Lucas 7 - Kaxinawá Bíblia (BR) Kaxinawá Bíblia (BR)
Lucas 7

¹ Hanushũ hatu yusĩ menetã Cafarnaum anu Jesus txĩtũtani hikikẽ

² hanua habianuri Romano soldado shanẽ ibu capitãonẽ dayaru isĩ tenei mawakatsis ikai abuhairakĩ

³ Jesus ma hua nĩkatã hau shushawashũyunũ judeu shanẽ ibu anibubu nitxĩkĩ Jesus txanimakĩ hatu yunua

^4-5 Jesus anu bushũ hau shushawashuĩ kanũ ea akĩ yuishũkĩ: —Capitão nawa huni duapaki. Nukũ itxati hiwe nuku hatu amashũyamaki. Ha inũ, nukunabu abuhairariamiswẽ taeshũ merabewakĩ hawenari shushawashuĩ kawe— akeakeabu

⁶ hatũ hãtxa nĩkatã hatube kai ma hawẽ hiweki kemai kaya hau yuishunũbũ soldado capitãonẽ hawẽ haibuaiburi yunua Jesus huaiki nukushũ capitão yuishũkĩ: —Shanẽ Ibuũ, ẽ haibu capitãonẽ hãtxa ẽ mia yuiai nĩkawe. Ewẽ dabanã ẽ hiwe anu huyamawe.

⁷ Ẽ pe beshmashairawẽ taea mianu ẽ kama ishuki. Haskakẽ ẽ tsuma hau shushanũ mĩ hãtxa besti yunukĩ ea shushawashũwẽ.

⁸ Ha inũ, hatũ ea yunumisrã, eari ẽ shanẽ ibu hayaki. Eãri soldadobu yunui ẽ shanẽ iburiamiski. Betsa yunukĩ: “Kawe”, ẽ wa kamiski. Betsa yuikĩ: “Huwe”, ẽ wa humiski. Ẽ dayaruri yunukĩ: “Awe”, ẽ wa amiski. Hakia mĩ ea binuawẽ taeshũ mĩ hãtxa bestiwẽ mĩ shushawatiruki, ẽ unãnã— akĩ capitão hãtxa yuishuna

⁹ Jesusũ hawẽ hãtxa nĩkatã soldado capitão ikũhairawaiwẽ taea Jesus e itã yurã kaiãnẽ txibaĩ hatxũ beaibukiri nasauketã hatu yuikĩ: —Haska na nawa shanẽ ibũ ea ikũhairawai keska nukunabu Israelbu ẽ haska hatu uĩriamaki— hatu waya

¹⁰ hawẽ haibuaibu soldado capitãonẽ hiwe anu txĩtũbaĩ hawẽ dayaru ma shushashuna uĩnibukiaki.

^11-12 Jesusũ haska wabaini hawẽ 12 tsumabu kuxipayabu inũ, haki txiti ikabu inũ, yurã kaiãnẽ txibaĩ habe bukĩ mae betsa hawẽ kena Naimkiri kai kemaya aĩbu hawẽ bene mawayamatũ hawẽ bake bestitxai mawashuna maiwanũ, iwanã, huni dabetã baketiki beaibu hawenabu hatxũ bei hawẽ ewabe kashakubiranaibu

¹³ Jesus haki nukutã hawẽ ewa nuitapaiwẽ nuikĩ yuikĩ: —Kashama nesewe— atã

¹⁴ berunã mawa beaibuki Jesus kemashũ hawẽ baketi besti tsumaya niti itã tsumabũ mawa yuikĩ: —Berunaã, ẽ mia yuiai bestẽwẽ— aka

¹⁵ mawa hawẽ tariwẽ yabukĩ mestẽhaira wabu haska peketima bestẽkawã natsauwa hãtxai taeaya hawẽ ewa benimawatã hawẽ bake nitxĩshuna iyuaya

¹⁶ Jesusũ haska wai uĩ haska uĩsbuma hawẽ datei mesehairakĩ: —Habaa! Nuku anu Deusũ hãtxa yuishunika pepahaira ma ana tashnixinaki. Hawenabu duawai Deus ana bayushuki— ikĩ Deus kẽwãkubainaibũ

¹⁷ haska Jesusũ ashu nĩkabaĩ Judéia mai pakeanuabu inũ mae betsa betsapa anuabũri yuiaibu bana nĩkakeakenibukiaki.

¹⁸ Naximanika João bitxiti hiwe anu hiwea haska Jesusũ akubainaikiri hawẽ tsumabu Joãoki txanikubainaibu

¹⁹ nĩkatã hawẽ tsumabu dabe kenashũ hatu yunukĩ: —Jesus anu kashũ: “Mekenika Deusũ nukũ shenipabu yubani ikũ hushanairã, mĩ habiamẽ? Betsa daka nũ manai?” akĩ ea yukashũtãkãwẽ— iwanã, hatu yunua

^20-21 bushũ isĩ betsa betsapa teneaibu shushawakĩ yushĩ txakabu betsa betsapa kaĩmakĩ bekũ inũ beshushbu uĩmakĩ Jesusũ hatu kaya wapakeaya Naximanika Joãoki txiti ika dabe Jesus anu kashũ haska wai betxitã atimas haki nukutã betsã yuikĩ: —Mianu Naximanika Joãonẽ nuku yunuxinaki. Mekenã Deusũ nukũ shenipabu yubani ikũ hushanairã, mĩ habiamẽ? Mĩ hamaraka? Betsa daka nũ manayuai?— aka

²² ha dabe xinãmakĩ Jesusũ yuikĩ: —Hawara uĩkĩ mã nĩkakubainairã, haska Joãoki txaniritãkãwẽ, eskaiburã. Bekũ inũ beshushbũ uĩaĩbu inũ, haska mapuisbuma mapuaibu inũ, habu bitxiki dasibi txami betsani haki dakemisbu maĩ sakara iki keyuaibu inũ, patabũ nĩkakĩ keyuaibu inũ, mawa ana besteaĩbu inũ, habu yumaĩbu hatũ pashati kakape nĩkatã benimaiburã, haska João yuitãkãwẽ.

²³ Tsuãra ea ikũwaĩ hawẽ xinã txakabui txĩtuĩsmarã, ikũ benimashãkanikiki!— hatu wa

²⁴ Joãonẽ hatu yunuxina iwani ana txĩtũbainabũ ha dapi mapubaunabu Jesusũ Joãokiri hatu yui taewakĩ: —Hanu tsua hiweabumanuarã, hawa mã uĩtãtanimamẽ? Tawa pei niwẽ bubi bubi wai keska wakĩ hunĩ hawẽ xinã betsa betsapa maewakeakeimamẽkaĩ?

²⁵ Haskamẽ? Haskamaraka? Haskara hakiri kaĩaĩ mã uĩtãtanimamẽ? Hunĩ tari pepa sawea daka? Tari pepa sawea benimai beyusirã, mabu akũhairayabu hatũ shanẽ ibũ hiwe hawẽrua anu besti hiwea ikaibu mã uĩtirubuki.

²⁶ Haskakenã, hawa mã uĩtãtanimamẽ? Deusũ hãtxa yuishunikamẽkaĩ? Haki. Joãonã, ikũ Deusũ hãtxa yuishunikaki. Ha inũ, yuishunika betsabu Deusũ yununi Joãonẽ ma hatu binuaki.

²⁷ Ha inũ, Deusũ hawẽ bake nitxĩkatsi Joãokiri yuikĩ: ‘Nĩkawe. Hanu mĩ kashanũ hau pewai kanũ ẽ hãtxa yuishunika betsa bebũkiri ẽ yunushanaii, ẽ mia nitxĩriamarã’, akĩ hakiri hawẽ kaka kenenibuki.

²⁸ Ikũkĩ ẽ matu yuiaii. Yura dasibibũ Deus dayashũkĩ tsuã João binuama ibianibũ hanu Epa Deus shanẽ ibuaitiã ikũwaĩbu haki dasiabu beshmashairabiabũ João binushãkanikiki— hatu wai

²⁹ Jesusũ hãtxa nĩkakĩ habũ Naximanika Joãonẽ hãtxa nĩkatã xinã betsa waibu hawẽ unãti wakĩ Joãonẽ hatu naximaimawẽ taeshũ yurã kaiã inũ Romanõ shanẽ ibu pei bishunikabũ yuikĩ: “Ikũki. Hawara Deusũ akairã pepaki”, iwanã, xinãkeakeaibũ

³⁰ hakia judeu fariseubu inũ Deusũ hãtxa kenenibu yusĩnanãmisbũ Joãonẽ hãtxa nĩkama inũ hawẽ unãti naximati danaĩmabuwẽ taeshũ Deusũ haburi duawapanã danaĩmabũ

³¹ Jesusũ ana habianuri hatu yuikĩ: —Nukunaburã, haskara xinaĩ imisbumẽkaĩ? Matu yuinũ nĩkakãwẽ.

³² Mae namakis hemaĩtĩ anu beyuskĩ hatũ ibubu imis mawai bake mixtĩbu shuku dabea tsaushũ shuku betsã yuikĩ: “Teperewe nũ mawabiaya benimai mã nawamaki. Hanua nũ kashei ikaskĩ nũ nuiti nawa mawabiaya mã kashamaki”, hatu wabu hawawẽra beyusti unãbuma keskabuki, nukunaburã. Matũ xinã txãkãti hubiakẽ mã benimamaki. Hamẽ matũ txakabu xinaĩ kashakatsi ikama mã xinã betsa waismaki.

³³ Eskaki, matu yuinũ nĩkakãwẽ. Ha dukũ Naximanika João hushũ matu yusĩkubaĩkĩ misi pepa piama vinho paepa akama matube beyusamakẽ hakiri hãtxakĩ: “Yushĩ txakabu hayaki”, iwanã, mã yuiakeakeimaki.

³⁴ Hanua eari matũ Hutxi Kayabi Iuwa hushũ misi pepa pikĩ vinho paepa aki ẽ matube nawabiakũkainaya ea yuãkĩ: “Uĩwẽ. Pikeki. Paẽkĩ Romano pei bishunika txakabubu inũ yura txakabu betsabu haibu wamiski”, ikĩ mã eari yuãmiski.

³⁵ Hamẽ nuku dabe nũ pepabiakẽ Deusunabu kayabibu besti unãnepakĩ habũ nukũ yusĩa nĩkatã nuku txibãkanikiki— hatu waya

³⁶ hanushũ fariseu betsa hawẽ kena Simão hawẽ hiwe anushũ Jesus pimakatsi txanima hawẽ hiwe anu Jesus ka pikatsi ishkeshkanã dakai bashti ibaũshũ piaibũ

³⁷ habia mae anuari aĩbu hininipã Jesusũ piai nĩkatã sheni hene ininipa karuhaira nẽkati hushupa bixtuki beshũ

³⁸ hune Jesusũ tae dapi dãti itã hawẽ txakabu xinaĩ huĩti nixmahaira hune kashakĩ hawẽ beũ hene besti Jesusũ tae petxiki tuis tuis ashũ hawẽ bu txaipawẽ hutekere atã hawẽ tae petsu petsu akĩ keyutã sheni henewẽ hawẽ tae txa akaya Jesusũ unãbiakĩ uĩyamakẽ

³⁹ Jesus hatũ iatũ uĩtã Jesuskiri xinãkĩ: “Deus nuku yuishunika kayabitunã ha aĩbũ hawẽ tae meairã aĩbu txakabukũkaĩmis unãkeanaii”, ikaya

⁴⁰ Jesusũ hawẽ xinã unãtã merabewakĩ yuikĩ: —Simãoneẽ, hawara mia yuipa?— aka fariseũ yuikĩ: —Ea yuiwe, yusĩnaã— aka

⁴¹ miyuiwẽ Jesusũ yuikĩ: —Huni dabetã huni betsa anua pei biyuimabu deveabuki. Betsã 500 shaba daya pei devekẽ betsãri 50 deveaki.

⁴² Ha dabetũ hania pei bishũ pakatirubumakẽ huni betsã ha dabe pei inãyuima deveabu hatuwẽ nuikĩ ha dabetũ devea hatu kenatã hakimaxinaki, ana xinãmarã. Haskakẽ ha dabetanã, haratutũ ha hatũ pei inãyuima abuhairaimẽkaĩ, betsa binũkinã?— aka

⁴³ fariseũ yuikĩ: —Ẽ xinãnã, ha mirima hakimawaxinatũ abuhairaikiki— aka —Ikũki. Mĩ yui kayabiaii— iwanã

⁴⁴ Jesus nasauketã aĩbu uĩkĩ Simão yuikĩ: —Na aĩbũ ea duawairã, mĩ uĩaĩ?— iwanã —Mĩ hiwetã ẽ hikiai haska wamisbu keska wakĩ hutxukiti ũpash mĩ ea tsaũshunama ibiashukẽ na aĩbũ hawẽ beũwẽ ea hutxushũ hawẽ buwẽri ẽ tae ea hutekere ashuki.

⁴⁵ Ha inũ, ea beya wakĩ mĩ ea tãtsu akamakẽ mia anu hikia ẽ dakakẽ na aĩbũ besti ea beya wakĩ ẽ tae petsu petsu akĩ heneamaki.

⁴⁶ Ha inũ, ea beya wakĩ sheni teipa inĩhairawẽ ẽ bu mĩ ea matxa akamakẽ sheni hene inĩhairawẽ hatũ ẽ tae txa ashuki, ea beya wakinã.

⁴⁷ Haskakẽ ewẽ nuikĩ ea abuhairaiwẽ taeshũ hawẽ txakabu mirimabiakẽ ma ẽ buashuna mĩ unãtiruki. Hamẽ tsuãra txakabu eskarabes nũ buashuna mawaira ea inũ ẽ Epa xinã mirĩmisbuki— iwanã,

⁴⁸ aĩburi yuikĩ: —Epa Deus ẽ mia daewashũshuki, mĩ txakabu mia buashũtã hau ana xinãyamanunã— akaya

⁴⁹ habube hatu iabũ piaibũ nĩkatã basheshẽ yuinamei: —Narã, hawa huni ikimẽkaĩ? yurabũ txakabu shũska buashũtirurã— iwanã, yuiakeakeaibũ

⁵⁰ haskabiabũ aĩbu Jesusũ ana yuikĩ: —Mĩ ea ikũwaĩwẽ taeshũ mĩ txakabu mĩ ma beshtekei peshuki. Ana hawa dakei dateama unãnuma inũ kariwe— anikiaki.