Êxodo 11 - Kaxinawá Bíblia (BR) Kaxinawá Bíblia (BR)
Êxodo 11

¹ hanushũ hawaira Senhor Deusũ Moisés ana yuikĩ: —Faraó inũ hawenabu anua dami atimapa betsa wakĩ ẽ hatu uĩmakatsis ikaii. Ẽ haska waya mã kaĩbainũbũ matu ana nemama ibubis hawẽ kushipawẽ matu nitxĩshanikiki.

² Natianã, minabu Israelĩ enabu hunibu inũ aĩbuaibu ha Egito nawabu hatu dapi hiwebaunabu hatũ ouro mabu inũ hatũ prata mabu hau hatu ea akubaunũbũ hatu yunuwe— ashũ

³ hau hatuki yaushiyamanũbũ Egito nawabu Senhor Deusũ hatu betxipaima Israelĩ enabũ hatu ea akubaunaibu hatũ mabuwẽ nuiama hatu inãkubaunaibũ Moisés huni mĩ atirumawẽ taeshũ hakiri dasibibũ pe shinãkĩ Faraónẽ merabewanika shanẽ ibubu inũ Egito nawabu dasibi: ‘Moisés kushipaki’, mesehairakĩ hatu inãshãkanikiki— aka

⁴ Moisĩ Faraó ana yuikĩ: —Senhor Deusũ eska ea yuiai mia yuinũ nĩkawe. Na habia yamenapũ ẽ ea Senhor Deus Egito mai pakea hirabi anu ẽ iaketanaya

⁵ hiwe tibi anua minabũ bake iyua bestibu tibi mawabaũkanikiki. Miarã, mĩ shanẽ ibubiakẽ mĩ huni bake iyua mĩ shãtukũ shanẽ ibushanai mawariashanikiki. Haska inũ, matũ escrava dayanika aĩbuaibũ matu shekiwã deneshũmisbũ huni bake iyuaburi mawai keyushãkanikiki. Ha dikabi matũ inabu bene habu dukũ kaĩmisbu mawai keyuriashãkanikiki.

⁶ Haskakẽ hanu Egito nawabu hiwebaunabu anua hatũ bakebuwẽ nuihairai bis bis iki kashahairashãkanikiki. Uatiã tenei kashanibu keskama inũ haska ana kashama ipashanaibu binui kashahairashãkanikiki.

⁷ Hakia minabukiri inũ Israelĩ enabukiri Senhor Deusũ haskas shinãma mã unãshanũ Israelĩ enabu inũ hatũ inabu uĩ hau hatũ kamanẽ hau hau ayamanũbũ matũ kamã dasibi Senhor Deusũ hatu nemashanikiki.

⁸ Ha dikabi mĩ merabewanika shanẽ ibubu dasibi eanu beshũ eki dãti itã ea ea akĩ: “Haskakenã, nukũ mai pakea hirabi anua kariwe, minabũ mia nĩkamisbu iyuirã”, ea wariabuma ẽ katirumaki— akĩ Faraó yuitã Moisĩ sinatahairai Faraónẽ hiwe anua kaĩkaĩkẽ

⁹ txipu ana Senhor Deusũ Moisés yuikĩ: —Egito mai hirabi anushũ hawẽ dateti dami betsa betsapa mã hatu uĩmatirurã, Faraónẽ matũ hãtxa nĩkama ikũkaĩshanikiki— aka

¹⁰ haska hatu yunua Faraó bebũshũ hawẽ kupiti dami betsa betsapa Moisés inũ Arãonẽ hatu uĩmakĩ abiashũkubainaya Senhor Deusũ Faraónẽ huĩti kushi wakĩ besu kushi wakubainaiwẽ taeshũ Israelĩ enabu kẽwaĩ bupanãbũ Faraónẽ hatu nitxiãmahaira inikiaki, bashikubaĩkinã.