JOSHUA 16 - BUKUIT NE TILIIL Sireet ne Dutero Kanon BUKUIT NE TILIIL Sireet ne Dutero Kanon
JOSHUA 16

¹ Kebeberta ne ki ibutyi eng' parbaryat lagogap Joseph kotaune Jordan eng' Jeriko eng' kong'asiis agoi surkwen, ak kotogosta eng' Jeriko kobun emetap tuloonook kwo Bethel.

² Ki wo komanda eng' Bethel kwo komong'ji Luz ak kosiirto kot koit kooretap Arikik eng' Ataroth.

³ Ak kwo kochoortagei kotokyigei cherongo agoi kooretap Japhletik, kot koit kooretap ole rektoot ne po Beth-horon ak kotokyigei Gezer ak komong'ji nyanjetap Mediterenian.

⁴ Ki nam anyun lagogap Joseph, chooto Manasseh ak Ephraim porotennywa.

⁵ Kooretap lagogap Ephraim ko uu ortinwekwak ko uu ni; kiwotetap koorennywa kong'etee kong'asiis ne po Ataroth-addar kot koit Beth-horon parak,

⁶ ak kwo kiwoteet kot koit araraitap Mediterenian. Eng' murot kaataam kowendi kiwoteet kong'etee Mikmethath agoi kong'asiis ne po Taanath-shiloh kosiirto kotogosta agoi kong'asiis ne po Janoah.

⁷ Kong'eete Janoah kochoortagei kwo Ataroth ak Naarah koit Jeriko ak kwo kot komong'ji Jordan.

⁸ Eng' cherongo, kogiwo kiwoteet kong'etee Tappuah kot koit aineetap Kanah ak komong'ji nyanjetap Mediterenian. Niito anyun ko poroteetap pororyetap lagogap Ephraim ko uu ortinwekwak,

⁹ kobooto nganasook tugul ak kokwotinwekwak che ki kitabaanji Ephraim ak lagokyik eng' kwenutap poroteetap lagogap Manasseh.

¹⁰ Ago ma imuuch `icheek ko oon Kanaanik che ki menyei Gezer. Ki meny anyun Kanaanik kwenutap Ephraim agoi rani ak ki ek otwogik che yaei poisyonigap otwoknateet.