JOSHUA 17 - BUKUIT NE TILIIL Sireet ne Dutero Kanon

Kooret ne po kebebertap pororyetap Manasseh

¹ Ni ko kebeberta ne ki ibutyi eng' parbaryat pororyetap Manasseh; amu kitaita ne po Joseph. Ko uu Makir, ne kitaita ne po Manasseh, kwandap Gilead, ko amu kichii ne po lugeet, ko ki kigoochi ineendet Gilead ak Bashan.

² Ki punji lagogap Manasseh che ki ng'et, ko uu ortinwekwak, chooto lagogap Abiezer, lagogap Helek, lagogap Asriel, lagogap Shekem, lagogap Hepher ak lagogap Shemida. Chooto murenik che po iyoteetap Manasseh weeriitap Joseph, ko uu ortinwekwak.

³ Kimasich weeriik Zelophehad weeriitap Hepher, weeriitap Gilead weeriitap Makir weeriitap Manasseh, ago tiibiik icheegei; ak chu kainaigap tiibiikyik: Mahlah, Noah, Hoglah, Milkah ak Tirzah.

⁴ Ki pwa icheek tait ne po Eleazar tisiindet, Joshua weeriitap Nun ak pounik, koleen, “Ki ng'at `Kamuktaindet ne Toroor Musa kogoonech poroteet eng' kwenutap tupchosyekyok.” Ara ko uu ng'atuutyetap Kamuktaindet ne Toroor, ko ki igoochi `Joshua icheek poroteet eng' kwenutap tupchosyegap kwandanywa.

⁵ Ki sich Manasseh kebeberwek taman koma pooto emetap Gilead ak Bashan, ne mi Jordan pitoniin,

⁶ amu ki tinyei tiibiigap Manasseh poroteet kobooto weeriikyik. Ak ki punji emetap Gilead weeriigap Manasseh che ki ng'et.

⁷ Kiwotetap Manasseh kong'etee Asher kot koit Mikmethath, ne neegitee Shekem. Ki testai kiwoteet kwo komostap tai, kotokyigei ole menyei piigap En-tapua.

⁸ Ki po Manasseh emetap Tappuah, ago Tappuah ne mi kiwotetap Manasseh ko ki po lagogap Ephraim.

⁹ Kichoortage kiwoteet kwo aineetap Kanah. Nganasochooto mi komostap tai kobunjiin Ephraim koek che kaginemu eng' nganasoogap Manasseh. Kiwotetap Manasseh komi komostap kaataam ne po aineet ak kwo komong'ji nyanjetap Mediterenian.

¹⁰ Po Ephraim ne mi komostap tai, ak ne mi komostap kaataam ko po Manasseh, kobooto nyanjetap Mediterenian koek kiwotennyi. Ki it Asher eng' murot kaataam agoi Issakar eng' kong'asiis.

¹¹ Eng' Issakar ak eng' Asher, ko ki tinyei Manasseh chu; Beth-shean ak nganasookyik, Ibleam kobooto nganasookyik, che ki menyei Dor ak nganasookyik ak che ki menyei Endor kobooto nganasookyik. Ki tinyei kora che ki menyei Taanak kobooto nganasookyik, che ki menyei Megiddo kobooto nganasookyik ak kebeberta agenge eng' somok ne po Nabat.

¹² Ago ki ma imuuch lagogap Manasseh koon piik che ki menyei nganasochooto. Amu kigamach Kanaanik komeng'iis eng' emonooto,

¹³ ko ye kiga kogimegitu piigap Israel, konde Kanaanik koyai poisyonigap otwoknateet ama oon icheek.

¹⁴ Ki ng'alaalji `lagogap Joseph Joshua koleenji, “Amu nee si igoono parbaryat agenge, kebeberta agenge koek poroteet ak ingen ile aa pororyet ne oo amu ki koberuura Kamuktaindet ne Toroor agoi rani?”

¹⁵ Ak ki leenji Joshua icheek, “Ngot ko ii pororyet ne oo, itogoste iwe timiin ak ibatyigei oldo eng' emetap Perisik ak ne po Repaik, amu mariich emetap tuloonook ne po Ephraim eng' inyee.”

¹⁶ Ki mwa `lagogap Joseph kole, “Mayamech emetap tuloonook ak kotinyei kariisyegap kariik Kanaanik tugul che menyei emetap atebweet, icheek che mi Beth-shean ak nganasookyik ak icheek che menyei atebweetap Jezreel.”

¹⁷ Ki ng'alaalji `Joshua kootap Joseph che Ephraim ak Manasseh koleenji, “Ii pororyet ne oo ak itinye kimnateet, mesiche parbaryat agenge kityo,

¹⁸ ago punjinin emetap tuloonook, amu nganda timdo, iswache ak punjinin ole pooch. Amu ioone Kanaanik koba, nganda tinyei kariisyegap kariik ak nganda kiimeen.”