ဗျာ​ဒိတ် 5 - ခေတ်သစ်​မြန်မာ သမ္မာကျမ်း ခေတ်သစ်​မြန်မာ သမ္မာကျမ်း
ဗျာ​ဒိတ် 5

¹ ထို့နောက် ရာဇပလ္လင်တော်​ပေါ်တွင် ထိုင်တော်မူသော​အရှင်​၏ လက်ယာ​လက်​ထဲတွင် စာလိပ်​ကို ကျွန်ုပ်​မြင်ရ၏။ ထို​စာလိပ်​အတွင်း​အပြင်​နှစ်ဖက်လုံး​၌ စာများ​ရေးထား​၍ တံဆိပ်​ခုနစ်ခု​ဖြင့် ခတ်နှိပ်ထား၏။

² ထိုအခါ တန်ခိုးကြီးသော ကောင်းကင်တမန်​တစ်ပါး​က “မည်သူ​သည် တံဆိပ်​ခုနစ်ခု​ကို ခွာ​ပြီး စာလိပ်​ကို ဖွင့်​ရန် ထိုက်တန်​သနည်း” ဟု ကျယ်လောင်​စွာ ကြွေးကြော်နေသည်​ကို ကျွန်ုပ်​မြင်ရ၏။

³ သို့သော် ကောင်းကင်​၌​ဖြစ်စေ၊ မြေကြီး​၌​ဖြစ်စေ၊ မြေကြီး​အောက်​၌​ဖြစ်စေ ထို​စာလိပ်​ကို ဖွင့်ကြည့်​ရန် မည်သူ​မျှ မတတ်စွမ်းနိုင်ပေ။

⁴ ထို​စာလိပ်​ကို ဖွင့်ကြည့်​ရန် ထိုက်တန်သူ​တစ်ဦး​တစ်ယောက်​မျှ​မရှိသည်​ကို ကျွန်ုပ်​မြင်ရ​သောကြောင့် ရှိုက်ကြီးတငင်​ငိုကြွေးမိ၏။

⁵ အကြီးအကဲ​တစ်ဦး​က “မငိုကြွေးနှင့်။ ယုဒ​အနွယ်​၏​ခြင်္သေ့၊ ဒါဝိဒ်​၏​အမြစ်​ဖြစ်သော အရှင်​သည် အောင်နိုင်ပြီ။ ထို​အရှင်​သည် တံဆိပ်​ခုနစ်ခု​ကို ခွာ​၍ စာလိပ်​ကို​ဖွင့်နိုင်သည်” ဟု ကျွန်ုပ်​အား ပြော၏။

⁶ ထို့နောက် အသေသတ်​ခံရပြီး​သကဲ့သို့​ဖြစ်သော သိုးသငယ်တော်​ကို ကျွန်ုပ်​မြင်ရ၏။ ထို​သိုးသငယ်​သည် ရာဇပလ္လင်တော်​နှင့် သတ္တဝါ​လေးပါး​တို့​၏​အလယ်​၌ ရှိပြီး အကြီးအကဲ​တို့​က ဝန်းရံထား၏။ ထို​သိုးသငယ်တော်​၌ ချို​ခုနစ်ချောင်း​နှင့် မျက်လုံး​ခုနစ်လုံး​ရှိ၏။ ထို​မျက်လုံးတို့​သည် ကမ္ဘာမြေ​တစ်ခွင်လုံး​သို့ စေလွှတ်ခံရသော ဘုရားသခင်​၏ ဝိညာဉ်​ခုနစ်ပါး​ဖြစ်၏။

⁷ သိုးသငယ်တော်​သည် ရာဇ​ပလ္လင်တော်​ပေါ်တွင် ထိုင်တော်မူသော​အရှင်​၏ လက်ယာလက်​မှ စာလိပ်​ကို သွား​၍ ယူလေ၏။

⁸ သိုးသငယ်တော်​သည် စာလိပ်​ကို ယူ​သောအခါ သတ္တဝါ​လေးပါး​နှင့် အကြီးအကဲ​နှစ်ဆယ့်လေးပါး​တို့​သည် သိုးသငယ်တော်​ရှေ့​၌ ဝပ်တွားခယကြ၏။ သူတို့​တစ်ဦးစီ​သည် စောင်း​ကို​လည်းကောင်း၊ အမွှေးနံ့သာ​နှင့်​ပြည့်သော ရွှေဖလား​ကို​လည်းကောင်း ကိုင်ဆောင်ထားကြ၏။ ထို​ရွှေဖလား​၌​ရှိသော အမွှေးနံ့သာများ​သည် သန့်ရှင်းသူတို့​၏ ဆုတောင်းချက်များ​ကို ကိုယ်စားပြု၏။

⁹ သူတို့​သည် သီချင်းသစ်​တစ်ပုဒ်​ကို သီဆိုကြ၏။ ထို​သီချင်း​မှာ “ကိုယ်တော်​သည် စာလိပ်​ကို​ယူ​၍ တံဆိပ်​ကို​ခွာ​၍ ဖွင့်​ရန် ထိုက်တန်သော​အရှင်​ဖြစ်၏။ အဘယ်ကြောင့်ဆိုသော် ကိုယ်တော်​သည် အသေ​သတ်ခံရ​၍ မျိုးနွယ်စု​အသီးသီး၊ ဘာသာစကား​အသီးသီး​ပြောသည့်​သူများ၊ လူမျိုး​အသီးသီး​နှင့် တိုင်းနိုင်ငံ​အသီးသီးတို့​ကို ကိုယ်တော်​၏​အသွေးတော်​ဖြင့် ဘုရားသခင်​အတွက် ရွေးနုတ်​ကယ်တင်​သောကြောင့်​ဖြစ်၏။

¹⁰ ကိုယ်တော်​သည် ထို​သူတို့​အား ဘုရားသခင်​၏​လူမျိုးတော်​နှင့် ယဇ်ပုရောဟိတ်များ​ဖြစ်စေတော်မူ၏။ ထို​သူတို့​သည် ကမ္ဘာလောက​ကို အုပ်စိုးကြ​လိမ့်မည်” ဟူ၍ ဖြစ်၏။

¹¹ ထို့နောက် ကျွန်ုပ်​ကြည့်လိုက်​ရာ သိန်းသန်းကုဋေ​မက အတိုင်းမသိ​များပြားသော​ကောင်းကင်တမန်တို့​၏ ကြွေးကြော်သံ​ကို ကြားရ၏။ သူတို့​သည် ရာဇပလ္လင်တော်၊ သတ္တဝါ​လေးပါး​နှင့် အကြီးအကဲတို့​ကို ဝန်းရံထားကြ၏။

¹² ထို​သူတို့​က “အသေသတ်​ခံရသော​သိုးသငယ်တော်​သည် တန်ခိုး၊ စည်းစိမ်၊ ဉာဏ်ပညာ၊ အစွမ်းသတ္တိ၊ ဂုဏ်အသရေ၊ ဘုန်းအသရေ​နှင့် ချီးမွမ်းခြင်းတို့​ကို ခံယူ​ရန် ထိုက်တန်၏” ဟု ကျယ်လောင်​စွာ ကြွေးကြော်ကြ၏။

¹³ ထို့ပြင် ကောင်းကင်၊ မြေကြီး၊ မြေကြီး​အောက်၊ ပင်လယ်​ထဲ​စသည့် နေရာ​အသီးသီး​၌ ရှိကြသော ဖန်ဆင်းခံ​သတ္တဝါ​အပေါင်းတို့​က “ရာဇ​ပလ္လင်တော်​ပေါ်တွင် ထိုင်တော်မူသော​အရှင်​နှင့် သိုးသငယ်တော်​သည် အစဉ်​ထာဝရ ချီးမွမ်းခြင်း​ကို ခံစား​၍ ဂုဏ်အသရေ၊ ဘုန်းအသရေ၊ ဘုန်းတန်ခိုးတို့​နှင့် အစဉ်​ထာဝရ တည်ရှိပါစေသော” ဟု ကြွေးကြော်ကြသည်​ကို ကျွန်ုပ်​ကြားရ၏။

¹⁴ ထိုအခါ သတ္တဝါ​လေးပါး​က “အာမင်” ဟု​ဆိုကြ၏။ အကြီးအကဲတို့​သည်​လည်း ဘုရားသခင်​နှင့် သိုးသငယ်တော်​ကို ဝပ်တွားခယ​လျက် ကိုးကွယ်ကြ၏။