ရှောလမုန်မင်းကြီးက ဟုရံမင်းကြီးထံစာပို့ခြင်း1 ရှောလမုန်မင်းကြီးသည် ထာဝရဘုရား၏နာမတော်တည်ရာအိမ်တော်နှင့် မိမိနိုင်ငံတော်အတွက် နန်းတော်ကိုတည်ဆောက်ရန် ရည်ရွယ်၏။ 2 ရှောလမုန်မင်းကြီးသည် အထမ်းသမား အယောက်ခုနစ်သောင်း၊ တောင်ပေါ်မှကျောက်ဆစ်သမား အယောက်ရှစ်သောင်းနှင့် သူတို့ကိုကြီးကြပ်ကွပ်ကဲရသူ အယောက်သုံးထောင့်ခြောက်ရာတို့ကို ခွဲခန့်ထား၏။ 3 ထို့ပြင် ရှောလမုန်မင်းကြီးသည် တိုင်ရာဘုရင်ဟုရံမင်းကြီးထံသို့ တမန်ကိုစေလွှတ်၍ “အကျွန်ုပ်၏ခမည်းတော် ဒါဝိဒ်မင်းကြီးအား သူစံမြန်းရာနန်းတော်ကိုဆောက်လုပ်ရန်အတွက် သစ်ကတိုးသားများကို အရှင်မင်းကြီးပို့ပေးခဲ့သည့်နည်းတူ အကျွန်ုပ်ထံသို့လည်း ပို့ပေးပါလော့။ 4 အစ္စရေးလူမျိုးတို့ အစဉ်အမြဲပြုရန် ပြဋ္ဌာန်းထားသည်နှင့်အညီ အကျွန်ုပ်သည် ဘုရားသခင်ထာဝရဘုရားရှေ့တော်၌ အမွှေးနံ့သာကို မီးရှို့ပူဇော်ရန်အတွက်၊ ရှေ့တော်မုန့်ကိုလည်း ပုံမှန်တင်လှူပူဇော်ရန်နှင့် နံနက်ချိန်၊ နေဝင်ချိန်၊ ဥပုသ်နေ့များ၊ လဆန်းနေ့များ၊ အကျွန်ုပ်တို့၏ဘုရားသခင်ထာဝရဘုရားသတ်မှတ်ထားသောပွဲတော်နေ့များတွင် မီးရှို့ရာယဇ်ကို ပူဇော်ရန်အတွက် အကျွန်ုပ်၏ဘုရားသခင်ထာဝရဘုရား၏နာမတော်တည်ရာအိမ်တော်ကို ဆောက်လုပ်ဆက်ကပ်မည်။ 5 အကျွန်ုပ်တို့၏ဘုရားသခင်သည် ဘုရားတကာတို့ထက်ကြီးမြတ်သောဘုရား ဖြစ်တော်မူသောကြောင့် အကျွန်ုပ်ဆောက်လုပ်ရမည့်အိမ်တော်သည်လည်း ကြီးမြတ်ရပါလိမ့်မည်။ 6 အမြင့်ဆုံးသောကောင်းကင်ကြီးပင် ကိုယ်တော်နှင့်မဆံ့နိုင်လျှင် မည်သူသည် ကိုယ်တော့်အဖို့ အိမ်တော်ကို ဆောက်လုပ်နိုင်ပါမည်နည်း။ ရှေ့တော်၌ နံ့သာပေါင်းမီးရှို့ပူဇော်ရန်မှတစ်ပါး ကိုယ်တော့်အဖို့ အိမ်တော်ကို တည်ဆောက်ပေးမည့်အကြောင်း အကျွန်ုပ်ကား မည်သူဖြစ်ပါသနည်း။ 7 ထို့ကြောင့် ရွှေထည်၊ ငွေထည်၊ ကြေးထည်၊ သံထည်တို့ကို သွန်းလုပ်တတ်သူ၊ ခရမ်းရောင်၊ ကြက်သွေးရောင်၊ အပြာရောင်ရှိသောချည်တို့ကို ရက်လုပ်တတ်သူ၊ ကမ္ပည်းစာရေးထိုးရာ၌ ကျွမ်းကျင်သူတစ်ဦးကို အကျွန်ုပ်ထံ စေလွှတ်ပေးပါ။ သူ့ကို ယုဒပြည်၊ ဂျေရုဆလင်မြို့ရှိ အကျွန်ုပ်၏ခမည်းတော်ပြင်ဆင်ပေးထားသော လက်မှုပညာသည်တို့နှင့်အတူ အလုပ်လုပ်စေမည်။ 8 ထို့အတူ လက်ဘနွန်တောင်မှ သစ်ကတိုးသားများ၊ ထင်းရှူးသားများ၊ စန္ဒကူးသားများကိုလည်း ပို့ပေးပါ။ မင်းကြီး၏အမှုထမ်းတို့သည် လက်ဘနွန်သစ်များကို ခုတ်ထွင်ရာ၌ ကျွမ်းကျင်ကြောင်း အကျွန်ုပ်သိပါ၏။ အကျွန်ုပ်၏အမှုထမ်းတို့ကို မင်းကြီး၏အမှုထမ်းတို့နှင့်အတူ အလုပ်လုပ်စေမည်။ 9 အကျွန်ုပ်တည်ဆောက်ရမည့်အိမ်တော်သည် အလွန်ကြီးကျယ်ခမ်းနားသောကြောင့် သစ်သားအမြောက်အမြားလိုပါ၏။ 10 မင်းကြီး၏အမှုထမ်း သစ်ခုတ်သမားများ သစ်ခုတ်ပေးသည့်အဖိုးအခအဖြစ် ကြိတ်ပြီးသားဂျုံဆန် ကောရနှစ်သောင်း၊ မုယောဆန် ကောရနှစ်သောင်း၊ စပျစ်ဝိုင် ဗတ်နှစ်သောင်း၊ သံလွင်ဆီ ဗတ်နှစ်သောင်း ပေးပါမည်”ဟု မှာလိုက်၏။ ဟုရံမင်းကြီး၏ပြန်စာ11 တိုင်ရာဘုရင်ဟုရံမင်းကြီးကလည်း ရှောလမုန်မင်းကြီးထံ စာပြန်လိုက်သည်မှာ “ထာဝရဘုရားသည် မိမိလူမျိုးတော်ကိုချစ်မြတ်နိုး၍ အရှင်မင်းကြီးကို သူတို့၏ဘုရင်အဖြစ် ခန့်ထားတော်မူပြီ။ 12 ထာဝရဘုရားအဖို့ အိမ်တော်နှင့် သူ၏နိုင်ငံတော်အဖို့ နန်းတော်ကို တည်ဆောက်ရန် သိနားလည်နိုင်စွမ်းရှိ၍ ဉာဏ်ပညာနှင့်ပြည့်စုံပြီး ပညာရှိသောသားတော်တစ်ပါးကို ဒါဝိဒ်မင်းကြီးအား ပေးတော်မူသော ကောင်းကင်နှင့်မြေကြီးကိုဖန်ဆင်းတော်မူသည့် အစ္စရေးလူမျိုး၏ဘုရားသခင်ထာဝရဘုရားသည် မင်္ဂလာရှိပါစေသော။ 13 ယခုမှာ အသိဉာဏ်ကြွယ်ဝသောလက်မှုပညာသည် ဟုရံအဘိကို စေလွှတ်လိုက်ပါ၏။ 14 သူ့မိခင်မှာ ဒန်အမျိုးသမီး၊ သူ့ဖခင်မှာ တိုင်ရာမြို့သားဖြစ်၏။ သူသည် ရွှေငွေ၊ ကြေးနီ၊ သံတို့ကို သွန်းလုပ်သောအတတ်၊ ကျောက်ဆစ်အတတ်၊ သစ်ထွင်းထုသောအတတ်၊ ခရမ်းရောင်အထည်၊ အပြာရောင်အထည်၊ ပိတ်ချောထည်၊ ကြက်သွေးရောင်အထည်တို့ကို ရက်လုပ်သောအတတ်၊ ကမ္ပည်းစာအမျိုးမျိုးရေးထိုးသောအတတ် စသည်တို့မှစ၍ အနုပညာလက်ရာအမျိုးမျိုးတို့ကို ကျွမ်းကျင်စွာလုပ်ဆောင်ပေးနိုင်သူဖြစ်၏။ သူသည် မင်းကြီး၏လက်မှုပညာသည်များ၊ မင်းကြီး၏ခမည်းတော် အကျွန်ုပ်၏သခင်ဒါဝိဒ်မင်းကြီး၏လက်မှုပညာသည်များနှင့်အတူ အလုပ်လုပ်လိမ့်မည်။ 15 မင်းကြီးကတိပေးထားသည့်အတိုင်း ဂျုံဆန်၊ မုယောဆန်၊ သံလွင်ဆီ၊ စပျစ်ဝိုင်တို့ကို အမှုထမ်းတို့အတွက် ပေးပို့တော်မူပါ။ 16 အကျွန်ုပ်တို့သည် မင်းကြီးအလိုရှိသမျှ လက်ဘနွန်တောင်မှသစ်တို့ကိုခုတ်ပြီး ယုပ္ပေမြို့အထိ ပင်လယ်လမ်းအတိုင်း ဖောင်ဖွဲ့၍ပို့လိုက်မည်။ ထိုနေရာမှ ဂျေရုဆလင်မြို့သို့ မင်းကြီးပြန်သယ်ယူပါ”ဟူ၍ ဖြစ်၏။ ရှောလမုန်မင်းကြီးကြိုးစားအားထုတ်မှု17 ထိုအခါ ရှောလမုန်မင်းကြီးသည် ခမည်းတော်ဒါဝိဒ်မင်းကြီးကောက်ယူခဲ့သော အစ္စရေးပြည်ရှိတိုင်းတစ်ပါးသားစာရင်းကို ပြန်၍စာရင်းကောက်ယူရာ လူပေါင်း တစ်သိန်းငါးသောင်းသုံးထောင့်ခြောက်ရာရှိ၏။ 18 ထိုသူတို့ထဲမှ အထမ်းသမား အယောက်ခုနစ်သောင်း၊ တောင်ပေါ်မှ ကျောက်ဆစ်သမား အယောက်ရှစ်သောင်းနှင့် အလုပ်လုပ်သူတို့ကိုကြီးကြပ်ကွပ်ကဲသူ အယောက်သုံးထောင့်ခြောက်ရာတို့ကို ခန့်ထား၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative