Éxodo 6:7 - Qullan Arunaca

⁷ Jumanacarusti nayan marcajjwa tucuyapjjäma, ucatsti nayawa jumanacan Diosamäyäjja. Uqhamatwa jumanacajj yatipjjäta nayajj jumanacan Tatitu Diosamätajja, uqhamat nayajj egipcionacan wali ch'ama lurañanacampi t'akhesiyapctam ucanacata khespiyätajja.

Aymar Bibliia 1986

⁷ Jumanacarusti nayan marcajjwa tucuyapjjäma, ucatsti nayawa jumanacan Diosamäyäjja. Uqhamatwa jumanacajj yatipjjäta nayajj jumanacan Tatitu Diosamätajja, uqhamat nayajj egipcionacan wali ch'ama lurañanacampi t'akhesiyapctam ucanacata khespiyätajja.

Qullan Arunaka DC

⁷ Jumanakarusti nayan markaxaruw tukuyapxäma, nayaw jumanakan Diosamäyä. Ukhamat jumanakax yatipxäta nayan jumanakar wali ch'ama lurañanakamp egipcionakax t'aqhisiyapktam ukanakat qhispiyir Tatit Diosamätaxa.

Éxodo 6:7 Jak'a apnaqawi uñst'ayäwi

Génesis 26:3

jichhasti aca marcan jacascaquim. Nayaw jumampïscä, bendiciraquïmawa, uqhamarus jumaru, wawanacamampiruw take aca orakenac churä. Uqhamwa cuntejj Abraham awquimar arscayät uca arsutajjarojj phokhäjja.

Génesis 28:13

Uqhamarus uñjaraquïnwa Tatitojj ucan jupa jac'ana sayt'atäsquiri, aqham sasa: “Nayätwa Tatitojja, Abraham achachilaman Diosapajja, uqhamaraqui Isaac awquiman Diosapa. Jumampiru, wawanacamampiruw cawqhantejj ict'atäcta uca orake churä.

1 Reyes 20:28

Ucqhansti mä profetawa Israelan reyip nayrakataparu jutasina aqham säna: Aqham siwa Tatitojja: ‘Sirio jakenacajj niyajjaya nayarojj sapjjchitojja kollunacana diosätajjaqui, jan vallenacana diosätajj-jja, jichhasti amparamaruwa take aca walja jakenacjja catuyäma. Uqhamatwa jumajj yatïta nayan Tatitötajja’ ” sasa.

1 Reyes 8:60

Uqhamatwa aca orakenquir take marcanacajj yatipjjani Tatitojj Diosätapa, jan yakhajj utjatapata.

Nehemías 1:10

“Nanacawa juman uywatanacamäpjjta, uqhamarac marcamasa, qhitinacarutejj jach'a ch'amamampi, jach'a luräwinacampi khespiyapjjestajja.

Salmos 100:3

Amtasipjjam, Tatitojj Diosawa: jupaw irnokestu, jiwasanacasti jupancapjjtanwa, jupan marcapäpjjtanwa, ovej tamapäpjjaractanwa.

Salmos 81:6

“Jathintir k'epim callachimat apakjjsma, ch'ama tucuñ lurañamat samart'aysma.

Éxodo 13:14

Ucampisa khepärmanthitejj wawanacamajj jisct'apjjätam: ‘¿Cunatsa aqham lurapjjta?’ sasa, ucqhajja sapjjätawa: ‘Tatituw ch'amapampi Egipto marcana t'akhesis jacañatjja apsunipjjetu.

Éxodo 13:3

Ucatsti Moisesajj israelitanacarojj sänwa: “Aca urutjja amtasipjjapunïtawa, aca uruwa Tatitojj ch'amapampi Egiptota apsunipjjtam, cawqhantejj t'akhesipcäyäta ucatjja. Uca laycusti janipuniwa levaduran t'ant'a mank'apjjätati.

Éxodo 14:18

Cunapachatejj ch'amajja uñacht'aycäjja faraonaru carronacapjjaru, caballonacapjjaru ucqhawa egipcionacajja yatipjjani nayajj Tatitötajja —sasa.

Éxodo 14:4

Ucampis nayajja, faraonarojj chuymapwa kalarayäjja khoruchasiñapataqui, ucatsti arctanipjjätamwa; ucat ch'amajjwa uñacht'ayäjja juparu, uqhamarac take ejercitoparusa. Uqhamatwa egipcionacajj yatipjjani nayajj Tatitütajja.” Ucatsti israelitanacajj uqhamawa lurapjjäna.

Éxodo 15:16

Tatitu, ¡jupanacasti sustjasipjjpan, ajjsarayasipjjaracpan! ¡Ch'amam uñjasinsti kalanacjama amuturac tucupjjaracpan, aca jumatac khespiyat marcamajj maqhatañapcama! Cawquïr marctejj jumatac alascta ucajja.

Éxodo 15:2

Tatituw nayan k'ochuñajjajja, juparaquiwa ch'amañchirejjasa, uqhamarac khespiyirejjasa. Jupawa nayan Diosajjajja, ucatwa yupaychäjja; juparaquiw awquejjan Diosapasa, ucatwa jach'añcharaquëjja.

Éxodo 16:12

—Nayajj ist'twa israelitanacan jan wali parlapjjatanacapjja. Ucampis jumajj parlam aqham sasa: ‘Acat jayp'urusti jumanacajj aychwa mank'apjjäta, uqhamarac arumanthi alwatasti t'ant'araqui mank'apjjaraquïta sist'asiñcama. Uqhamatwa jumanacajj yatipjjäta nayajj jumanacan Tatitu Diosamätajj-jja.’

Éxodo 16:6

Ucatsti Moisesampi, Aaronampejj, israelitanacarojj sapjjänwa: —Jayp'uruw yatipjjäta Tatitojj jumanacaru Egiptota apsunitapa.

Éxodo 2:11

Moisesasti wali waynäjjänwa, ucatsti mä urojja marca masinacap uñjiriw saräna, ucampis cawqhantejj irnakapcäna ucar jicjjatasinjja uñjänwa, jupanacajj ch'ama irnakañanacana wali t'akhesiñampi lurasipcatapa. Uqhamarac uñjaraquïnwa mä egipciojja maynïr marca masiparu nuwjasquiri.

Éxodo 6:6

Jichhasti saram, israelitanacarojj aqham sätawa: ‘Naya Tatituwa khespiyapjjäma t'akhesis sirviñata, uqhamarac egipcionacajj sinti ch'ama irnakañanaca churapctam ucatsa, jach'a ch'amajja uñacht'ayasa, uqhamarac cheka asqui cancañajjampi.

Éxodo 7:17

Uca laycusti Tatitojj siwa: ‘Jichhawa yatïtajja nayan cheka Tatitu Diosätajja. Cunapachatejj nayajj aca thujrojjampi jawirancqui uca umaru jisctä ucqhajja umanacajj wilaruw tucuni.

Isaías 41:20

uqhamat takenis uñjapjjañapataqui, yatipjjañapataquiraqui, wal ist'apjjañapataqui, amuyt'apjjañapataquiraqui, naya, Tatitun, take acanacjja ch'amajjampi luratajja, naya, Israelan Kollan Diosapa, take ucanacjja uscutajja.”

Isaías 49:23

Reyinacaw jumanacar uñt'asir awquinacamäni, reyinacan phuchanacapasti wawa uywirinacamaraqui. Jupanacasti juma nayrakatan orakcama alt'asipjjani, cayunacaman lak'anacapsa jallk'apjjaraquïtamwa. Ucapachaw jumajj nayan Tatitütajja yatïta, qhitinacatejj nayar iyawsapqui ucanacasti janiw c'arintata uñjasipquiti.”

Isaías 49:26

Jumar t'akhesiyirinacarusti pachpa janchip mank'asiyä, wilapampisti vinompjamaraquiw macharapjjani. Uqhamatwa take jakenacajj yatipjjani naya Tatitojj juman khespiyirimätajja, nayätwa Jacobon ch'amanipajja, khespiyirimasa.”

Isaías 51:15

“Nayätwa Tatitu Diosamajja, sutejjasti Take Ch'amani Tatitu satawa; nayaw jach'a kotjja onjjtayta, ucat mathapinacas wararipjjaraquiwa,

Isaías 60:16

Marcanacasti suma mank'anacapwa churapjjaraquïtam, reyinacasti kamir cancañanacapwa apanipjjaraquini; ucapachaw amuyaraquïta, naya Tatitojj juman khespiyirimätajja, naya, Jacobon Ch'amanipajja, jumar khespiyirïtajja.

Isaías 63:8

Jupajj siwa: “Jupanacajj nayan marcajjawa, janiw aca wawanacajjajj ch'ojjña lurapquitaniti” sasa.

Jeremías 31:33

Cuna arust'äwtejj qhaya urun Israelampi lurcä ucajj aqhamäniwa: Nayan leyinacajjsti chuymanacaparuw uscü, p'ekenacaparuw kellkantaraquï. Nayasti jupanacan Diosapäyäwa, jupanacasti nayan marcajjaraquïniwa. Naya Tatituw ucjja arsta.

Ezequiel 20:19

Jupanacarusti saraquïyätwa: Nayätwa jumanacan Tatitu Diosamajja. Leyinacajjsa, arsutanacajjsa sum phokhapjjam,

Oseas 1:10

Mä urojj israelita jakenacajj jach'a kota iramanquir ch'alljamäpjjaniwa, janiraquiw qhitis jact'añataqui ch'amanïcaniti: “Jumanacajj janiw nayan marcajjäjjapjjtati” siscamayasti, Diosajj jupanacarojj saniwa: “Jumanacajj jacquir Diosan wawanacapäpjjtawa” sasa.

Levítico 11:44

nayätwa jumanacan Tatitu Diosamajja. Jumanacasti k'omachasipjjañamawa, ucatsti kollanäpjjañamaraquiwa, nayasti kollanätwa uca laycu. Cawquïri animalanacatejj orakenjam katatnaktqui ucanacampisti janipuni k'añuchasipjjamti.

Levítico 11:45

Nayätwa jumanacan Tatitu Diosamajja, nayaraquiw jumanacarojj Egipto marcat apsunipjjsma, jumanacan Diosamäñajjataqui. Uca laycu jumanacasti kollanäpjjañamawa, nayan kollanätajj laycu.”

Zacarías 13:9

Uca jilt'iri parterusti nina tokeracwa pasayäjja, cunjämatejj kollkejj k'omachañäqui uqhamaracwa k'omachäjja, Cunjämatejj korejj k'oma tucuyañäqui uqhamaracwa k'oma tucuyäjja. Ucqhaw jupanacajj nayar art'asipjjetanejja, nayasti jaysaraquïwa. Saraquïwa: ‘Nayan marcajja’ sasa. Jupanacasti sapjjaraquiniwa: ‘Tatituw jiwasan Diosasajja’ sasa. Naya Tatituw ucjja arsta.”

Números 15:41

Nayaw jumanacan Tatitu Diosamätjja, nayaraquiw Egiptot irpsunipjjsma, jumanacan Diosamäñataqui. Nayaw Tatitu Diosamäta” sasa.

Mateo 22:32

‘Nayajj Abrahaman, Isaacan, Jacobompin Diosapätwa’ sasa. ¡Diosajj janiw jiwatanacan Diosapäquiti, jan ucasti jaquirinacan Diosapawa!

Romanos 8:31

¿Cun sañänisa take acanacarojja? Diosatejj jiwasampïchejja, ¿qhitirac jiwas conträspasti?

Deuteronomio 14:2

Jumanacasti Diosan k'oma ajllit marcapäpjjatam laycu. Juparaquiwa take marcanacat sipansa jumanacaru ajllisipjjtam jumanacajj jupan marcapäpjjañamataqui.

Deuteronomio 26:18

Uqhamaraquiwa Diosajj jichhüruna khanañcharaqui, juma Israel marcajj jupan marcapätama, cunjämatejj arupampi arsuwaytam uqhama, take camachi arunacapa phokhañamataqui.

Deuteronomio 29:12

uqhamat arsupjjañamataqui uca arust'äwina mä juramento toke, cawquïri Diosamatï jichhüruna jumanacampi luri.

Deuteronomio 29:13

Jichhüruwa uñt'ayasi jumanacajj jupan marcapäpjjatama, jupasti jumanacan Diosamaraqui, cunjämatejj arupampi arsüna Abraham, Isaac, uqhamaraqui Jacob uca awquinacamaru.

Deuteronomio 29:5

Nayasti pusi tunca maraw wasaranjama irpanipjjsma, take uca maranacansti janiraquiw isimasa ni zapatomasa merk'escänti.

Deuteronomio 4:20

Ucasti jumanacarojj Tatituw irpsunipjjtam qhä Egipto hierro umatatayañ hornota, uqhamarac jupan marcapa tucuyapjjtam, cunjämatejj jichhajj jicjjatasipjjta uqhama.

Deuteronomio 7:6

Jumanacasti Tatitu Diosatac ajllit marcäpjjtawa; Diosaw jumanacarojj take marcanacat sipansa ajllisipjjtam, uqhamat jumanacajj jupatac yakhachat marcäpjjañamataqui.

Hebreos 11:16

Ucampis jupanacajj mä suma orak munapjjäna, ucasti alajjpach marcawa. Ucatwa Diosajj jan p'enkasquiti, jupanacan Diosapa sayasiñjja, jupanacataquisti mä marcaw waquichata utji.

1 Pedro 2:10

Jumanacajj nayrajj janiw mä marcäpcäyätati, jichhasti Diosan marcapäjjapjjtawa. Nayrajj janiw qhitis jumanacatjj qhuyapayascänti, ucampis jichhajj Diosaw qhuyapayasjjapjjtam.

Apocalipsis 21:3

Ucatsti mä jach'a aru ist'aracta alajjpachat art'asiniri: “¡Acajjay, Diosajj jichhajj jakenac taypinwa jaqui! Jupanacampiw jacani, jupanacasti marcapäniwa. Dios quipcaraquiw jupanacampïni, jupanacan Diosaparaquïniwa.

Apocalipsis 21:7

Atipjiristi take acanacwa herenciata catokani. Nayasti jupan Diosapäyäwa, jupasti nayan wawajjäniwa.