Psalms 6 - Die Bybel 2020-vertaling

¹ Vir die •musiekleier. Met snarespel. Op “Die agtste”. 'n Psalm. Van Dawid.

² Here, moet my in u toorn nie teregwys en my in u woede nie bestraf nie.

³ Wees my genadig, Here, want ek, ek kwyn weg; genees my, Here, want tot in my gebeente is ek beangs,

⁴ ja, tot in my siel is ek heeltemal vreesbevange. Ag, Here, hoe lank nog?

⁵ Keer terug, Here, red my lewe; verlos my op grond van u troue liefde!

⁶ Waarlik, in die dood kan u gevierde Naam nie aangeroep word nie. Wie kan U in die •doderyk prys?

⁷ Ek is moeg van my gesug, elke nag deurdrenk ek my bed, deurweek ek my slaapbank met trane.

⁸ My oë is dik geswel van verdriet, vermoeid van al my teenstanders.

⁹ Gee pad van my af, julle almal wat onreg pleeg, want die Here het gehoor hoe hard ek huil.

¹⁰ Die Here het my smeking gehoor; die Here aanvaar my gebed.

¹¹ Al my vyande staan beskaamd, hulle is heeltemal vreesbevange. Binne 'n oogwink draai hulle vernederd weg.