Kasta
147 Llakitäpki ukanakatakix Biblian jiskʼa tʼaqanakapawa
Tatitojj llaquimp aynacht'atanacan jac'apancasquiwa, jupanacar khespiyañataqui, aynacht'at chuymanacap waytañataqui.
“Samarañwa jaytapjjsma. Nayan samarañajjwa churapjjsma, ucampis janiw nayajj samarañjj churcti cunjämtejj acapachajj churqui uqhama. Jan llaquisipjjamti ni ajjsarapjjaraquimsa.
Ajjsarcay lajja ch'amac chekawja sarcasasa, janiw cunarus ajjsarcäti, nayamp chic saratam laycu: lawamasa, thujrumasa, ch'am churitani.
Jan ajjsaramti, nayaw jumampïscta, jan ajjsaramti, nayäsctwa juman Diosamajja. Nayaw ch'amañchascäma, nayaraquiw yanapascäma, atipjiri amparajjampiraquiw uywascäma.
Jilatanaca, janiw munapcti cunatejj jiwatanacampi pasqui ucjja jan yatipjjañamjja, jan jumanacajj mayninacjama llaquisipjjañamataqui jan cuna suyt'añanjama. Cunjämtejj Jesusan jiwatapar jactatapar iyawsapjjtanjja; uca pachparaquiw iyawsaractan, qhitinacatejj jupar iyawsasa jiwapjje ucanacarojj Dios Awquejj Jesusampi chica jactayani.
Jichhajj waliquiwa, amuyasctwa cunjämtejj jiwasanacajj acapachan t'akhesisctan ucjja, janiw mayachcsnati Diosan jach'a cancañapa uñjcañäni ucampejja.
Yupaychañäni Jesucristo Tatitusan Dios Awquiparu. Jupaw jiwasar qhuyapayasir Awquisajja, uqhamarac chuymachirisasa. Take t'akhesiñanacasanwa Diosajj chuymachistu, jiwasajj t'akhesirinacar chuymachañasataqui, cunjämtï Diosajj jiwasar chuymachquistu uqhama.
k'apisiñapajj mä juc'ataquiquiwa, munasiñapasti wiñayataquiwa; jayp'u tokerutejj jachañajj puristanejja, willjta tokerojj cusisiñaw utj- jjestani.
Tatitun munasiñapasti, qhuyapayasiñapasa jan tucusquiriraquiwa. Sapärmanthiw machakar tucuraqui, ¡cunja jach'as Tatitun chekapätapajja!
Jan jumanacajj cunats llaquisipjjamti, take cunsa Diosar sapjjam oracionana, mayipjjam yuspagarapjjaraquim. Diosajj jumanacarojj churapjjaraquïtamwa samarañapa, ucasti take cuntejj jakejj amuyt'caspas ucat juc'amp jach'awa. Uca samarañasti jumanacan chuymanacamsa, amuyunacamsa imaniwa Cristomp mayaquïpjjatam laycu.
Umanjam maqhatañamächejja, nayaw jumampïscäjja, jawiranac maqhatañamächejja, janiw jalantasin jiwcätati; ninanjam pasañamächejja, janiw naqhantcätati, ninas janiw jumanjja naccaniti.
Diosar llaquinacam catuyam, jupasti ch'aman tucuyätam, Diosar jaysirin aynacht'añapjja, janipuniw jupajj muncaniti.
“Jan jumanacajj llaquisipjjamti. Iyawsapjjam Diosaru, nayarus iyawsapjjaraquita. ¿Janit iyawsapcta nayajj Awquincatajja, Awquisti nayancatapa? Cunanactejj sapjjsma ucjja, janiw naya pachpatacti sapcsma, nayan jacqui uca Awquiwa luräwinacap lurasqui. Nayajj Awquinctwa, Awquisti nayampiraquiwa ucjja iyawsapjjeta, jan ucajj luratanacajj uñjasinacsa iyawsapjjeta. Khanacwa sapjjsma, qhititejj nayar iyawsquitu ucajja, luraraquiniwa cuntejj nayajj lurctjja ucanaca, juc'amp jach'a luräwinacampwa lurani, Awquejjajj cawquincquitejj ucaru saratajj laycu. Take cuntejj jumanacajj sutejjaru mayipjjäta ucjja, nayajj luräwa, Yokajj Awquin jach'a cancañap uñacht'ayañapataqui. Cuntejj nayan sutejjaru mayipjjäta ucjja, nayajj take cunsa luräwa. “Jumanacatejj munapjjchistajja, camachinacajj phokhapjjam. Nayajj Awquirojj achict'äwa jumanacaru yakha Chuymachiri qhitaniñapataqui, jupasti jumanacampejj wiñayataquïniwa. Ucajj cheka Ajayuwa, acapachanquirinacasti janiw jupar catokcaspati, jan uñjatapa ni uñt'atapa laycu, ucampis jumanacajj uñt'jjapjjtawa, jupasti jumanacampïsquiwa, ucatsti jumanacanwa jacani wiñayataqui. “Janiw wajcha jaytapcämäti, nayajj cutt'anïwa jumanacampïscañataqui. Mä juc'ampitjja jakenacajj janiw juc'ampi uñjcjjapjjetaniti, ucampis jumanacajj uñjasipquitätawa, jumanacajj jacapjjätawa nayan jacascatajj laycu. Awquejjan utapanjja walja utjäwinacaw jacañatac utji, jan uqhamäcaspa ucajja, nayajj niyaw jumanacaru sapjjeriscasamäna. Uqhamajj mä utjäwi jumanacatac waquichiriw sarä. Ucüruwa jumanacajj Awquincatajja yatipjjäta, jumanacasti nayancatajjaraqui, nayasti jumanacampïtajjaraqui. Qhititejj camachinacajj yatquejja, uqhamarac phokcaraqui ucajja, uñacht'ayiwa chekpach nayar munatapa. Awquejjasti munasiraquiniwa qhititejj nayar munasquitu ucarojja, nayasti juparojj munasiraquïwa, ucatsti uñacht'ayasiraquïwa.” Judasajj (aca Judasajj janiw Iscariote ucäquiti) Jesusarojj sänwa: —Tata, ¿cunatsa nanacarojj uñacht'ayasipjjetäta, acapachanquir jakenacarusti janirac uñacht'ayascätati? —sasa. Jesusasti saraquïnwa: —Qhititejj munasquitu ucajja, cuntejj nayajj siscta ucwa luri; Awquejjasti munasiniwa, Awquejjampi nayampejj jupamp jakeriw jutapjjä. Qhititejj jan munquitu ucajja, cuntejj nayajj sisctjja ucjja janiw lurquiti. Aca arunac ist'apcta ucajja janiw nayan arunacajjäquiti, jan ucasti qhitanquitu uca Awquejjan arunacapawa. “Acanacjja sapjjsmawa jumanacampïcasina. Awquejjaw nayan sutejjaru Kollan Ajayu qhitanini, jumanacar yanapañapataqui, uqhamarac chuymachañapataqui. Jupaw jumanacar take cuns yatichapjjätam, amtayapjjaraquïtamwa cuntejj nayajj jumanacaru sapjjsma ucanaca. “Samarañwa jaytapjjsma. Nayan samarañajjwa churapjjsma, ucampis janiw nayajj samarañjj churcti cunjämtejj acapachajj churqui uqhama. Jan llaquisipjjamti ni ajjsarapjjaraquimsa. Jumanacajj ist'apjjestawa: ‘Sarjjäwa, ucatsti wasitampiw jutä jumanacampïñataqui’ siri. Chekpachantejj munasipjjetasmajja: ‘Awquin ucaruw sarascta’ uc siri ist'asinjja cusisipjjasamänwa, jupajj nayatsa juc'ampïtap laycu. Acjja sapjjsmawa janïr ucajj pasquipana, cunapachatejj acanacajj lurascani ucqhajj iyawsapjjañamataqui. Sarasinsti ucat mä utjäw waquichasinjja, wasitampiw jutä jumanacaru irpasjjañataqui, cawqhanccätï nayajj jumanacajj ucqhancapjjañamataquiraqui.
Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.
Diosaw imantasiñasajja, ch'amañchirisasa, jupaw chijinacan arjjatirisajja. “Amuct'jjapjjam, nayan Diosätajj uñt'apjjam: Nayajj marcanacat juc'ampïtwa, oraket juc'ampiraquïtwa.” ¡Nuwasir taman Tatitupajj jiwasanacampïsquiwa! ¡Arjjatirisajj Jacobon Diosapawa! Uca laycuw jan ajjsarapcañäniti, orakes qhathatiscpan, kollunacas lamar kotar tincuntascpan,
“Tatitun ajayupajj nayjjanquiwa, Tatituraquiw nayarojj yakhachasitu; pobrenacaru suma yatiyäwinac yatiyiriw qhitanitu, llact'atanacaru chuymachañataqui, preso catuntatanacaru khespiyat sarnakasiñ yatiyiri, carcelanquirinacarusti khespiyat sarnakasiñ chuririraqui, “¡Tatituncjjasinjja cunjsa cusistjja! Diosajjancatajjatsti cusisiñan phokt'atätwa nayar khespiyatap laycu, atipjañsa churatap laycuraqui. Cunjämatejj mä casarasir waynajj coronap uchasejj uqhamätwa, jan ucajj cunjämatejj mä casarasir tawakojj c'achacht'asejj uqhamätwa. Cunjämatejj oraketjja alinacajj sartanejja, mä pankar yapun ayrunacajj ch'ichtanejja, uqhamracwa Tatitojj atipjañapjja sartayani, take marcanacasti yupaychaña k'ochunac k'ochupjjani.” Tatitun suma amtäwip mara yatiyiri, cawquïri uruntejj jiwasan Diosasajj uñisirinacasata phoksuscani ucqha. Take llact'atanacar chuymachiriw qhitanitu, Sión kolluna llact'atanacarojj khella lanti mä corona churañataqui, jachañ lantsti suma k'apquir cusisiñ kollanaca, chuyma cawcst'ata sarnakaña lantsti, yupaychañ k'ochunaca. ‘Atipt'iri roble kokanaca’ sasaw sutichapjjaraquïtam, pachpa Tatitun ayrutanaca c'ajquir cancañapa uñacht'ayañataqui.
Janirac kollkerus munapjjamti; cunatejj utjapjjtam ucampejj cusisitaquïpjjam, Diosajj siwa: “Janiw cunapachas jaytcämati ni armt'ascämasa” sasa.
Chuymajjasa, janchejjas tucusisquiwa, ucampis Diosaw wiñay catokäwejjajja, jupaw chuymajjarojj catjjäsisqui.
Diosajj take jachanacapwa nayranacapatjja picharani, janiraquiw jiwañas, jachañas utjcjjaniti, warariñasa ni usuyasiñasa. Take cunanacatï nayrajj utjcän ucanacajj tucusjjewa” sasa.
Cusisipjjaraquim qhitinacatejj cusisitäqui ucanacampejja, jachapjjaraquim jachirinacampejja.
Nayasti jacañ oraken Tatitump cusisiñataquiw suyt'ascta. Tatitur takpach chuymamp iyawsam, ch'amañchasim, jan ajjsaramti, ¡Tatitur takpach chuymamp iyawsam!
Tatitojj wiñayataquiw jiwañarojj t'unjani, take jakenacana nayranacapatsti jachanacapsa pichararaquiniwa, marcapan aynacht'atapsti take aca orakpachatjja chhaktayjjaraquiniwa. Tatituw uqham arsu.
Jiwa, ¿cawquincaraqui atipjir ch'amamasti? ¿Cawquincaraqui mich'imasti?” sasa. Jiwan mich'ipajj juchawa, nayra leyiraquiw jucharojj uca ch'amjja churaraqui. Ucampis yuspagaratäpan Diosajja, jupaw Jesucristo toke atipjayistu.
Ucjjarojj Jesusajj sänwa: —Nayätwa jactañasa, jacañasa. Qhititejj nayaru iyawsaraquitu ucajja jiwatäcanisa, jacaniwa. Take qhititejj jacqui, nayaru iyawscaraquitu ucanacajj, janiw jiwcaniti cunapachasa. ¿Iyawstati ucjja? —sasa.
Jichhajj take cunas jayphucjamaqui mä espejotjam uñjasctanjja, ucampis mä urojj take cuns khanwa uñj-jjañäni. Jichhajj yatiñajjajj janiw phokhatpachäquiti, ucampis uca uruw takpach uñt'jjäjja cunjämtï Diosajj nayar uñt'quitu uqhama.
Dios sapanac ajayojjajj samarañ jicjjati, khespiyasiñajjajj jupat juti. Ch'ajjwañanacarojj jan wayusipjjamti; janirac lunthatasiñar chuym catuyasipjjamti; kamiris tucusipcätajja, kollker jan alcatapjjamti. Diosan arsutap ist'ta, jupan arsut arup yatta: “Diosajj ch'amaniwa, ch'amasa, munasiñas jupanquiwa, jupaw sapa maynirojj lurataparjam wajjt'i” sasa. Jupaquiw khespiyitu, arjjataraquitu. Janiw pächascäti, jupaw imantasiñajjajja.
Uqhamajj jichhajj yattwa, janiwa cunas Diosan munasiñapatjja apakquistaspati, janiw jiwañasa, ni jacañasa, ni angelanacasa, ni alajjpach ch'amanacasa, ni jichhasa, ni jutcani ucasa, ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu.
Nayaw Sión marcarojj wal qhuyapayä, jupasti k'ala tucjatapunïnwa. Wasaranquir waña orakenacsti mä pankar yapuruw tucuyä, cunjämtejj Tatitojj Edén huerto usccänjja uqhama. Ucanwa cusisiñas, c'uchiquïñas utjani, uqhamaraqui Tatitur yupaychaña k'ochunacasa, suma k'ochunacasa.
Yupaychañäni Diosaru, Jesucristo Tatitun Awquiparu, jupasti jach'a qhuyapayasiñap laycuwa jiwasarojj machakat naciyistu, Jesucriston jiwatanac taypit jactatap toke. Ucasti jiwasanacarojj suyt'añanwa jacayaraquistu, uqhamaraquiw jumanacarojj cuntï Diosajj imarapquistus uca herencia alajjpachanjja catokayapjjätam, ucajj janiw tucjatäcaspati, ni k'añuchatäcaspasa, janiraquiw mä pankarjamas wañscaspati.
Nayajj suma nuwasïwjja nuwastwa, tucuyäwcamaw jalaracta, iyawsañsti janiraquiw chhakaycti. Jichhajj suma coronaw suyasquitu, qhä urunwa chekapar uñjir Tatitojj churitani, cawquïritejj chekap taripirïqui ucajja. Janiw naya saparuquiti churquitani, jan ucasti take qhitinacatejj munasiñampi Tatitun jutañap suyt'asipqui ucanacarojj churaraquiniwa.
Cawquintejj munasiñajj utjqui ucanjja janiw utjquiti ajjsarañajja. Ucat sipana chekpach munasiñanejja ajjsarañjja apanucuwa; ajjsarañasti mutuña catokañataquiwa. Maynitejj ajjsarascchi ucajja, janiw chekpach munasiñanïquiti.
Uca pachparaquiw jumanacajj jichhajj llaquisipjjta; ucampis nayajj wasitampiw cutt'anis uñjapjjäma, ucqhawa jumanacajj wal chuymanacaman cusisipjjäta, uca cusisiñsti janiw qhitis apakapcätamti.
Tatituruw nayajj art'asta, jupasti take llaquinacat irpsutu; jupar uñtapjjam, jumanacasti cusisipjjätawa, ajanunacamajj janiw p'enk tucupcaniti.
Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.
Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.
Alajjpachanquir Take atipirin imat sarnaker jakejja, Chijejj janiw jac'achascätamti, usus janiraquiw utamar purincaniti, Diosajj angelanacaparuw qhitanini, sarnakäwim imañataqui. Amparapjjaruw apapjjätam, cayuman kalar jan lanctasiñapataqui; catarinacarusa, asïrunacarus takjjatascaquïtawa, leonanac taypinsa, ajjsarcañ animalanac taypinsa, sarnakascaquïtawa. “Nayar munasitap laycusti, juparojj khespiyäwa, nayar uñt'atap laycusti, juparojj imaraquïwa. Nayar art'asitan ucapachajja, mayisitaparojj jaysäwa. Jupamp chicaw t'akhesiñancä, llaquisiñat irpsü, jach'aruw aptä; walja maranacaw jacayä, ¡khespiyäwejjampiw jupar cusisiyaraquï!” Tatiturojj siwa: “Jumätaw imantasiñajjajja, jarc'akasiñajjasa, Diosajjay, jumaruw takpach chuymamp alcatsma” sasa.
Uqhamaraquiw jiwatanacat jactañampejj lurasejja. Mä ñusantiri janchi imanttanjja, ucatsti jan juc'amp jiwiriwa sartanjjejja. Mä jan yäkat janchwa imantatajja, ucatsti mä muncaña cuerpowa jactanjjejja. Mä pisi ch'ama janchwa imantatajja, ucatsti wali ch'amani cuerpow jactanjjejja. Mä lak'a janchiwa imantatajja, ucatsti ajayun cuerpowa jactanjjejja. Lak'a janchi utjchi ucajja, utjaraquiw ajayun cuerpojja.
Janiw ucanjja qhitis ñankhachatäcjjaniti. Diosampina Corderompina tronopaquiw uca marcancani, sirvirinacapasti ucanwa yupaychapjjaraquini. Ajanuy ajanuwa uñcatapjjani, paranacaparusti sutipwa apapjjaraquini. Ucanjja janiw arumajj utjcjjaniti, ucan jaquirinacasti janiw lamparinsa, intin khanapasa munascjjaniti, Dios Tatituquiwa khanani, jupanacasti wiñayaraquiw ucanjja reinapjjani.
Asqui jakenacajj jiwarawayjjapjjewa, janiraquiw qhitis llact'asquiti; suma jakenacasti chhaktawayjjapjjaraquiwa, janiraquiw qhitis ucjja amuyquiti, jupanacan ñankhata khespitäjjapjjatapjja, Ucatak sarasasti wal kariractajja, ucampis janiw amuyasctati take ucanacajj inamayaquïtapa. Ch'amamasti utjaraquïyätamwa, ucatwa jan karcaraquïyatati. “¿Qhitiraqui uca diosanacasti, cawquïrinacarutejj jumajj ajjsarcayäta, jach'añchcaraquïyäta nayar apanucusa, uqhamat nayat k'ala armt'asiñamataquisti? Cunapachatejj jumajj nayaru jan jach'añchquïyästa ucqhajja, nayajj amuquïscayätwa, jan amuyiriquiw tucuraquïyätjja. Ucampis jichhajj sarnakatamjja khanañchäwa, uca sarnakäwimsti jumajj wali sumäcaspas uqham amuytajja. Cunapachatejj yanapa mayisa arnakascät uqhajja, c'ari diosanacamajj janiw yanapcätamti, janiraquiw khespiycätamsa. Take ucanacarusti thayaw apasjjani, may phust'asaquiw chhaktayjjani. Ucampisa nayar iyawsirejja marcanwa jacasini, nayan kollan kollojjanwa jacasiraquini.” Ucapachaw mä arojja ist'asiraquini: “Mä suma qhusqha thaqui waquichapjjam, take jan walt'añanacsa aptapjjam marcajjan pasañapataqui.” Alajjpachanquiristi, qhititejj wiñayatac jacqui, sutipasti kollanaraqui, ucajj aqham siwa: “Nayajj mä alto kollan chekanwa jacta, ucampisa qhititejj alt'at chuymani, llact'ata sarnakaraqui ucanacarusti ch'amañcharactwa. Janiraquiw marcajjarojj juchañchcapunïtejja, janiraquiw wiñayataquis colerascäti, uqhama lurasasti cawquïri jakenactejj nayajj uscta jupanacajj ch'ama chhaktayasipjjaspa naya nayrakatanjja. Israelan juchap laycuraquiw mä pacha coleratayätjja, juparojj mutuyaraquïyätwa, apanucuraquïyätwa; ucampis jupajj nayataquiw sayt'asïna, jupan amtataparjamaquiraquiw sarnakasïnjja. Sarnakäwipjja uñjtwa, ucampis nayajj kolljjatäwa, samarañ churaraquï, chekpachansa samarataraquiw uñjasjjanejja. Llaquitanacarusti nayaw chuymachäjja, takenirus saraquïwa: ¡Samarañajj utjpan jayanquirinacampi, uqhamaraqui jac'anquirinacampisa! ¡Nayaw marcajjarojj kolljjatasjjä!” samarañaru mantjjapjjatapatjja. Cheka thacwa jupanacajj sarapjjäna, jichhasti sepulturanacapan samarasipqui.
“Tatitur take chuymamampi catuyasim; juman ch'iqhi cancañamaruquejj jan alcatasimti. Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.
Tatitusti janiw wiñayataqui jiwasarojj apanucquistaniti, T'akhesiycchi ucasa, jupajj qhuyapt'ayasiraquiwa, munasiñapajj sinti jach'ätap laycu. Jupasti janiw t'akhesiyañjja muncapuniraquiti, janiraquiw jakerusa t'akhesiyañ munquiti.
Nayasti jumamp chicapuniw utjasïyäta, jumaw cupi amparajjat wayjjarustajja, amtatamarjamaw irpistajja, khapak chekawjaruw puriyaraquitätajja.
Nayar jutapjjam take karjatanaca jatjatanaca, nayaw samarayapjjäma. Nayan yugojja apapjjam, ucatsti nayat yatekasipjjaraquita. Nayasti llamp'u chuymani, alt'at chuymaniraquïtwa, ucatwa almaman samarañapjja jicjjatapjjäta. jisct'añataqui —¿Jumätati jutañapäquis uca Cristojja, jan ucajj yakharuch suyapjjäjja? —sasa. Nayan yugojjasti jasa apañaquiwa, qhumojjasti sinti phisnaquiraquiwa.”
Almajjay, ¿cunatarac llacthapistasti?, ¿cunatarac ajjsarthaptasti? Diosaruc suyt'am, wasitat jach'añchjjäta: ¡Jupaw cusisiñajjasa, Diosajjasa!
Ucampis uca Diosan amtäwipajja Kellkatanacarjamäscaraquiwa: “Jupar munirinacataquejja Diosajj jan qhitin uñjata, jan qhitin ist'ata, jan qhitin amtat yänacwa waquichi.”
Uca suyt'äwinsti janiw cuna mayjt'añas utjquiti, Diosasti jiwasan chuymanacasarojj munasiñapwa phokhantistu Kollan Ajayu churquist uca toke.
Diosajjay, jaltatanacajjajj juman jaqhutawa, jumaw jachatanacajj apthaptajja. ¿Janit ucanacast kellkataman khanäquisti?
Iyawsañajja: “Catokäwa” sas take chuymampi suyt'ctans ucawa, uqhamarac chekpachapuni iyawsañasa cuntejj jan uñjtan ucajj chekätapa.
Nayajj wiñay jacañwa churta, janiw cunapachas jiwapcaraquiniti, ni qhitis amparajjatjja apakcaraquitaniti. Cuntejj Awquejjajj churquitu ucasti, taket sipansa jach'araquiwa, janiraquiw qhitis amparapatjja apakañataqui ch'amanïquiti.
Takpach chuymajjampiw Tatitur jach'añchä, janiw qhuyapayasiñapat armascäti. Tatitur jach'añchapjjam: angelanacapa, arsutanacap phokherinaca, arupar janc'ac jaysirinaca. Tatitun alajjpach tamanacapa, jupar jach'añchapjjam, munañap phokher loktirinacapa, jach'ar aptapjjam. Takpach luratanacapa, Tatitur jach'añchapjjam, jupan apnakat orakpachan jach'ar aptapjjam. ¡Takpach chuymajjampiw Tatitur jach'añchä! Tatituw takpach juchanacajjat pampachitu, jupaw take usunacajjat c'umarachitu; jupaw amay imäwit khespiyitu, juparaquiw munasiñamp qhuyapayasiñamp phokt'itu;
Naya, juman Tatitu Diosamaw, jumarojj amparat wayjjarsma, irparacsma; nayaw saracsma: ‘Jan ajjsaramti, nayaw yanapascäma.’ ”
Ucatwa janipuni nanacajj mayjt'asipcti: Janchinacajjajj sapürusa aynacharus sarjjchi ucasa, ajayunacajjajj sapürutjamaraquiw machakar tucusqui. Cuntejj aca oraken t'akhesipctan ucanacajj janiw cunäquisa, tucusiriquiwa. Ucat sipan mä jach'a asqui jilarquirir wiñay cusisiñwa apaniraquejja. Janiraquiw jiwasajj cuntejj uñjctan ucar chuymjja churctanti, jan ucasti cuntejj jan uñjctan ucaruwa catuyasipjjtanjja. Cunatejj uñjasqui ucanacasti tucusiriquiwa, ucampis jan uñjasqui ucanacasti janiw tucusirïquiti jan ucasti wiñayataquiwa.
Trono taypincquis uca Corderow jupanacarojj ovejanacarjama awatini, jacquir uma jalsunacaruw anaquiraquini. Diosasti take jachanacap nayranacapat phiscurjjani” sasa.
Tatituw khanajjasa, khespiyasiñajjasa, ¿qhitirurac ajjsarästi? Tatituw jacañajjar arjjati, ¿cunarurac ajjsarästi?
Jiwasanacatejj jiwäwipana Cristompejj mayachatästanjja, uqhamaraquiw jacatatañapanjja jupampi mayachatäñäni.
Nayasti yatiractwa cuna amtäwinacatejj jumanacataqui utjquitu ucanacjja, uca amtäwinacasti jumanacan asquinacamataquiwa, janiw jumanacan jan walt'apjjañanacamataquïquiti, uqhamat khepa urunacanjja wali suma jacasipjjañanacamataqui, suyt'añanacansa phokhantataraqui. Naya Tatituw ucjja arsta.
“Diosajj acapachar wal munatap laycuw mä sapa Yokapar qhitani, take qhitinacatejj jupar iyawsapqui ucanacajj jan chhakañapataqui, jan ucasti wiñay jacañanïñapataqui.
¿Qhitiraqui Criston munasiñapat apakestaspasti? ¿T'akhesiñati, jachañacha, llaquisiñacha, uñisitäñacha, pist'ayasiñacha, awtjayasiñacha, jan isinïñacha, jiwayatäñacha? Kellkatanjja saraquiwa: “Juma laycuw sapürusa nanacajj jiwañataqui yakhachatäpjjta. Qhariñ ovejanacarjamaraquiw uñjapjjetu” sasa. Take acanacansti atipirinacat sipansa juc'ampïtanwa jiwasar munquistus ucan yanapapampi.
Nayranacajjampiw kollunac uñatatta: “¿cawquitarac yanapast nayatac jutani?” sasa. Yanapajj Tatitut nayatac jutani, alajjpach acapach lurir Tatituta.
Ch'aman sayt'asipjjañäni, jan pächasisa, iyawsäwisanjja cuntejj suyt'ctan ucanjja, Diosasasti phokhaniwa cuntejj arsuwayquistu ucjja.
Nayajj Tatituruw takpach chuymajjamp suyt'äyäta: jupasti naya toker alt'anisin arnakasitajjar ist'i; Asqui cancañamat arsuñjja, janiw chuymajjar imantcti, arsutam phokherïtamampita, khespiyäwimampit yatiyta, jach'a tantachasïw taypinsti, janipuniw qhuyapayasiñamampita, asqui cancañamampit amuct'cti. Tatay, janiquiy chuymam nayatac jist'antasimti, qhuyapayasiñamamp asqui cancañamampejj imapunitpan, jan jact'cay llaquinacaw muyuntitu, juchanacajjaw jatjjattitu, janiw ucanac jact'irjamäcti; pachpa juchanacajjaw catuntitu, juyqhur uñtataw jicjjatasta. P'eke ñic'utajjat sipan juc'amp jilawa, ch'amasti pist'araquituwa. Tatay, nayar waytir jutaquimaya, Tatay, janc'aquiy nayar yanapt'irejj jutam; nayar jiwayañatac thakerinacajj, p'enkpun atipjayasipjjpan; nayar ñankha lurañ amtirinacajj, mä p'enk jaltapjjpan; nayat larusir jakenacajj, p'enkapat jaltjjapjjpan. Jumar thakerinacasti cusisipjjpan, jumamp chic larusipjjpan; khespiyäwimar munirinacajj arsupjjapunpan: “Tatitojj jach'a ch'amanipuniwa” sasa. Tatay, nayajj jan cunanïtwa, llaquitaraquïtwa, janiquiy nayat armasistati; jumaw nayan arjjatirejjätajja, khespiyasiñajjätasa: ¡Diosajjay, janc'aquiy jutam! jiwañ p'iyat waysusitu, mic'ayar jalantquiriruw khespiyitu; karka patjjaruw cayunac tact'ayitu, tact'añajjaruw ch'amañchi. Machak k'ochu lacajjar uchitu, Diosajjar yupaychañ k'ochu. Uc uñjasajj waljaniw chuym ch'alljjtayasipjje, Tatiturusti take chuymampiw iyawsapjje.
Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu, Tatiturupun iyawsapjjam, jupaw jiwasan wiñay arjjatirisajja.
Jumaw nayan yanapirejjätajja, ¡amparamancasajj cusisitätwa! Ajayojjajj jumamp chict'atawa, cupi amparamasti janiw antutnucquituti.
Uqhamasti, nayrakatajj Diosan reinopa munapjjam, uqhamarac cunatejj chekäqui jupan nayrakatapanjja ucanaca, ucatsti take aca yänacajja jumanacarojj churataquïpjjätawa. Jan llaquisipjjamti cunatï kharürojj pascani ucatjja, kharürusti take uca llaquisiñanacapampi phokt'ataraquïniwa, sapüruraquiw uqham llaquinacan phokhantatäsqui.
Cusisitäpjjapunim. Jan inact'as orapjjam. Take cunatsa Diosar yuspagarapjjam, Diosasti jumanacatjja uqhamwa muni, Cristo Jesusan iyawsirinacapjamajja.
¿Janit jumast alajjpachan nayatac utjctasti? Jumamp chic utjasajj janiw cuns aca oraken muncti. Chuymajjasa, janchejjas tucusisquiwa, ucampis Diosaw wiñay catokäwejjajja, jupaw chuymajjarojj catjjäsisqui.
“Amuct'jjapjjam, nayan Diosätajj uñt'apjjam: Nayajj marcanacat juc'ampïtwa, oraket juc'ampiraquïtwa.”
“Cusisiñanïpjjtaw jichha awtjayasirinacajja, jumanacasti sist'atäjjapjjätawa. “Cusisiñanïpjjtawa jichha jachirinacajja, kheparusti larusipjjätawa.
Diosan munasiñapatwa jumanacajj khespiyatäpjjtajja iyawsañ laycu. Acasti janiw jumanacan luräwinacamäquiti, jan ucasti Diosaw jumanacar churapjjtam. Janiraquiw cuna luräw tokëquisa, uqhamat jan qhitis jach'achasiscañapataqui.
Ucampis jupajj jiwasan t'akhesiñanacas apt'atäscänwa, pachpa aykoñanacaswa apjjäsiscänjja. Jiwasasti Diosas juparojj usuchjcaspa uqham amuyayätanjja, Diosajj juparojj t'akhesiycaspas jan ucajj jisc'achcaraquispas uqhama.
Take cunatejj nayratpach Kellkatan uchatäcän ucanacajj jiwasanacaruw yatichistu, llamp'u chuyma toke suyt'añasataqui, ucanracwa mä samarañsa jicjjattanjja.
Jiwasanacajj acapachan tucusir utjamätanwa, apnakañ carpjama ucajj janiw wiñayataquïquiti; ucampis yattanwa take acanacatejj tucusjjanejja, Diosajj waquicharapistuwa alajjpachana wiñay uta, ucasti janiw jakenacan amparapamp luratäquiti.
Ucampis uca mä juc'a urunacana t'akhesipjjatama pasjjepansti, Diosajj jumanacarojj sumwa tucuyapjjätam, sum sayt'ayapjjaraquïtam. Uca Diosasti qhititejj take bendicionanac churquistu ucawa, uqhamarus Jesucristompi chicäñasataquiraquiwa jawsistu wiñayataqui.
Qhitanquitu ucan munañapajja acanacawa: Take qhitinacatejj Diosan Yokaparu uñjquejja, uqhamarac jupar iyawsquejja ucanacajj wiñay jacañanïñapa, nayasti khepa urunjja jacatatayaraquïwa.
Ucampis jiwasanacajj alajjpachanquir jakenacäpjjtanwa, Khespiyiri Cristo Tatitun alajjpachat jutañapwa suyasipcaractanjja. Jiwasanacan jan wali janchisjja jupaw trocani, jupancquis uqham c'ajquir janchipar uñtata. Uqhamsti cawquïr ch'amapampitejj take cunsa apnakqui uca ch'amapampiw uqham tucuyani.
Jacapctansa, Tatitutaquiw jacapjjtanjja; jiwjjañän ucqhatsti Tatitutaquiraquiw jiwjjañäni. Uqhamasti jiwañansa jacañansa Tatitutaquïtanwa.
Aca orakenjja janiw wiñay utjir marcajj utjquistuti, jan ucasti thakasctanwa cawquïr marcatejj jutcani uca.
Nayajj Tatitump chicapuniw sarnakascta, jupaw cupëjjajjanqui, janiw cunas tincuyquitaniti. Ucat chuymajjajj walpun cusisi, ajayojjas cusisi, janchejjas samararaqui.
Cunjämatejj mä taycajj wawaparojj chuymachejja, uqhamaraquiw nayajj jumanacarojj chuymachapjjäma, Jerusalenansti chuymachasiña jicjjatapjjaraquïta.”
Jumaw imantasiñajjätajja: jan walt'añanacat khespiyista, atipjäwi k'ochunacampiw muyuntayaraquista.
Cunjämtejj Adán chachancatas laycojj take jakenacajj jiwarapjjejja, uqhamaraquiw Cristoncjjasinjja take jakenacajj jacapjjani.
Jichhasti janiw cuna juchañchäwis utjquiti Cristo Jesusanquirinacataquejja, qhitinacatejj jan jacapqui janchin munañaparjama [jan ucasti Ajayun apnakata jacapqui ucanacataquejja].
Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.
Ucampis llamp'u cancañampi chuymachasiñampi churir Diosajja jumanacan jacäwimana yanappan sumaqui mayninacajj mayninacampi jacapjjañamataqui, Tatit Jesusanquirinacjama,
Diosay, uñaquipitaya, chuymajjar uñantam, nayarojj yant'itaya, lup'itanacajj uñt'araquim, nayatejj ñankha thaquin sarnakerïstjja, cheka thaquinjamay irpasita.
Diosaw nayar khespiyirejja, juparuw iyawsta, janiw cunsa ajjsarcäti. Tatituw nayan arjjatirejjajja, nayar ch'amañchirejjasa, jupaw khespiyirejjajja.”
Ucatwa jumanacajj wali cusisita sarnakasipjjtajja, inas waquisiracchi mä juc'a pacha cunayman yant'anacan t'akhesipjjañama ucasa. Jumanacan iyawsañanacamasti mä korir uñtataw ninampi yant'atäñaparaqui. Cawquïri iyawsañatï uca yant'anaca pasqui ucasti uca tucusir korit sipansa juc'ampi jila alaniwa. Uqhamatpï jumanacan iyawsañanacamajja, yant'atäsinjja sumat uñt'atänejja, jach'aru aptataraquïniwa cunapachatejj Tatit Jesucristojj jutcani ucapachajja.
“Aqhamjja nayajj jumanacar parlapjjsmawa nayampi cusisipjjañamataqui, cusisiñampi phokt'atäpjjañamataquiraqui.
Ucampis Diosajj munasiñapwa uñacht'ayistu, cunapachatejj jiwasanacajj juchanïscäyätan ucapachaw Cristojj jiwasanac laycu jiwawayi.
Munat jilatanaca, jichhajj Diosan wawanacapäjjtanwa, ucampis janïraw khanañchquistuti cunäcañänitejj tucuy urunacan ucjja. Ucampis yattanwa cunapachatejj Tatit Jesucristojj uñstancani ucqhajja, jupjamaw tucuñäni, cunjämäquitejj jupajj uqhampacha uñcatatas laycu.
Diosaruw jach'at art'asta, nayar ist'añapataquiw mayista. Ucat sista: “¡Alajjpachanquirin jiwasanacar jan qhuyapayasjjatapajj walpun chuym usuyitu!” sasa. Tatitun muspharcañ luratanacapat amtasï, nayra pachanacan luratanacapata, take luratanacapat lup'isï, muspharcañ luratanacapata. Diosay, thaquinacamajj kollanawa: ¿qhiti diosarac jumjam ch'amanisti? Jumaw muspharcañanac lurir Diosätajja. Jumaw marcanacar ch'amam uñacht'aytajja. Ch'amamampiw marcamarojj khespiytajja, Jacobon wawanacaparu, Josean wawanacaparu. Diosay, lamar kotajj jumar uñjasajj qhathatïnwa, mathapinacapasti ajjsarthapïnwa, kenayanacajj warasquir jall purjjatayäna, pachansti khejjokhejjonacaw sartäna, llijullijunacaw take chekan lliphikeraquïna. Khejjokhejjonacamajj jach'a thayamp chicaw ist'asïna, llijullijunacamajj acapachpach khant'ayäna, orakesti qhathatïnwa. Jumajj lamar kotan thac jist'arastajja, umanac taypinjam maqhattajja, ucampis janiw qhitis cayu tact'atam jicjjatcänti. Tatitojjay, llaquisiñajjan jumar thaksma, arumthapejj jan karjasisaw amparanac loktansma, ajayojjasti janiw chuymachasiñ jicjjatquiti.
Jichhajj Diosajj jach'añchatäpan, jupajj ch'amaniwa cuntejj mayctan, lup'caractan ucanacata juc'ampi lurañataqui, ch'amap toke jiwasanac taypina luratapata. ¡Jach'añchatäpan Diosajja iglesia taypina Cristo Jesús toke, wiñayan wiñayapataqui! Uqhamäpan.
¡Tatitojj jach'ar aptatäpan! Diosasar k'ochuñajj cusiscañawa. Jupar suma k'ochunacamp jach'añchañaw waquisi.
Ucatsti mä aru ist'ta alajjpachat art'asisinquiri: “Ac kellkam: ‘Cusisiñanïpjjewa qhitinacatejj acat ucsaru Tatitur iyawsasa jiwapqui ucanacajja.’ “Jïsa,” uqham siwa Kollan Ajayojja, jupanacasti lurañanacapatjja samarjjapjjaniwa, ucampis luratanacapajj jupanac chicapunïscaniwa” sasa.
Janiraquiw ucaquïquiti, jan ucasti t'akhesiñansa cusisiractanwa, uqhamatwa yatiractanjja t'akhesiñajj llamp'u chuymanïña yatichatapa. Uqham llamp'u chuymanïñasti mä sumaruw jiwasarojj mistuyistu, uqham sumar mistuyatäsinsti suyt'añaw utjistu. Uca suyt'äwinsti janiw cuna mayjt'añas utjquiti, Diosasti jiwasan chuymanacasarojj munasiñapwa phokhantistu Kollan Ajayu churquist uca toke.
Diosajjay, aykosquir arnakasitajjarojj ist'aquimaya, mayisitajjarojj jaysaquimaya. Chuymajjan aynacht'atap laycojj orak tucuyatpach jumar art'asinsma: jan mistcay karka patjjaruy sayt'ayita,
Nayajj Dios sapanac samarañ jicjjatta, suyt'añajjajj jupat juti. Jupaquiw khespiyitu, arjjataraquitu. Janiw tinccäti, jupaw imantasiñajjajja.
Jesusajj wasitampiw jakenacaru parläna: —Nayätwa acapach khanajja. Qhititejj nayaru arquitani ucajja, jacañ khananïniwa, janiraquiw mayampis ch'amacan sarnakcjjaniti —sasa.
Uqhamasti munat jilatanaca, jumanacajj Tatitumpejj sum sayt'asipjjam, janirac sarakapjjamti. Irnakasipcaquim juc'ampi juc'ampi Tatitun luräwipanjja; jumanacajj yatipjjaractawa Tatitumpi mayaqui irnakapjjatamajj janiw inamayäquiti.
Jumaw arjjatirejjätajja, imantasiñajjätasa, jumaw khespiyirejjätasa, Diosajjätasa, nayar imantir karkajjätasa, imir jarc'akasiñajjätasa, khespiyir ch'amajjätasa, wali amstanquir imantasiñajjätasa.
Nayan amtatanacajjasti janiw jumanacan amtatanacamjamäquiti, luräwinacajjas janiraquiw jumanacan luräwinacamjamäquiti.” Tatituw uqhamjja arsu. “Cunjämatejj alajjpachajj acapachat wali altonquejja, uqhamaraquiw amtatanacajjasa, luräwinacajjasa, jumanacan amtatanacamatsa, luräwinacamat sipansa wali altoraquiwa.” Tatituw ucjja arsu.
Uqhamajja, Diosan munañaparjam t'akhesirinacajja, asquinac lurasipcañapaquiwa, Diosaruraquiw almanacapsa catuyasipjjañapa, qhititejj jiwasar lurirïqui ucaru, jupasti chekaparaquiwa.
Diosajj janiw ajjsarañ ajayu churquistuti, jan ucasti ch'amani, munasiñani, chekapar amuyt'aña ajaywa churistu.
Tatay, jumaw chuymajj uñantista, nayar uñt'araquista: ch'eka amparamajj ucan jicjjatitaspa, cupi amparamasti janiw antutquitaspati. Ch'amacamp imjjatayasiñtejj amtirista, jan ucajj, khana urun ch'amac arumar tucuñaptejj muniristjja, ch'amacajj janiw jumat imantquitaspati, arum ch'amacajj urut sipan juc'ampiw khantaspa. ¡Ch'amacas urus jumataquejj pachpaquiwa! Jumaw nayarojj irnokasista, taycajjan puracapan utjayasista. Jumaruw yuspagarsma, muspharcañpun nayataquejj lurtajja, ¡ucsti sumpun yatista! Janchejjan jiltatapajj juman uñjatänwa, jan qhitin uñjcat irnokatäcäyät ucchañcama, orak mankhan utjayatäcäyät ucchañcama. Nayranacamajj lurat janchejj uñjäna; ucanacasti takpachaw kellkatamar kellkantasïna. Jacañ urunacajjajj suma jaqhutänwa, nayrïr uru janïr purinquipana. Diosajjay, juman amtatanacamajj jan amuycayawa, ucanacajj jan tucusquiriwa. Ucanactejj jact'añ muniristjja, ch'allat sipan juc'ampïspawa; jaqhuñ tucuyirist ucasa, jumamp chicaquïsquiristwa. Diosajjay, ñankha luririnacarojj tucusiyamaya, jake jiwayirinacarusti nayat jithektayam, jumaw kont'atajjsa, sartatajjsa yattajja, lup'itanacajjarojj jayatpach amuytajja.
Yatichapjjaraquim take cuntejj nayajj jumanacar yatichapcsma ucanaca phokhaña. Amtasipjjapunim, nayajj sapürupuniw jumanacampïscta acapachan tucusiñapcama.”
Utjistuwa Diosar iyawsañasajja, yatiractanwa cuntejj Diosarojj mayiñäni munañaparjama ucjja jupajj ist'istuwa. Cunjämtï yattanjja Diosajj oracionanacasarojj ist'istuwa, uca pachparaquiw yattanjja cuntejj mayctanjja ucajj niyaw utj-jjestu.
Take cunasa Diosat juti, jupan lurataraquiwa, jupataquiraquiwa. Uqhamajj Diosajj wiñayataqui jach'achatäpan. Uqhamäpan.”
Nayajj jumarojj irpascapunïmawa, wasaransti mank'añjja jilarquir churaraquïma, janchimarusti ch'amañcharaquïmawa, mä suma karpata pankar yapjamaw tucuraquïta, mä uma jalsur uñtataw tucüta, umamasti janiw tucuscaraquiniti.
Diosan thaquipajj chekapawa, Tatitun arsutanacapajj take chuymamp iyawscayawa, Diosajj jupar take chuymamp alcatirinacarojj imascapuniwa.
“Ucampisa, kollanawa cawquïri jaketejj nayaru iyawsquitu, uqhamaraqui take suyt'añapsa nayaru usccaraqui ucajja. Jalir umani jawir thiyaru ayruntata kokjamäniwa, saphinacapasti uca uma tokeru saphintataraquiwa, cunapachatejj lupejj purinqui ucqhasti janiw ajjsarcaraquiti, laphinacapasa take horasansa ch'ojjñaquïscaniwa. Waña horasa purinipansti janiw mayjt'ascaniti, take horasansa achuniquïscaniwa.
Tatitojj art'asirinacapan jac'apancasquiwa, takpach chuymamp jupat art'asirinacan jac'apanquiwa. Jupar arquirinacan munataparjamaw phokhe, arnakasitanacap ist'i, khespiyaraqui.
Diosajjay, jumaw Diosajjätajja, jumar thakasaw khantatta, almajjajj jumatjam pharjatawa; janchejjajj jumatjam awtjatawa, jan umani, jan jacañan waña oraker uñtatawa. espadamp jiwarayataw uñjasipjjani, kamakenacan mank'antataw tucusipjjani. Reyisti Diosancasaw cusisini, sutip laycu juramento luririnacajj k'ochupjjaniwa, c'arinacan lacapasti llupt'atäniwa. ¡Kollan utaman uñjañ munsma! Ch'amamamp jach'a cancañamamp uñjañ munta, munasiñamajj jacañat sipan juc'ampiwa, lacajjajj jumaruw k'ochütam. Take jacäwejjan jach'ar aptäma, jumar art'asisaw amparanacajj aytä.
Yupaychañäni Jesucristo Tatitusan Dios Awquiparu. Jupaw jiwasar qhuyapayasir Awquisajja, uqhamarac chuymachirisasa.
Uca quipca Ajayuraquiw jiwasan ajayusamp chica Diosan wawanacapätas khanañchi. Wawanacapätas laycojja Diosatjja herencia catokaraquiñäni jupan arsutaparjama. Uca herenciajja Cristompiraquiw catokañäni, jiwasanacatejj jupamp chica take cunans t'akhesiñäni ucajja, ucat alajjpachan jupampiraquiñäni.
Tatitun sutipajj imantasiña jach'a torrer uñtatawa, asqui jakenacajj jupan ucar imantasiñataqui jutapqui ucanacataquejja.
Jan ucasti Tatitur jach'achapjjam chuymanacamanjja. Ucatsti waquicht'atäpjjaraquim qhitinacatejj jumanacaru suyt'añanacamjjat jisct'apcätam ucanacar sañataquejja ucampis sapjjam suma chuymampi.
Munasiñamamp qhuyapayasiñamampejj sapürupuniw nayamp chicäsqui, Tatay, utamansti wiñayapuniw jacä.
Ucampisa juman jiwirinacajja jacatatapjjaniwa, jiwat janchinacapas jacatatapjjaraquiniwa. Aca oraken iquirinacasti iquinacapatjja sartapjjaniwa, cusisiñatwa arnakasipjjaraquini. Jumaw khanamjja mä jallu sullar uñtat apayantajja, ucampis jiwatanacajj jacatatapjjaraquiniwa.
Janiw acancjjeti, jan ucasti jactawayjjewa, cunjämtejj siscäna uqhama. Jutapjjam, uñjapjjaraquim cawquirutejj imatäcän uca.
Uqham suyt'äwi laycuquiwa khespiyatätanjja, ucampisa maynitejj uñt'chi cuntejj suyasqui ucjja, ucasti janiw suyt'añäcjjeti, jupan uc uñj-jjatap laycu. Ucampis cuntejj suyapctan ucjja janiw uñjctanti, ucampis llamp'u chuymampiw suyt'apjjañasa.
Diosaw khant'ayistu, imaraquistu; jupaw qhuyapayasiñampi, aytat cancañamp churi. Jan camscay asqui jaquir jakenacarojj, Tatitojj munasiwa, jach'aruw apti, asquinacap churaraqui.
Qhitinacatejj atipjcani ucanacajj jank'ot ist'atäpjjaniwa, janiraquiw sutinacapsa jacañ librotjja apanuccäti, jan ucasti Awquejjan nayrakatapan, uqhamarac angelanac nayrakatanwa jupanacarojj uñt'asjjäjja.
Diosajj jumanacarojj churapjjaraquïtamwa samarañapa, ucasti take cuntejj jakejj amuyt'caspas ucat juc'amp jach'awa. Uca samarañasti jumanacan chuymanacamsa, amuyunacamsa imaniwa Cristomp mayaquïpjjatam laycu.
Jesusasti ucjjarojj saraquïnwa: —Jilamajj jactaniwa —sasa. Martasti saraquïnwa: —Jïsa, jiwatanacan khepa urun jactañapjja yattwa —sasa. Ucjjarojj Jesusajj sänwa: —Nayätwa jactañasa, jacañasa. Qhititejj nayaru iyawsaraquitu ucajja jiwatäcanisa, jacaniwa.
Pachpa sumancañ Diosajj jumanacarojj phokhat k'omachäwimp k'omachpan, uqhamarac imaracpan ajaysa, almsa, janchissa, jan acch'a juchani Tatit Jesucristosan jutañapcama. Cawquïritejj jawsapctam ucajja phokheriwa, uqhamajj phokhaniw take acanacjja.
Uqham uñjasinsti, jiwatjamaw cayunacaparu liwnoktta. Jupasti cupi amparapampi lokjjatasinjja situwa: “Jan ajjsaramti; nayätwa kalltasa tucuyasa. Nayajj jacasctwa jiwatäcchïyäta ucasa. Jichhasti wiñayataquiw jacascta. Jiwañan llavepsa nayaw catta, jiwatanacan utjäwipan llavepsa nayaw catta.