Psalms 21 - Die Bybel 2020-vertaling

¹ Vir die •musiekleier. 'n Psalm. Van Dawid.

² Here, die koning is bly oor u beskerming; hoe uitbundig juig hy oor u verlossing.

³ Wat sy hart begeer, het U vir hom gegee en wat sy lippe verlang, het U hom nie geweier nie. •Sela

⁴ Ja, U tree hom tegemoet met goeie seëninge; U sit 'n kroon van fyngoud op sy kop.

⁵ Lewe het hy van U gevra en U het dit aan hom gegee, 'n lang leeftyd, vir altyd en ewig.

⁶ Hy geniet hoë aansien deur die verlossing wat U bring; luister en majesteit verleen U aan hom.

⁷ Ja, U oorlaai hom vir altyd met seëninge. U maak hom baie bly met u teenwoordigheid.

⁸ Omdat die koning vertrou op die Here, op die troue liefde van die Allerhoogste, sal hy nie wankel nie.

⁹ U hand sal al u vyande vind. U regterhand sal dié vind wat u haat.

¹⁰ U maak van hulle 'n vurige oond wanneer u verskyn. Die Here sal hulle in sy toorn verslind en vuur sal hulle verteer.

¹¹ Hulle vrug sal u uit die land laat verdwyn en hulle nageslag onder die mense.

¹² Wanneer hulle boosheid bedink teen u, 'n komplot smee, sal hulle nie slaag nie;

¹³ want u sal hulle op die vlug laat slaan wanneer u op hulle aanlê met 'n gespande boog.

¹⁴ Verhef U, Here, in u krag! Ons wil sing, u mag wil ons besing.