Psalms 56 - Die Bybel 2020-vertaling

¹ Vir die •musiekleier. Op “Die duif van die veraf •terebinte”. Van Dawid. 'n Miktaam. Toe die Filistyne hom in Gat gevang het.

² Wees my genadig, o God, want mense treiter my; die hele dag teister veglustige mense my.

³ My teenstanders treiter my die hele dag, ja, baie veg teen my uit die hoogte.

⁴ Die dag wanneer ek bang is, vertrou ek op U.

⁵ Op God – ek loof sy woord – op God vertrou ek. Ek sal nie bang wees nie; wat kan vlees en bloed aan my doen?

⁶ Die hele dag verdraai hulle my woorde; teen my is al hulle kwaadwillige planne gerig.

⁷ Hulle val my gedurig aan; hulle lê en wag. Hulle hou my spore dop terwyl hulle my lewe soek.

⁸ Sal hulle, ondanks die onreg, vrykom? Werp mense neer in toorn, o God!

⁹ U het self my lotgevalle opgeteken. Hou tog my trane in u leersak. Staan dit nie in u •boekrol nie?

¹⁰ Dan sal my vyande terugdeins op die dag wanneer ek roep. Dit weet ek: God is vir my.

¹¹ Op God – ek loof sy woord – op die Here – ek loof sy woord –

¹² ja, op God vertrou ek. Ek is nie bang nie, wat kan 'n mens aan my doen?

¹³ Op my, o God, rus die geloftes aan U. Ek sal dit nakom met •dankoffers aan U,

¹⁴ want U het my lewe uit die dood weggeruk. Het U dan nie my voete van struikeling bewaar, sodat ek voor God kan leef in die lig van die lewe nie?