Êxodo 12 - Kaxinawá Bíblia (BR)

Páscoa besi taewanibukiaki, na hãtxarã

¹ Faraónẽ hiwe anua kaĩkaini Egito mai pakea binubaĩriamakẽ Moisés inũ Arãobe Senhor Deus hãtxakĩ hatu yuikĩ:

² —Egito nawabũ ushe tanakĩ kenamisbu tibi ana shinãma na ushe daka benarã, matũmebi mã ha tanabaĩkĩ txibãpakeshanũ na anoki tana taewakĩ matuna ẽ matu ashuaiĩ.

³ Na habias ushe 10 shaba kainaitiã hiwe ibu tibitũ hawenabubetã pinũ, iwanã, txashuwã kasmai cabra bakemẽkaĩ, bene babupabu hau katunũbũ hatu yunutãwẽ.

⁴ Hakia hatunabu eskarabestũ txashuwã bake pikĩ keyutirubumakẽ huni betsa ha dapi hiweabe yubakatã hatunabus tanatã: “Txashuwã bake bestitxai nukunabubetãs mã pitiruki”, iwanã, ha dabetũ txashuwã bake bestitxai biabu hiwe bestitxai anushũ hatubetã pi hau hatuki dasishanũbũwẽ.

⁵ Txashuwã bene bari bestitxaiya hawa isĩ hayama hawẽ yura dasibi pe keyu hau bishanũbũwẽ. Txashuwã bake kayabi pepa hayamakẽ ina txashu betsa cabra bake bitirubuki.

⁶ Bitã mekekubaĩkĩ ushe shaba 14tiã hati shabatiã ma bari hikiaya meshuriamakẽ habiatiãri hiwe ibu tibi dasibibũ ha hatũ piti txashuwã hau tesẽshanũbũwẽ.

⁷ Ha txashuwã tesẽtã hawẽ himi dasibitũ kẽtxaki kesũshũ bikĩ mata washũ ha hiwe anushũ itxashũ piaibu anu hawẽ hikiti shui beputi hi istabĩ dabe inũ hawẽ makishkũki txashuwã himiwẽ hiwe ibu tibitũ hau pusha keyubaũshanũbũwẽ.

⁸ Ha habias meshutiã hiwe tibi anushũ txashuwã bake hiki keũshũ shuishũ pikĩ misi shashama inũ mibã betsa muka husia hau naishanũbũwẽ.

⁹ Pasha inũ huari hau pitaskayamashanũbũwẽ. Hakia hawẽ bushka inũ hawẽ pũyã dabe inũ hawẽ kishi dabe hawẽ yura dasibi taeyabis txi anu hau shuishanũbũwẽ.

¹⁰ Shaba betsatiã piti henekĩ hau teshe wayamashanũbũwẽ. Ma shabakiranaya hatira teshea hau kuakĩ keyushanũbũwẽ.

¹¹ Senhor Deusũ kushipa shinãti piti mã besikĩ piairã, tari sawe pewatã inũ bitxi tae sawetã inũ matũ mestẽti tsumatã kaĩbaĩkatsi hawaira pishãkãwẽ, Senhor Deusũ Páscoa shinãkĩ pikinã.

¹² Ha mã haska waitiã habias meshuki Egito mai hirabi anu iaketãkĩ hiwe tibi anushũ hatũ huni bake iyuabu inũ hatũ ina bene habu dukũ kaiãbu dasibi tenãkĩ Egito nawabũ hatũ dami yushĩ tibi ẽ kupi keyuaii. Ea ẽ hiwemis Senhor Deusũ haska ẽ matu yuiaii.

¹³ Ha hiwe anu mã ika tibi anu haki dasitã ẽ hawẽ matu unãti washanai himi ma pushabu uĩtã mia inũ minabu ẽ matu dũkebaĩkĩ Egito nawabu kupikĩ matũ huni bake iyuabu ẽ matu tenanãma ishanaii.

¹⁴ Hamebi hiwemis Senhor Deus ẽ eaki. Ẽ hãtxa ikũwãkĩ ẽ yunuti shinãkĩ ano tibi na ushe 14 shabatiã ea kẽwaĩ besikĩ pikĩ heneyamakubaĩshãkãwẽ. Matũ bakebu inũ matũ bababu pahairai ano tibi habias ushe habiatiãri hawa hakimama habũri ea kẽwaĩ hau hanu besipakeshanũbũwẽ, heneamarã.

¹⁵ Na habias besi mã akairã, 7 shabatiã misi shashauma pikubaĩshãkãwẽ. Ha besi mã taewaitianã, misi shashawati matũ hiwe anu hayayamashãkãwẽ. Hamẽ ha 7 shaba besitiã tsuãra misi shashawatiya piaiburã, kupikĩ matunabu anua hau hatu nitxĩshanũbũwẽ, hawenabube ana hiwemamarã.

¹⁶ Senhor Deus kẽwaĩ besi taeaitiã ha dukũ shaba inũ hawẽ henei shaba ha shaba dabe meribihairatiã hau dayayamapakeshanũbũwẽ. Hakia hatũ piti besti bawatirubuki.

¹⁷ Egito anua ẽ matu kaĩmabainaiwẽ taeshũ ha misi shashama besitiã piti watã hau pipashanũbũwẽ. Matũ bakebu inũ matũ bababu pahairakubaĩkĩ na habias Páscoa besi hakimama ano tibi hau besikubaĩshanũbũ ẽ yunuti hãtxa ẽ matu mestẽwãmaii, pakĩ hatũ epa tibitũ hawẽ bakebu hau hatu yusĩpakeshanũbunã.

¹⁸ Ano tibi hanu ushe ha dukũ shaba 14tiã bari kaya misi shashawatiuma pikĩ taewakĩ matu dasibitũ txashuwã namiyabi misi shashawatiuma pikubaĩshãkãwẽ. Hanua shaba 21tiã bari kaya ana misi shashawatiya ma ana pikĩ taewabaĩtiruki.

¹⁹ Misi shashawatiuma pikĩ besikĩ ha 7 shabatiã tsuabũra misi shasha piaibu minabu kasmai nawa matube hiweabumẽkaĩ, hatu nitxiãbu matube ana hiwetirubumawẽ taea matũ hiwe tibi anua hawẽ misi shashawati hau tsuabura hayayamashanũbũwẽ.

²⁰ Ana habiasri ẽ matu yuai ea nĩkakãwẽ. Hanira mã hiwekũkainai anushũ besikĩ misi shashama besti matũ pitiyabi pikubaĩshãkãwẽ— akĩ Senhor Deusũ Moisés yuia

²¹ hanua Israelĩ bababu shanẽ ibubu tibi Moisĩ kenakĩ itxawashũ hatu yuikĩ: “Hiwe ibu tibitũ txashuwã bene ano bestitxaiya isĩ tene hayama dasibi hawẽrua yura shũpĩ bishũ tesẽshũ

^22-23 kẽtxaki hawẽ himi kesũkĩ mata washũ ni pei meske meske ashũ neakĩ bushukuatã himi pukutãtãkĩ hanu hikiti shui beputi hi istabĩ dabe inũ hawẽ makishkũki himiwẽ pushakĩ hau keyushanũbũwẽ. Egito nawabu kupikatsi iki hawẽ nai tsumabe Senhor Deus hukĩ hawẽ beputi hi istabĩ dabe inũ hawẽ makishkũki himiwẽ mã pushabu uĩkĩ hau matũ huni bake iyuabu tenãyamashanũ hatũ debuwanika nai tsuma nemai matũ hiwe tibi manaũri daĩbaĩshanaiwẽ taea penariama matũ hiwe anua kaĩyamayushãkãwẽ.

²⁴ Matu inũ matũ bakebu inũ matũ bababu pahairakĩ na yunuti hãtxa ikibi ini shinãkĩ Senhor Deus kẽwaĩ mã besikũkaĩshanaii, bari tibi hakimamarã.

²⁵ Haska matũ shenipabu yubani ha maiwã pepa Senhor Deusũ matu inãkĩ ibu wamashanai anu mã hikia na matũ huni bake iyua tenãma dũkeakeakebaini hawẽ shinãmati besi hau hakimayamashanũbũwẽ, bari tibi shinãkubainirã.

²⁶ Bari tibi hanu hawẽ hikiti shui beputi hi istabĩ dabe inũ hawẽ makishkũki txashuwã himiwẽ mã pusha keyuaya matũ bakebũ matu yukakĩ: ‘Hawa yuiamẽ, himiwẽ mã hi pushairã?’ matu wabu

²⁷ eska hatu yuiwe: ‘Egito nawabu kupikĩ hatũ huni bake iyuabu Senhor Deusũ hatu tenãkĩ Israelĩ bababũ hiwe tibi dũkeakeakebaĩkĩ nukũ shenipabu meribi waniwẽ taeshũ himiwẽ pushakĩ nukũ mekenika yushĩ Senhor Deus nũ kẽwãmiski’, akĩ na habias hãtxa ẽ matu yuishu matunabu yuiritãkãwẽ”, akĩ Moisĩ hatu yuia bushũ hatunabu itxawashũ shanẽ ibu tibitũ hatu yui keyuabu nĩkatã Israelĩ enabu dasibi Senhor Deus kẽwanũ ika beui beti iki keyushũ kẽwãtã

²⁸ hanushũ haska hau hawara anũbũ Senhor Deusũ Moisés inũ Arão yuishu tapĩkĩ unãtã akaibũ

Egito nawabũ huni bake iyuabu mawanibukiaki, na hãtxarã

²⁹ habiatiãri bebũkiri haska yuia hukĩ yamenapũ Egito nawabũ hiwe tibi anushũ hatũ huni bake iyua tibi Senhor Deusũ hatu tenã akeakebaunaya Faraó shanẽ ibũ huni bake iyua hawẽ shãtukũ shanẽ ibutiru ha dukũ mawai taeaya hanua huni bitxiti hiwe meranuatũri bake iyuabu tibi mawai keyuriaibũ hatũ inabu bene ha dukũ kaiã mawai keyurianibuki.

³⁰ Haskaibũ meshu merã Faraó inũ hawẽ merabewanika shanẽ ibubu dasibibu inũ Egito nawabu dasibi bestẽtã butubaũ hiwe tibi anua mawaibuwẽ taea bis bis iki keyubauni kasha txakayamaibũ

³¹ hawaira habias meshu merã Moisés inũ Arão hau itanũbũ, Faraónẽ hatu yunua bushũ hatu iweabu Faraónẽ hatu yuikĩ: —Matu inũ matunabu bui keyui ikis enabu heneribaĩkãwẽ. Haska mã yuishina matũ mekenika yushĩ Senhor Deus kẽwaĩ burikãwẽ.

³² Haska mã akatsis ishiã matũ txashuwã inũ matũ ina awa dasibi iyui burikãwẽ. Bushũ matũ mekenika yushĩ kẽwãkĩ ea dikabi yukashũkãwẽ— akĩ huĩti nishma punu nukashũ hatu nitxiã

³³ Israelĩ enabu dasibi hau hawaira bunũbũ hatuwẽ datekĩ shinaĩ: “Hatuwẽ taea nukuri nũ mawatirumẽkaĩ”, iki yuinamekĩ hatũ mai hirabi anushũ Egito nawabu dasibibu hatu nitxĩbaunaibũ

³⁴ ma bukatsi hatũ mabu pewakĩ hatũ misi shashariama kẽtxa merã tariwẽ yabutã

³⁵ haska Moisĩ yunushina hatũ ouro mabu inũ, hatũ prata mabu inũ, haya besiti tari Egito nawabu hatu ea amabaũshina

³⁶ Senhor Deusũ Egito nawabu hatu mesewashunaya hamapai sharabu ea ikaibu Egito nawabũ hawaira hatu inã inã abaunaibũ hatũ mabu dasibi bukĩ Israelĩ enabũ Egito nawabu hatu nuitapahairawanibukiaki.

Israelĩ enabu Egito anua pashanibukiaki, na hãtxarã

³⁷ Habia meshu merã Ramessés anua kaĩkaĩkĩ henebaini Sucotekiri Israelĩ enabu bui aĩbuaibu inũ hatũ bakebu tanama 600.000 huni ewabu huĩti kushi detenametirubu hawenabube maĩ bukĩ

³⁸ hatũ inabu itxapahaira iyuaibũ nawa betsa betsapa Egito nawabũ hatu atxiniburi hatube pashariaibũ

³⁹ Egito nawabũ hatu hawaira nitxiaĩbũ haska washũ piti pewatima pashai bukĩ misi wakĩ sapa washũ tsuitiki bawashũ pikubainibukiaki.

^40-41 Egito mai pakea anu 430 ano Israelĩ enabu pai hiwekubirani hati ano ma keyukẽ Egito mai pakea anua kaĩbaini Israelĩ enabu shanẽ ibu kushipabu tibi hawenabube pashakĩ Senhor Deusũ hãtxa ikũwãkĩ Moisés txibãbainibukiaki.

⁴² Hamebi hiwemis Senhor Deus kẽwãkĩ ha meshu merã nukũ shenipabu kaĩmabaĩkĩ hatu iyuni ha Páscoatiã mã shinãkubaĩshanaii. Egito mai pakeanua Senhor Deusũ hatu iyuniwẽ taeshũ ano tibi habias ushe inũ habias dia shinãkĩ Israelĩ enabu pahairai hiwekubaĩkĩ Senhor Deus kẽwaĩ hau besikubaĩshanũbũwẽ, hakimamarã.