Psalms 136 - Die Bybel 2020-vertaling

¹ Prys die Here, want Hy is goed – want vir ewig duur sy troue liefde.

² Prys die God van die gode – want vir ewig duur sy troue liefde.

³ Prys die Heer van die here – want vir ewig duur sy troue liefde.

⁴ Prys Hom wat groot wonders doen, Hom alleen – want vir ewig duur sy troue liefde –

⁵ wat met insig die hemel gemaak het – want vir ewig duur sy troue liefde –

⁶ wat die aarde oor die waters uitgespan het – want vir ewig duur sy troue liefde –

⁷ wat die groot ligte gemaak het – want vir ewig duur sy troue liefde –

⁸ die son om te heers in die dag – want vir ewig duur sy troue liefde –

⁹ die maan en sterre om te heers in die nag – want vir ewig duur sy troue liefde.

¹⁰ Prys Hom wat Egipte getref het deur hulle •eersgeborenes – want vir ewig duur sy troue liefde –

¹¹ en Israel uit hulle midde laat wegtrek het – want vir ewig duur sy troue liefde –

¹² met 'n sterk hand en uitgestrekte arm – want vir ewig duur sy troue liefde.

¹³ Prys Hom wat die Rietsee in twee gesny het – want vir ewig duur sy troue liefde –

¹⁴ en Israel in die middel laat deurtrek het – want vir ewig duur sy troue liefde –

¹⁵ maar die farao en sy leër in die Rietsee afgeskud het – want vir ewig duur sy troue liefde.

¹⁶ Prys Hom wat sy volk deur die woestyn laat gaan het – want vir ewig duur sy troue liefde –

¹⁷ groot konings verslaan het – want vir ewig duur sy troue liefde –

¹⁸ magtige konings om die lewe gebring het – want vir ewig duur sy troue liefde –

¹⁹ Sihon, die koning van die Amoriete – want vir ewig duur sy troue liefde –

²⁰ en Og, die koning van Basan – want vir ewig duur sy troue liefde.

²¹ Hy het hulle land as erfdeel gegee – want vir ewig duur sy troue liefde –

²² as erfdeel aan Israel sy dienskneg – want vir ewig duur sy troue liefde –

²³ Hy wat in ons vernedering aan ons gedink het – want vir ewig duur sy troue liefde –

²⁴ en ons van ons teenstanders weggeruk het – want vir ewig duur sy troue liefde –

²⁵ Hy wat kos gee aan alles wat leef – want vir ewig duur sy troue liefde.

²⁶ Prys die God van die hemel – want vir ewig duur sy troue liefde!