မဿဲ 1 - ခေတ်သစ်​မြန်မာ သမ္မာကျမ်း ခေတ်သစ်​မြန်မာ သမ္မာကျမ်း
မဿဲ 1

¹ အာဗြဟံ​နှင့် ဒါဝိဒ်မင်း​တို့​ထံမှ ဆင်းသက်တော်မူသော ယေရှု​ခရစ်တော်​၏​ဆွေစဉ်မျိုးဆက်​စာရင်း​မှာ အောက်ပါအတိုင်း​ဖြစ်၏။

² အာဗြဟံ​၏​သား​သည် ဣဇာက်​ဖြစ်၏။ ဣဇာက်​သား ယာကုပ်​ဖြစ်၏။ ယာကုပ်​၏​သားများ​မှာ ယုဒ​နှင့် ညီအစ်ကိုများ​ဖြစ်ကြ၏။

³ ယုဒ​နှင့် ဇနီး​တာမာ​တို့​၏ သားများ​မှာ ဖာရက်​နှင့်​ဇာရ​တို့ ဖြစ်ကြ၏။ ဖာရက်​သား ဟေဇရုံ​ဖြစ်၏။ ဟေဇရုံ​သား အာရံ​ဖြစ်၏။

⁴ အာရံ​သား အမိနဒပ်​ဖြစ်၏။ အမိနဒပ်​သား နာရှုန်​ဖြစ်၏။ နာရှုန်​သား စာလမုန်​ဖြစ်၏။

⁵ စာလမုန်​နှင့် ဇနီး​ရာခပ်​တို့​၏​သား ဗောဇ​ဖြစ်၏။ ဗောဇ​နှင့် ဇနီး​ရုသ​တို့​၏​သား သြဗက်​ဖြစ်၏။ သြဗက်​သား ယေရှဲ​ဖြစ်၏။

⁶ ယေရှဲ​သား ဒါဝိဒ်မင်း​ဖြစ်၏။ ဒါဝိဒ်မင်း​နှင့် ဥရိယ​၏​ဇနီး ဗာသရှေဘ​တို့​၏​သား ရှောလမုန်​ဖြစ်၏။

⁷ ရှောလမုန်​သား ရောဗောင်​ဖြစ်၏။ ရောဗောင်​သား အဘိယ​ဖြစ်၏။ အဘိယ​သား အာသ​ဖြစ်၏။

⁸ အာသ​သား ယောရှဖတ်​ဖြစ်၏။ ယောရှဖတ်​သား ယဟောရံ​ဖြစ်၏။ ယဟောရံ​သား သြဇိ​ဖြစ်၏။

⁹ သြဇိ​သား ယောသံ​ဖြစ်၏။ ယောသံ​သား အာခတ်​ဖြစ်၏။ အာခတ်​သား ဟေဇကိ​ဖြစ်၏။

¹⁰ ဟေဇကိ​သား မနာရှေ​ဖြစ်၏။ မနာရှေ​သား အာမုန်​ဖြစ်၏။ အာမုန်​သား ယောရှိ​ဖြစ်၏။

¹¹ ဘေဘီလုံပြည်​သို့ ဖမ်းဆီးခေါ်ဆောင်ခြင်း​ခံရချိန်​၌ ယောရှိ​၏​သားများ​သည် ယေခေါနိ​နှင့် ညီများ​ဖြစ်ကြ၏။

¹² ဘေဘီလုံမြို့​သို့ ဖမ်းဆီးခေါ်ဆောင်ခြင်း​ခံရ​ပြီးနောက် ယေခေါနိ​သား​သည် ရှာလသေလ​ဖြစ်၏။ ရှာလသေလ​သား ဇေရုဗဗေလ​ဖြစ်၏။

¹³ ဇေရုဗဗေလ​သား အဗျုဒ်​ဖြစ်၏။ အဗျုဒ်​သား ဧလျာကိမ်​ဖြစ်၏။ ဧလျာကိမ်​သား အာဇော်​ဖြစ်၏။

¹⁴ အာဇော်​သား ဇာဒုတ်​ဖြစ်၏။ ဇာဒုတ်​သား အာခိမ်​ဖြစ်၏။ အာခိမ်​သား ဧလုဒ်​ဖြစ်၏။

¹⁵ ဧလုဒ်​သား ဧလာဇာ​ဖြစ်၏။ ဧလာဇာ​သား မဿန်​ဖြစ်၏။ မဿန်​သား ယာကုပ်​ဖြစ်၏။

¹⁶ ယာကုပ်​၏​သား​သည် မာရိ​၏​ခင်ပွန်း ယောသပ်​ဖြစ်၏။ မာရိ​သည် ခရစ်တော်​ဟု ခေါ်သော ယေရှု​၏ မယ်တော်​ဖြစ်၏။

¹⁷ အထက်​တွင်​ဖော်ပြထားသော ဆွေစဉ်မျိုးဆက်များ​သည် အာဗြဟံ​မှ ဒါဝိဒ်မင်း​အထိ ဆယ့်လေးဆက်၊ ဒါဝိဒ်မင်း​မှ ဘေဘီလုံမြို့​သို့ ဖမ်းဆီးခေါ်ဆောင်ခြင်း​ခံရချိန်​အထိ ဆယ့်လေးဆက်၊ ထို​အချိန်​မှ ခရစ်တော်​အချိန်​အထိ ဆယ့်လေးဆက်​ဖြစ်၏။

¹⁸ ယေရှု​ခရစ်တော် မွေးဖွားလာတော်မူပုံ​မှာ ဤသို့​ဖြစ်၏။ မယ်တော်​မာရိ​နှင့် ယောသပ်​တို့​သည် လက်ထပ်​ရန် စေ့စပ်ထား၏။ သို့သော်လည်း လက်ထပ်​ပေါင်းသင်းခြင်း​မပြုမီ မာရိ​သည် သန့်ရှင်းသော​ဝိညာဉ်တော်​၏​တန်ခိုး​အားဖြင့် ကိုယ်ဝန်ဆောင်လေ၏။

¹⁹ ထိုအခါ ခင်ပွန်းလောင်း​ဖြစ်​သူ ယောသပ်​သည် သူတော်ကောင်း​ဖြစ်​၍ မာရိ​ကို အသရေ​မပျက်စေလို​သောကြောင့် စေ့စပ်ကြောင်းလမ်းခြင်း​ကို တိတ်တဆိတ်​ဖျက်သိမ်း​ရန် ဆုံးဖြတ်၏။

²⁰ ထိုသို့ တွေးတောဆင်ခြင်​နေစဉ် ထာဝရဘုရား​၏ ကောင်းကင်တမန်​တစ်ပါး​သည် ယောသပ်​ကို အိပ်မက်​တွင် ကိုယ်ထင်ပြ​၍ “ဒါဝိဒ်မင်း​၏​သား ယောသပ်… မာရိ​ကို သင်​၏​ဇနီးမယား​အဖြစ် လက်ထပ်ရမည့်​အမှု​အတွက် မတွန့်ဆုတ်နှင့်။ အဘယ်ကြောင့်ဆိုသော် သူ​၏ ကိုယ်ဝန်​သည် သန့်ရှင်းသော​ဝိညာဉ်တော်​၏ တန်ခိုး​ကြောင့် ဖြစ်၏။

²¹ သူ​သည် သားယောက်ျား​ကို မွေးဖွား​လိမ့်မည်။ ထို​သား​သည် မိမိ​လူမျိုးတို့​ကို သူတို့​၏ အပြစ်များ​မှ ကယ်တင်မည့်​သူ ဖြစ်​သောကြောင့် သူ့​ကို ယေရှု​ဟူ၍ မှည့်ခေါ်​ရမည်” ဟု ဆိုလေ၏။

²² ဤ​အရာ​အားလုံး​သည် ပရောဖက်​မှတစ်ဆင့် ထာဝရဘုရား​မိန့်တော်မူခဲ့သော ဗျာဒိတ်တော်​အတိုင်း ဖြစ်လာ​ရန်​ပင် ဖြစ်၏။

²³ ဗျာဒိတ်တော်​စကား​မှာ “အပျိုစင်​တစ်ဦး​သည် ကိုယ်ဝန်ဆောင်​၍ သား​ယောက်ျား​ကို မွေးဖွား​လိမ့်မည်။ ထို​သား​ကို ဧမာနွေလ​ဟု ခေါ်ဝေါ်ကြ​လိမ့်မည်” ဟူ၍ ဖြစ်၏။ ဧမာနွေလ​၏ အနက်အဓိပ္ပာယ်​မှာ “ကျွန်ုပ်တို့​နှင့်အတူ​ရှိတော်မူသော​ဘုရားသခင်” ဟူ၍ ဖြစ်၏။

²⁴ ယောသပ်​သည် အိပ်ပျော်ရာ​မှ နိုး​သောအခါ ထာဝရဘုရား​၏ ကောင်းကင်တမန် မှာထားသည့်​အတိုင်း မာရိ​ကို လက်ထပ်လေ၏။

²⁵ သို့သော်လည်း သား​မဖွားမီ​တိုင်အောင် မာရိ​နှင့် မဆက်ဆံဘဲ​နေ၏။ ထို​သား​၏ အမည်​ကို ယေရှု​ဟု မှည့်လေ၏။