အွန်လိုင်း သမ္မာကျမ်းစာ

ကြော်ငြာတွေ

သမ္မာကျမ်းစာတစ်အုပ်လုံး ဓမ္မဟောင်း ဓမ္မသစ်


ဗျာ​ဒိတ် 12 - ခေတ်သစ်​မြန်မာ သမ္မာကျမ်း ခေတ်သစ်​မြန်မာ သမ္မာကျမ်း
ဗျာ​ဒိတ် 12

အမျိုးသမီး​နှင့် နဂါးကြီး

1 ထို့နောက် ကောင်းကင်​၌ နိမိတ်​လက္ခဏာ​ကြီး​တစ်ခု​ကို မြင်ရ၏။ အမျိုးသမီး​တစ်ဦး​သည် နေ​ကို ဝတ်ဆင်​၍ လ​ပေါ်တွင် ခြေ​ကို​တင်​ကာ ခေါင်း​ပေါ်၌ ကြယ်​ဆယ့်နှစ်လုံး​ပါသည့် သရဖူ​ကို ဆောင်းထား၏။

2 ထို​အမျိုးသမီး​သည် ကိုယ်ဝန်ဆောင်​ဖြစ်ပြီး မီးဖွား​တော့မည့် ဝေဒနာ​ကြောင့် အော်ဟစ်​နေ၏။

3 ထို့နောက် ကောင်းကင်​၌ အခြား​နိမိတ်​လက္ခဏာ​တစ်ခု​ကို မြင်ရပြန်၏။ ခေါင်း​ခုနစ်လုံး၊ ဦးချို​ဆယ်ချောင်း ပါရှိသော အနီရောင်​နဂါးကြီး​တစ်ကောင်​သည် ခေါင်းများ​ပေါ်တွင် သရဖူ​ခုနစ်ခု​ကို ဆောင်းထား၏။

4 သူ​၏ အမြီး​သည် ကောင်းကင်​မှ ကြယ်​သုံးပုံ​တစ်ပုံ​ကို ကမ္ဘာမြေ​ပေါ်သို့ ဆွဲချ​လိုက်၏။ ထို​နဂါး​သည် မီးဖွား​တော့မည့်​အမျိုးသမီး​၏ ရှေ့​တွင် ရပ်​လျက် မွေးဖွား​ပြီးသည်​နှင့် တစ်ပြိုင်နက် မွေးကင်းစ​သားငယ်​ကို ဝါးမျို​ရန် စောင့်နေ၏။

5 ထို​အမျိုးသမီး​သည် လူမျိုး​အပေါင်းတို့​ကို သံ​လှံတံ​ဖြင့် အုပ်စိုးမည့် သားယောက်ျား​ကို မွေးဖွား၏။ ထို​သားငယ်​သည် ဘုရားသခင်​ထံသို့​လည်းကောင်း၊ ကိုယ်တော်​၏ ရာဇပလ္လင်တော်​ပေါ်သို့​လည်းကောင်း ချီယူသွားခြင်း​ခံရ၏။

6 ထို​အမျိုးသမီး​သည် တောကန္တာရ​သို့ ထွက်ပြေးလေ၏။ ထို​အရပ်​တွင် သူ့​အား ရက်ပေါင်း တစ်ထောင့်​နှစ်ရာ​ခြောက်ဆယ်​အထိ ပြုစုစောင့်ရှောက်​နိုင်ရန် ဘုရားသခင်​ပြင်ဆင်ထားတော်မူသော နေရာ​တစ်ခု​ရှိ၏။

7 ထို့နောက် ကောင်းကင်​၌ စစ်​ဖြစ်လေ၏။ မိက္ခေလ​နှင့် သူ​၏ ကောင်းကင်တမန်တို့​သည် နဂါး​ကို တိုက်ကြ၏။ နဂါး​နှင့် သူ​၏ တမန်တို့​သည် ပြန်​၍ တိုက်​သော်လည်း

8 အရေးနိမ့်​သဖြင့် ကောင်းကင်​မှ နှင်ထုတ်ခံရ၏။

9 ထို​နဂါး​သည် တစ်ကမ္ဘာလုံး​ကို လှည့်ဖြားသည့် မာရ်နတ်၊ သို့မဟုတ် စာတန် ဟု​ခေါ်သော ရှေးမြွေဟောင်း​ဖြစ်ပြီး သူ​၏ တမန်များ​နှင့်အတူ ကမ္ဘာမြေ​ပေါ်သို့ ပစ်ချခံခဲ့ရ၏။

10 ထို့နောက် ကောင်းကင်​မှ ကျယ်လောင်သော​အသံ​ဖြင့် “ယခု​တွင် ငါတို့​ဘုရားသခင်​၏ ကယ်တင်ခြင်း၊ တန်ခိုးတော်၊ နိုင်ငံတော်​နှင့် ခရစ်တော်​၏ အခွင့်အာဏာ​တို့​သည် ပေါ်ထွန်းလာပြီ။ ငါတို့​ဘုရားသခင်​၏ ရှေ့တော်​၌​ပင် ငါတို့​၏​ညီအစ်ကို​မောင်နှမများ​ကို နေ့ရော​ညပါ စွပ်စွဲသူ​သည် ကမ္ဘာမြေ​ပေါ်သို့ ပစ်ချခံရပြီ။

11 ညီအစ်ကို​မောင်နှမတို့​သည် ထို​သူ​ကို သိုးသငယ်​၏ အသွေးတော်​ဖြင့်​လည်းကောင်း၊ မိမိတို့​သက်သေခံ​ဟောပြောသော​နှုတ်ကပတ်တော်​ဖြင့်​လည်းကောင်း အောင်နိုင်ခဲ့ကြ၏။ သူတို့​သည် အသေ​ခံရမည်​ဆိုလျှင်​ပင် မိမိတို့​၏​အသက်​ကို မနှမြောကြ။

12 ထို့ကြောင့် ကောင်းကင်ဘုံ​နှင့် ကောင်းကင်ဘုံ​၌ စံမြန်းသော​သူတို့… ရွှင်လန်း​ဝမ်းမြောက်ကြလော့။ သို့သော် ဤ​ကမ္ဘာ​မြေကြီး​နှင့် ပင်လယ်​တို့​သည် အမင်္ဂလာ​ရှိကြ၏။ အဘယ်ကြောင့်ဆိုသော် မာရ်နတ်​သည် မိမိ​၌ အချိန်​အနည်းငယ်​သာ ရှိကြောင်း​ကို သိ​၍ ဒေါသ​ကြီးစွာ သင်တို့​ထံသို့ ဆင်းလာ​သောကြောင့်​ဖြစ်၏” ဟု ပြောသည်​ကို ကျွန်ုပ်​ကြားရ၏။

13 ကမ္ဘာမြေ​ပေါ်သို့ မိမိ​ပစ်ချ​ခံရသည်​ကို နဂါး​သိမြင်​သောအခါ သားယောက်ျား​ကို မွေးဖွားခဲ့သော အမျိုးသမီး​ကို လိုက်​၍ ဖမ်းလေ၏။

14 သို့သော် ထို​အမျိုးသမီး​သည် တောကန္တာရ​၌ မိမိ​အတွက် ပြင်ဆင်ထားသော​နေရာ​သို့ ပျံသန်း​နိုင်ရန် ဘုရားသခင်​က သူ့​အား လင်းယုန်​အတောင်ပံ​တစ်စုံ​ကို ပေးအပ်တော်မူ၏။ သူ​သည် နဂါး​ဘေးရန်​မှ လွှတ်​၍ ထို​အရပ်​၌ သုံးနှစ်ခွဲ​တိုင်အောင် ပြုစု​စောင့်ရှောက်ခြင်း​ကို ခံရ၏။

15 ထို့နောက် နဂါး​သည် အမျိုးသမီး​ကို ရေ​၌ မျောပါသွား​စေရန် အမျိုးသမီး​နောက်သို့ သူ​၏ ခံတွင်း​မှ ရေ​ကို မြစ်ရေစီး​သကဲ့သို့​မှုတ်ထုတ်လိုက်၏။

16 သို့သော် မြေကြီး​သည် ထို​အမျိုးသမီး​ကို ကူညီ​၍ မိမိ​ခံတွင်း​ကို ဖွင့်​လျက် နဂါး​၏​ခံတွင်း​မှ မှုတ်ထုတ်သော​မြစ်ရေ​ကို မျိုလိုက်၏။

17 ထိုအခါ နဂါး​သည် အမျိုးသမီး​အပေါ် ဒေါသထွက်​သဖြင့် ကျန်ရှိနေသေးသော ထို​အမျိုးသမီး​၏ မျိုးဆက်များ​ကို တိုက်​ရန် ထွက်ခွာသွား၏။ ထို​မျိုးဆက်များ​သည် ဘုရားသခင်​၏ ပညတ်တော်တို့​ကို လိုက်နာသူများ၊ ယေရှု​အကြောင်း​သက်သေခံချက်​တို့​ကို သစ္စာရှိ​စွာ ထိန်းသိမ်းသူများ​ဖြစ်ကြ၏။

18 ထို့နောက် နဂါး​သည် ပင်လယ်​ကမ်းစပ်​၌ ရပ်နေလေ၏။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.