Psalms 60 - Die Bybel 2020-vertaling

¹ Vir die •musiekleier. Op “Narsing van getuienis”. 'n Miktaam. Van Dawid. Om te onderrig.

² Toe hy geveg het teen Aram-Naharajim en Aram-Soba, en Joab teruggekeer en twaalfduisend Edomiete in die Soutvallei verslaan het.

³ O God, U het ons verstoot, ons uitmekaar geslaan. U was toornig. Herstel ons!

⁴ U het die land geskud, dit oopgekloof. Maak sy breuke heel, want dit wankel.

⁵ U het u volk moeilike tye laat beleef; U het ons wyn laat drink wat ons laat steier.

⁶ U het aan hulle wat vir U ontsag het, 'n banier gegee waaronder hulle byeen kan kom, weg van die boogskutters. •Sela

⁷ Sodat u geliefdes gered kan word – verlos tog met u regterhand en antwoord ons!

⁸ God self het in sy heiligdom verklaar: “Ek wil jubel, Ek wil Sigem verdeel, die vallei van Sukkot gaan Ek afmeet.

⁹ Aan My behoort Gilead, aan My Manasse; Efraim is 'n beskutting vir my kop, Juda is my heerserstaf.

¹⁰ Moab is my waskom, op Edom gooi Ek my sandaal; oor My moet jy juig, Filistea.”

¹¹ Wie sal my bring na 'n versterkte stad? Wie sal my lei tot by Edom?

¹² Is dit nie U, o God, wat ons verstoot het nie? U, o God, trek nie meer saam met ons leërs uit nie.

¹³ Kom ons te hulp teen teenstanders – die hulp van mense is nutteloos.

¹⁴ Met God tree ons dapper op – Hý sal ons teenstanders vertrap.