamampi alajjpachsa, acapachsa lurtajja. Janiw jumataquejj cunas jan lurasirjamajj utjquiti.
Jupaw arunacap oraker apayani, arunacapasti janc'aquiw yatiyasi. Jupaw qhunurojj t'awrar uñtat apayani, arum sullanacarusti khellar uñtat willtaraqui. Jupaw chhullunqhayarojj chhijchhir uñtat apayani; umanacasti thayampiw chhullunqhayar tucu. Jupajj mä aruc arsu, ucampiquiw chulluraraqui; thayampiw phust'ayi, umasti jaltiwa.
nayajj qhayancascäyätwa Tatitun thiyapana suma phokhasa. Nayawa sapüru jupar cusisiyäyäta, sapa horasansa jupan nayrakatapan anatasiraquïyäta; aca orake lurcäna ucanwa anatasïyäta, ¡nayajj cusisïyätwa jakenac uñjasina!
Khanampina, ch'amacampina korpapsti jach'a kota tucuyaruwa uscuraqui. Cunapachatejj Diosajj ajjsarcaña arunaca arsuni ucapachasti alajjpacha apjjäsir kollunacasa qhathatipjjewa. Ch'amapampiwa jach'a kotjja apnake, Rahab sat jach'a animalarusa ch'amapampiwa atipji. Samanapampi phust'asaquiw kenayanacsa chhaktayi, amparapampiwa jaltiri catarirusa jiwjayaraqui. Ucasti jach'a luräwipatjja mä juc'aquiwa, cuntejj ist'ctan ucasti jisc'a arunacaquiwa, ucampisa ¿qhitisa jach'a ch'amampi arsutapjja amuyt'aspa?”
Ucapachaw kamakempi ovejampejj suman jacasipjjani, tigrempi, cabritompisti mayaquiw samart'apjjaraquini, vaca kallumpi leonampisti jac'apuran jilasipjjaraquini, mä jisc'a yokall wawaraquiw jupanacarojj awatini. Vacampi, osampisti wali suman utjasipjjani, Kallunacapasti juntoquiraquiw samarasipjjani, leonasti mä vacjamaw pasto mank'araquini. Wawasti cobra sat catarin putupanwa anatasini, asirunacan tapaparus amparapjja lokantaraquiniwa. Nayan kollan kollojjansti janiw qhiti cuna ñankha luriris utjcaniti, cunjämatejj umajj k'al phokhantejja uqhamaraquiw Tatitun yatiñapajj take marcpacharu phokhantani.
Uqhamatwa jumanacajj alajjpachanquir Awquiman wawanacapäpjjätajja. Jupasti takenitaquiw intsa jalsuyani, uqhamarac asqui jakenacataquisa, jan asqui jakenacataquisa jallsa puriyaniraqui.
Jupanacasti uc ist'asinjja, takenis mayaquiw Diosar oracionan mayipjje: “Tata, jumätaw take cunatejj utjqui ucanac lurir Diosajja. Jumaw alajjpachsa, acapachsa, jach'a kotsa lurtajja.
Wali suyt'añampiwa take acapachajj suyt'asqui cunürutejj Diosajj khespiyat jakenaca uñstaycani uca. Ajayun jacañanjja, Cristo Jesús tokew nayarojj juchan munañaparjam sarnakañatjja khespiyitu, uqhamarac jiwañatsa. Acapachasti juchañchatawa, ucasti janiwa jupan sapa munañap laycuti, jan ucasti Diosaw uqhamäñapataqui waquichawayatayna. Ucampis uca suyt'añajj utjapunïnwa, aca orakejj librëjjañapataqui tucusiña esclavöñata, Diosan wawanacapan khespiyat jacäwipana.
Karkanacajj cabranacatac uchatawa, mic'ay kollunacasti añathuyanacan imantasiñapawa. Phajjsirojj pachanac jaqhuñapataquiw uchtajja, intejj jalantañap uñt'asiwa. khana isimpiw llawuntastajja. Alajjpacharojj isir uñtat janatattajja. Ch'amacanac uchtajja, ch'amac arum purinipansti, ch'uminquir animalanacajj misturanipjjewa; leonanacajj mank'atjam wararipjje, Diosat mank'a mayisipjje. Inti jalsunipansti imantasjjapjjewa, utjäwinacaparuw iquintjjapjje;
Jumaw nayarojj irnokasista, taycajjan puracapan utjayasista. Jumaruw yuspagarsma, muspharcañpun nayataquejj lurtajja, ¡ucsti sumpun yatista! Janchejjan jiltatapajj juman uñjatänwa, jan qhitin uñjcat irnokatäcäyät ucchañcama, orak mankhan utjayatäcäyät ucchañcama.
“Job, jumajj paciencia uscum, ucatsti ist'araquim. Diosan muspharcaña luräwinacap amuyt'araquim. Jumajj yattati ¿cunjämsa Diosajj take ucanacjja luri, cunjämsa llijullijunacas kenayan khantaraqui ucjja? ¿Yattati jumajj cunjämsa kenayanacajj alajjpachan sarnakapjje, ucatsti Diosan asqui luräwipätapjja?
Jumar khespiyir Tatitumajj, acwa arsu, qhititejj jumaru janïra nascta uqhatpach usctam ucajja: “Nayätwa take cun luriri Tatitojja, nayaw alajjpacha janatatta aca oraksa sayt'ayaracta jan qhitin yanapapampi.
Orak tucuyan jaquirinacajj muspharcañ luräwinacamat qhathatipjje, inti jalsu toketa, inti jalanta tokecamajj, jumïpan cusisiñat art'asiñajj utji.
Samanapampi phust'asaquiw kenayanacsa chhaktayi, amparapampiwa jaltiri catarirusa jiwjayaraqui.
Takenin nayranacapaw jumarojj uñch'uquisipctam, jumaw waquisitarjam mank'añ jupanacar churtajja. Jumaw amparam lokatattajja, take jaquirinacarusti asquinac jilarquir churtajja.
Mä jawiraw Diosan marcaparojj cusisiyi, Alajjpachanquirin kollan marcaparu. Diosajj marcap taypinquiwa, jupaw imascani; Diosaw khanjtatpach marcaparojj yanapascani.
Kollan chekawjapjja, alajjpachjam utachäna, orakerjamaw wiñayatac thuriñchat sayt'ayaraquïna.
¡Aca orakpachanquir take jakenacajj jupan nayrakatapan qhatatipjjpan! Tatituwa aca orakjja sum sayt'ayi jan onjjtañapataqui. ¡Alajjpachasa, aca orakesa cusisipjjpan! Marcanacanjja arsutäpan: ‘¡Tatituw reyejj!’ sasa. ¡Kotajj mathapinacapa sartaypan, cunanacapatejj utjqui ucanacamppacha! ¡Cusisipjjpan pampanacasa uqhamarac cunatejj utjqui ucanacamppacha! ¡Ch'uminacanquir kokanacasa cusisiñata k'ochupjjpan, Tatitun nayrakatapana, jupasti oraker apnakeriw juti! “Tatitur yuspagarapjjam, jupasti sumawa, munasiñapasa wiñayataquiwa.
Dios Tatitu, qhititejj alajjpachsa lurqui, janatatcaraqui, oraksa lurcaraqui, uqhamaraqui ucan achurinacarusa, jacañsa jakenacarus churcaraqui, sirviriparusti saraqui:
Ucatsti uñjaractwa machak alajjpachampi, machak orakempi. Nayrïri alajjpachampi orakempejj tucusjjataynawa, janiraquiw kotas utjcjjänti. Uca unañchäwinsti cuntejj Ajayojj uñjayquitu ucansti, angelajj mä jach'a kollur irpsusinwa uñacht'ayitu Diosan nayrakatapata sarakasinquiri machak Jerusalenaru. Uca marcasti Diosan khanapampiwa khanäna, mä suma kalan khanapjama, jaspe kalar uñtata, cristalar uñtataraqui. Uca marcasti mä jach'a alto perkamp muyuntatänwa, ucansti tunca payani puncuraquiw utjäna, mä angelaraquiw sapa puncuncäna. Uca puncunacansti Israel marcan tunca payani tribunacapan sutiparaquiw kellkatäna. Quimsa puncuw jalsu tokenjja utjäna, alajj tokenjja quimsaraqui, aynachanjja quimsaraqui, inti jalanta tokensti quimsaraqui. Uca marcan perkanacapasti tunca payani jach'a kalanacat cimientonïnwa, Corderon tunca payani apostolonacapan sutinacapampi kellkata. Nayampi parlcän uca angelasti mä kori vara ayt'atänwa uca marca tupt'añataqui, puncunacapa, perkanacapsa. Ucsarusa acsarusa uca marcajj quipcaquïnwa. Angelasti uca kori varapampiw uca marcjja tupt'äna, ucatsti pä waranka pä patacani kilometrönwa. Anchorusa, altorusa, largorusa quipcaquïnwa. Ucatsti perkracwa tupt'äna, uca perkasti sojjta tunca pusini metroraquïnwa, acapach tupurjamaraquiw angelajj tupt'ascänjja. Uca perkasti suma jaspe kalat luratänwa, marcasti koricamaquiraquïnwa mä k'oma vidrior uñtata. Uca tunca payani cimiento jach'a kalanacasti cunayman casta yakha kalanacampi c'achachatänwa. Nayrïrejja jaspempi, payïristi zafirompi, quimsïristi agatampi, pusïristi esmeraldampi. Ucatsti kollan marca uñjta, machak Jerusalén. Uca marcasti Diosan nayrakatapatwa sarakasincäna, mä casarasir tawakor uñtata suma isthapt'ataraqui casarasir waynar catokañatacjama.
Jumaw uma jalsunacat jawiranac utjaytajja, kollu taypinjam jalañapataqui; uca jawiranacat pampanquir animalanacajj umapjje, ch'uminquir asnonacas umat pharjatajj umt'apjjaraqui. Jawir jac'anacan jamach'inacajj jacasipjje, layminac taypin chhiwekepjjaraqui.
Chekpachansa mostazajja take jathanacat sipansa sinti jisc'awa, ucampis cunapachatejj alsuni ucatsti jiltasinjja, pankar yapun take kokanacat sipansa, jach'a kokaw tucu. Jach'a kokätap laycusti jamach'inacas tapanacwa ucan lurasiraqui” sasa.
¡Tatay, uywirejjay, sutimajj takpach oraken muspharcayawa! ¡Khapak cancañamajj alajjpachat juc'amp qhuricamawa! Timasirinacaman utjatap laycojj ñuñusquir wawanacan jach'añchatapampiw ch'amam uñacht'aytajja, timasirinacampir kallasirinacampir t'unjañataqui.
Diosan cheka cancañapar jan iyawsasina, cunatejj c'arïqui ucar jaysapjjatap laycu. Ucatsti cuntejj Diosajj lurcatayna ucanacaruquiw yupaychapjje Diosar yupaychañat sipansa. Chekpachansa Diosaquiw wiñayataqui yupaychatäñapajja. Uqhamäpan.
Jakenacarusa, uywanacarus mank'añ chuririru: qhuyapayasiñapajj wiñayawa. Alajjpachanquir Diosar yuspagarapjjam, qhuyapayasiñapajj wiñayawa.
Intejj jalsuniwa, jalantjjaraquiwa, janc'aquiw cawqhanccäntejj ucqharu cutt'jjaraqui ¡wastata jalsuniñataqui! Thayajj aynach tokeruw thayt'ani, ucatsti amsta tokeruw muyjtaraqui. ¡Thayajj muytas muytasaw sari! ¡Thayajj muytaniwa, ucatsti wastata muyjtascaquiwa! Take jawiranacaw jach'a lamar kotarcama sarapjje, ucampis lamar kotajj janipuniw phokharquiti; jawiranacasti kallta sartäwiparuwa cutt'ani, wastatampi uca pachpa jawiranac jalañataqui.
Tatitun arupajj lamar kotan ist'asi, khapak cancañan Diosajj khojjokeyiwa; Tatitojj jach'a lamar kotjjan ist'asiyi. Tatitun arupajj wali ch'amaniwa, Tatitun arupajj muspharcayawa.
Tatitusti siwa: “Alajjpachajj nayan konuñajjawa, orakesti cayunacajjan tact'asiñaparaquiwa. ¿Cawquirurac mä uta utacharapipjjetasma? ¿Cawquirurac samart'añataqui lurarapipjjetasma? “Jerusalenampi chica cusisipjjam, qhitinacatejj Jerusalenar munapjjta ucanacasti jupampi cusisipjjam; qhitinacatejj Jerusalenatjama jachapjjayäta ucanacasti jichhajj jupampi chicaraqui cusisipjjam; jupasti mä taycjamaraquiw jumanacarojj chuymachañampi uywapjjätam, uca chuymachasiñampi phokt'atäpjjañamcama. Ucatpï naya Tatitojj sistjja: “Nayaw jupjjarojj sumancañjja mä jawirar uñtata jutayä. Marcanacan kamir cancañanacapasti, mä jach'a jawirjamaraquiw jupjjarojj jutani. Jupaw jumanacarojj mank'ayapjjaraquïtam, amparaparuw ichusipjjätam, konkorinacapjjar kont'ayasaraquiw munart'asipjjätam. Cunjämatejj mä taycajj wawaparojj chuymachejja, uqhamaraquiw nayajj jumanacarojj chuymachapjjäma, Jerusalenansti chuymachasiña jicjjatapjjaraquïta.” Cunapachatejj jumanacajj acanac uñjapjjäta ucapachajj chuymanacamajj cusisiniwa; janchinacamasti mä korar uñtataraquiw ch'ich'tanini. Tatitusti sirvirinacap taypinjja ch'amapwa uñacht'ayani, uñisirinacap taypinsti colerasiñapa uñacht'ayaraquini. Tatitusti nina taypinjam purini, carronacapasti mä tutuca thayar uñtataraquiwa; colerasiñapasti ninjamaw purinini, mutuyäwipasti akquir ninjamaraquiw naqhani. Jïsa, Tatitojj ninampiw taripäwi lurani, take acapacharusti espadapampiraquiw uñjani, waljaniruraquiw jiwarayaraquini. Tatitusti siwa: “Qhitinacatejj pankar yapunacan yakha diosanacar yupaychañataqui catuyasipjjta, chica taypi saririr arcasa, qhitinacatejj qhuchi aycha mank'apjjta, achacun aychapsa jan ucajj yakha k'añu animalanacan aychapsa, ucanacajj mäpita tucjatäpjjätawa, nayasti luratanacamsa, uñt'aractwa yatiractwa uca laycu. “Ucapachasti naya quipcaw jutaraquï take jach'a marcanacaru, jisc'a marcanacaru tantacht'añataqui, jupanacasti jutasinjja c'ajquir cancañajja uñjapjjaraquini. Nayajj mä chimpu churä: yakhepanacarusti jaltayaraquïwa, marcanacaruw qhitaraquï, Tarsis, Libia, Lidia, ucanacaru cawqhantejj flecha sum apnakañ yatipqui uca marcaru, Tubal, uqhamaraqui Grecia, kota tokenquir jaya marcanacar cuna, uca marcanacasti janipuniw nayjjat parlirjja ist'apjjerïcänti, janiraquiw nayan jach'a cancañajjsa uñjapjjerïcänti; jupanacaraquiw nayan jach'a cancañajjat marcanacar yatiyapjjani. ¡Take acanacjja nayaw amparajjampi lurta, uqhamatwa utjañjja kalltapjjaraqui! Naya Tatituw ucjja arsta. “Cawquïr jaktejj nayajj uñtascta ucajj qhititejj pobre, llact'ata sarnakqui, arunacajjsa suma ist'caraqui, phokcaraqui ucawa.
¡Tatay, luräwinacamajj waljapuniwa! Yatiñ cancañampiw take cuns lurtajja, orakejj luratanacaman phokhantatawa.
Diosaw jawiranacarojj wasarar tucuyi, uma jalsunacsti waña orakeruw quipstayi. Purum orakenac kollpa oraker tucuyi, jakenacapan ñankha lurirïpjjatap laycu.
Jupanacajj janiw amuyt'asiñ munapquiti, alajjpachajj nayratpacha utjascatapapuni, uqhamarac aca orakes Dios quipcana umat apsutätapa, umïpanracwa jichhas utjasqui.
Cuntejj Diosajj lurqui ucajj asquiraquiwa, take ucanacsti catokañasawa Diosar yuspagarasina, Diosan arupampi, oración luratanacampiw ucarojj k'omachi.
Tatay, alajjpach jist'aranim, sarakaniraquim, kollunacar llamct'am, ucanacasti jiwk'e mistuyapjjani, khejjokhejjorojj antutnucunim, ucanacarusti chhuqhutatayam, mich'inacamamp tucjam.
Take cunsa Tatituw luri mä amtäwimpi; uqhamarac ñankha jakerusa t'akhesiña urutaqui.
¡jupajj muspharcäña jach'a luräwinacwa luraraqui, uca luräwinacapsti janiraquiw qhitis amuyt'caspati!
Ucatsti angelajj jacañ churiri mä suma k'oma jawir uñacht'ayaraquitu. Uca umasti suma ch'uwänwa vidrior uñtata, Diosampina Corderompina tronopataracwa mistunïna. Saraquituwa: “Cuna arunacatejj Diosa toket aca libron kellkatäquis ucjja jan imjjäsimti, horasasti purinjjewa phokhasiñapataqui. Uccañcamasti jan wali jakejja jan walinac lurascacpan, k'añusa k'añunac lurascacpan, ucampis Dios chuyma jakejj asquinac lurascacpan, take chuyma arcascacpan” sasa. “Nayasti janc'aquiw jutä. Sapa maynitaquiraquiw churäwi apanï luratanacaparjama churañataqui. Nayätwa kalltasa tucuyasa, nayrasa khepasa, A, Z letranacjama.” “Cusisiñanïpjjewa qhitinacatejj isinacapa t'ajjsusipjje jacañ kokat mank'asiñataqui, uqhamarac marcar puncu chek mantañataquisa. Ucampis ankaruw kheparapjjani jan wali sarnakerinacasa laykasirinacasa, wachoka juchan sarnakerinacasa, jake jiwayirinacasa, yakha diosanacar yupaychirinacasa, uqhamarac take sallkjirinacasa. “Naya, Jesusawa, angelajja qhitta iglesianacar aca arunaca yatiyaniñapataqui. Nayätwa Davidat nayrasa, jupat sarakerisa, nayajj khantati warawararaquïtwa.” Kollan Ajayumpi Corderon esposapampisti siwa: “Jutam”. Ist'irïqui ucasti saracpan “Jutam” sasa. Qhititejj umat pharjayasqui, ucat um muncaraqui ucajj jutpan, jacañ umat inac umt'aracpan. Take qhitinacatejj aca libron kellkatäquis uca Diosan arupa ist'irinacarojj nayajj sistwa: Qhititejj aca libron kellkatäquis uca arunacar yapjjatanejja, Diosajj juparojj cuna mutuyäwittï parlqui ucjja yapt'araquiniwa. Qhititejj apakani aca libron kellkatäquis uca Diosan arunacapatjja, Diosajj juparojj jacañ librot apsuraquiniwa, uqhamarac marcapatsa. Ucanacasti aca libron kellkatawa. Uca marcan jach'a callepansti purap jawira uñcatasinjja mä kokaw jilaraquïna. Uca kokasti jacañ churiri kokänwa, tunca payani cutiraquiw maranjja achüna. Sapa phajjsiwa achüna, laphinacapasti marcanacan kollasiñapataquiw willirtaraquïna.
Tatitur jach'añchapjjam, acapachanquir reyinaca, takpach jilïrinaca, acapach apnakerinaca. Tatitur jach'añchapjjam; chachanaca, warminaca, waynanaca, ch'ama karitanaca, wawanaca. Tatitun sutip jach'ar aptapjjam, sutipaquiw muspharcañajja. Jach'a cancañapajj alajjpachats orakets jilanquiwa.
Sión kolluna llact'atanacarojj khella lanti mä corona churañataqui, jachañ lantsti suma k'apquir cusisiñ kollanaca, chuyma cawcst'ata sarnakaña lantsti, yupaychañ k'ochunaca. ‘Atipt'iri roble kokanaca’ sasaw sutichapjjaraquïtam, pachpa Tatitun ayrutanaca c'ajquir cancañapa uñacht'ayañataqui.
Takpach luratanacapa, Tatitur jach'añchapjjam, jupan apnakat orakpachan jach'ar aptapjjam. ¡Takpach chuymajjampiw Tatitur jach'añchä!
Tatay, jumaw chuymajj uñantista, nayar uñt'araquista: ch'eka amparamajj ucan jicjjatitaspa, cupi amparamasti janiw antutquitaspati. Ch'amacamp imjjatayasiñtejj amtirista, jan ucajj, khana urun ch'amac arumar tucuñaptejj muniristjja, ch'amacajj janiw jumat imantquitaspati, arum ch'amacajj urut sipan juc'ampiw khantaspa. ¡Ch'amacas urus jumataquejj pachpaquiwa! Jumaw nayarojj irnokasista, taycajjan puracapan utjayasista. Jumaruw yuspagarsma, muspharcañpun nayataquejj lurtajja, ¡ucsti sumpun yatista! Janchejjan jiltatapajj juman uñjatänwa, jan qhitin uñjcat irnokatäcäyät ucchañcama, orak mankhan utjayatäcäyät ucchañcama. Nayranacamajj lurat janchejj uñjäna; ucanacasti takpachaw kellkatamar kellkantasïna. Jacañ urunacajjajj suma jaqhutänwa, nayrïr uru janïr purinquipana. Diosajjay, juman amtatanacamajj jan amuycayawa, ucanacajj jan tucusquiriwa. Ucanactejj jact'añ muniristjja, ch'allat sipan juc'ampïspawa; jaqhuñ tucuyirist ucasa, jumamp chicaquïsquiristwa. Diosajjay, ñankha luririnacarojj tucusiyamaya, jake jiwayirinacarusti nayat jithektayam, jumaw kont'atajjsa, sartatajjsa yattajja, lup'itanacajjarojj jayatpach amuytajja. jumjjat jan wal parlir jakenacat jithektayita, juma contra sayt'ir jakenacat jarc'aketa. Tatay, ¿janit jumar uñisirinacar uñisirïctjja? ¿Janit jumar kallasirinacar jisc'achirïctjja? Jan t'acurcay uñisiñampiw jupanacar uñista, uñisirejjat jupanacarojj uñt'ta. Diosay, uñaquipitaya, chuymajjar uñantam, nayarojj yant'itaya, lup'itanacajj uñt'araquim, nayatejj ñankha thaquin sarnakerïstjja, cheka thaquinjamay irpasita. Jumaw sarnakatajjsa, samart'atajjsa yattajja, takpach sarnakäwinacajjajj juman uñt'atawa.
Waynäcasina jumar irnoker Diosamat amtasim, janïra ch'ama tucuña urunacajj, uqhamarac maranacasa purinquipana cunapachatejj siscasma: “Sarnakäwejjanjja janiw cunas cusisiyquituti” sasa.
Amuyapjjaraquim, jumanacan Tatitu Diosamanquiw alajjpachasa, alajjpachan alajjpachapasa, uqhamaraqui acapachan orakenacasa, take cunatï ucan utjqui ucanacasa.
Kamakempi, ovejampisti mayaquiw mank'apjjani, leonasti vacar uñtataraquiw pasto mank'ani, cataristi lak'a jallk'araquini. Nayan kollan kollojjansti janiraquiw qhiti ñankha luriris utjcaniti.” Tatituw uqhamjja arsu.
¡Jupaw marcaparojj ch'amañchi! ¡Jupaw iyawsirinacapar jach'ar aptayirejja, ajllit Israel marcapar jach'añchirejja! ¡Tatitojj jach'añchatäpan!
Janiw amuythapisipcaractasa, ni sapcaractasa: Tatitu Diosasarojj ajjsartañäni, horasaparuw khepa, nayra jallsa apayanistu, uqhamaraqui cosecha apthapiñ horasas apayaniraquistu.
Nayranacamajj lurat janchejj uñjäna; ucanacasti takpachaw kellkatamar kellkantasïna. Jacañ urunacajjajj suma jaqhutänwa, nayrïr uru janïr purinquipana. Diosajjay, juman amtatanacamajj jan amuycayawa, ucanacajj jan tucusquiriwa.
orakpacharuw yatiyatapajj ist'asi, orak tucuscamaw arupajj puri, cawqharutejj intejj jalantqui ucacamaw puriraqui. Intisti jakechasir waynjamaw utapat mistuni: jaläwin atipt'asir jakjamaw thaquip jali.
Jichhajj waliquiwa, amuyasctwa cunjämtejj jiwasanacajj acapachan t'akhesisctan ucjja, janiw mayachcsnati Diosan jach'a cancañapa uñjcañäni ucampejja. Wali suyt'añampiwa take acapachajj suyt'asqui cunürutejj Diosajj khespiyat jakenaca uñstaycani uca.
Wasarajj cusispan, waña orakes uqhamaraqui, cusisiñampi phokt'aspan, pankararacpan, Sión marcarusti cusiscañ k'ochunac k'ocht'asisaw mantapjjani, cusisitapuniw jacapjjani. Cusisiñampi, sumancañapwa jicjjatapjjani, jachañasa, t'akhesiñasa ucanjja tucusjjaniwa. lirio pankarjam pankarpan, cusisiñampisti phokt'asiracpan. Diosajj juparojj Líbano kollur uñtatwa wali suma tucuyani, wali suma achuri orakeraqui Carmelo jan ucajj Sarón sisqui uca kollunacjama. Takeniw Tatitun c'ajquir jach'a cancañapa uñjapjjani, Diosan jach'a cancañapa.
Lamar kotajj jan tupt'cayawa, jan jact'cay jaquirinacaw utji; jach'anaca, jisc'anaca; lamar kot chicaw barconacajj tuyupjje, Leviatán jach'a animalas ucanquiwa, lamar kotamp anatasiñapataquiw lurtajja.
Ucatpï naya Tatitojj sistjja: “Nayaw jupjjarojj sumancañjja mä jawirar uñtata jutayä. Marcanacan kamir cancañanacapasti, mä jach'a jawirjamaraquiw jupjjarojj jutani. Jupaw jumanacarojj mank'ayapjjaraquïtam, amparaparuw ichusipjjätam, konkorinacapjjar kont'ayasaraquiw munart'asipjjätam. Cunjämatejj mä taycajj wawaparojj chuymachejja, uqhamaraquiw nayajj jumanacarojj chuymachapjjäma, Jerusalenansti chuymachasiña jicjjatapjjaraquïta.”
“¿Jumati leonanacan catuntatäñataquejj cuna animalanacsa thaktajja, uqhamat uca leonanacan wawanacapajj sist'asiñcama mank'apjjañapataquejja, ¿Cawquincäyätas jumajja cunapachatejj nayajj aca orake utt'aycäyät ucapachajja? ¡Jumatejj chekpacha suma yatsta ucapachajj uca jisct'aru arusjjatita! cunapachatejj putunacaparu imantasipjje, jan ucajj kora taypinacarusa imantasipjje mä cunaru catuntañataquisa, ucapachajja? ¿Qhitis cuervo sat jamach'inacan wawanacaparojj mank'ayejja, cunapachatejj mank'a thakasa aywinakapjje, uqhamaraqui jach'at warart'asisa nayat mank'aña mayipjjaraquitu ucapachajja?
Tatitut mä mayisiñajjaquiw utji, ucaquirac thakä: jacañ urunacajjan utapan utjasiña; utapan jupar yupaychañataqui, khapak cancañap uñjasin cusisiñataqui.
Acanacajj jutir mita jakenacatac kellkatäpan, machakat utt'ayat marcan Tatitur jach'añchañapataqui. Tatitojj kollan utjäwipatpach uñtanïna, orakerojj kollan alajjpachatpach uñtanïna, Janiquiy llaqui urun nayatac maysa uñtamti. Naya tokeruy jinchum alcatanim; art'asinsma ucapachajj ist'aquitaya. catuntatanacan aykotanacap ist'añataqui, jiwañatac juchañchatanacar khespiyañataqui: Tatitun sutipat Sión marcan yatiyañataqui, aytat cancañapat Jerusalenan parlañataqui; jakenacajj take marcanacat mayachasipcan ucapacha, reyinacasti Tatitur yupaychañatac tantachasipcan ucapacha.
Khespiyir Diosajjay, muspharcañ asqui cancañampiw jaysapjjestajja; take orakpachaw jumarojj alcatapjjtam, jayanquir kotas alcataractamwa; jumïpan kollunacajj pachpaquïsqui, juman ch'amam laycuw thurt'atäsipqui. Jumaw lamar kot mathapinacarojj t'acuraytajja, jumaw marcanacan ch'ajjwatap amuct'aytajja.
Alajjpachas acapachas jumanquiwa, jumaw acapach lurtajja, takpach oraken utjirinacs luraractajja. Jumaw amsta toksa, aynach toksa lurtajja, Tabor kollump Hermón kollumpejj cusisitaw sutim jach'añchapjje.
Saraquiwa: “Jumaw Tata, kalltanjja aca orakjja usctajja, amparamampiraquiw alajjpachanacjj lurtajja.
Wasar orakerojj uma sayt'anacaruw tucuyi, waña orakerojj uma jalsunacaruw quipstayi. Ucaruw mank'at awtjatanacarojj uchi, jupanacasti marcanacap sayt'ayapjje. Yapunac yapuchapjje, achur kokanac ayruntapjje, achunac jilarquir apthapipjjaraqui. Tatituw asquip churi, juc'amp jiljjatayi, uywanacap mirantayaraqui.
“¿Jumajj uñjtati cawqharutejj qhunsa, chholloksa imcta ucanacjja, take ucanacjja jan walt'añ urunacana nuwasiña guerra tiemponacana apayaniñataqui?
Ch'amacanac uchtajja, ch'amac arum purinipansti, ch'uminquir animalanacajj misturanipjjewa; leonanacajj mank'atjam wararipjje, Diosat mank'a mayisipjje. Inti jalsunipansti imantasjjapjjewa, utjäwinacaparuw iquintjjapjje; jakesti luräwiparuw mistu, jayp'ucamaw yapupan irnake.
Oraken saphiparojj sumpun thurt'asiytajja, utt'ayatäcän ucawjat janipun onjjtañapataqui.
Jupaw umanacjja kenayaru apjjäsiraqui, kenayanacasa janiraquiw uca jathi umampejja phallapquiti;
Takpach orakejj Tatitur ajjsartpan, acapachan jaquirinacajj jupar wakaychapjjpan. Jupajj arupampiquiw take cun utjayi; arsutapampiquiw take cun luraraqui.
Ucatsti mä juramento luraraquïna, qhititejj wiñayataqui jacqui, qhitiraquitï alajjpachsa, acapachsa, kotsa, take cunsa lurqui ucan sutipjjaru: “Janiw jichhajj juc'ampi suyascjjaniti.
Take acapachanquir jakenaca, Tatitur cusisit k'ochupjjam, Diosay, jumaw yant'arojj puriyapjjesta, kollkerjamaw k'omachsupjjesta, sipitaruw jalantayapjjesta, jach'a llaquinacampiw apjjatapjjesta: qhitimpis taquisiyapjjaquistawa; nina cheka, uma chekaw maqhatapjjta, ucampis khepa tokeruw samart'ayapjjesta. Loktäwinac apt'ataw utamar mantä, nayrakataman churäwinac naqhayarapïma, uqhamat jumar arsutanac phokhä, chijincasin jumar arscäyäsma, uca arsutanac phokhä. Liq'i uywanac altaramjjar loktäma, orko ovejanac loktanïma, toronacampi, cabranacamp jumar loktañatac jiwayarapïma. Diosar arquirinaca, ist'ir jutapjjam, nayatac luratanacap yatiyapjjäma: juparuw lacajjajj art'asi, lajjrajjasti juparuw jach'añchi. Jan wali amuyutejj utjitasapänjja, Tatitojj janiw ist'quitasapänti; Diosasti ist'ituwa, achict'asiñamp mayisitajjarojj jaysituwa. kollan sutipar k'ochupjjam, aytat cancañapar k'ochunac k'ochupjjam;
“¿Janit pä jamach'is juc'a kollker aljasquejja? Ucampis janiw maynisa aca orakerojj liwektquiti jan Diosan munañapatjja. Felipe, Bartolomé, Tomás, Mateo impuesto cobriri; Jacobo Alfeon yokapa; Tadeo, yakha sutipasti Lebeo sataraqui; Ucampis jumanacatjja take ñic'utanacamasa mayat mayat suma jact'atawa. Uqhamasti jan ajjsarapjjamti, jumanacajj uca jisc'a jamach'inacat sipanjja wali jila alanïpjjtawa.
Tatay, jumasti alajjpachanjja, ch'aman mathapinacat juc'amp ch'amanïtawa, lamar kotanacan ojjenacapat jila ch'amanïtawa.
¿Uca yakha diosanac taypinsti utjit mayni jallu puriyirejja? ¿Alajjpachanacasti jupapachaquiti jalljja puriyani? ¡Janiwa, nanacan Dios Tatitojja!. Jumaw jalljja apayantajja, jumaw take ucanacjja lurtajja; ¡ucatwa jumaruqui suyt'apjjsmajja!
Tatitojj jach'apuniwa, jach'ar aptatäñapajj waquisiwa, jach'a cancañapajj jan amuyt'cayawa.
Jumaw alajjpachatpach kollunacarojj karpantajja, alajjpach umampiw orakerojj sisantaytajja.
Ist'apjjam: asqui jakenacan utanacapanjja, atipjäwi k'ochunacaw jayllisi: ¡Tatitun ch'aman amparapaw atipjayi! Tatitun amparapajj jan atipjcayawa, ¡Tatitun ch'aman amparapaw atipjayi!