Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ဗျာ​ဒိတ် 13 - ခေတ်သစ်​မြန်မာ သမ္မာကျမ်း


ပင်လယ်ထဲ​မှ တက်လာသည့်​သားရဲ

1 ထို့နောက် သားရဲ​တစ်ကောင် ပင်လယ်ထဲ​မှ တက်လာသည်​ကို ကျွန်ုပ်​မြင်ရ၏။ ထို​သားရဲ​၌ ခေါင်း​ခုနစ်လုံး​နှင့် ဦးချို​ဆယ်ချောင်း ပါရှိ​ပြီး ထို​ဦးချိုများ​တွင် သရဖူ​ဆယ်ခု​ရှိ၏။ ခေါင်း​တစ်လုံးစီ​အပေါ်​၌ ဘုရားသခင်​ကို စော်ကားသော​အမည်များ​ကို ရေးထား၏။

2 ကျွန်ုပ်​မြင်ရသည့် ထို​သားရဲ​သည် ကျားသစ်​နှင့် တူ၏။ သို့သော် သူ​၏ ခြေ​သည် ဝက်ဝံ​၏ ခြေ​နှင့် တူ​ပြီး သူ​၏ ပါးစပ်​သည် ခြင်္သေ့​၏ ပါးစပ်​နှင့် တူ၏။ နဂါး​သည် ထို​သားရဲ​အား မိမိ​၏ တန်ခိုး၊ မိမိ​၏ ရာဇပလ္လင်​နှင့် ကြီးမားသော​အခွင့်အာဏာတို့​ကို ပေးအပ်၏။

3 ထို​သားရဲ​၏ ဦးခေါင်း​တစ်လုံး​တွင် သေနိုင်လောက်သော​ဒဏ်ရာ​ရရှိထား​သကဲ့သို့​ဖြစ်​သော်လည်း ထို​ဒဏ်ရာ​သည် ပျောက်ကင်းသွား၏။ ကမ္ဘာလောက​၌ နေထိုင်ကြသောသူ​အပေါင်းတို့​သည် အံ့အားသင့်​လျက် သားရဲ​နောက်သို့ လိုက်ကြ၏။

4 နဂါး​သည် မိမိ​၏ အခွင့်အာဏာ​ကို ထို​သားရဲ​အား ပေးအပ်​သောကြောင့် သူတို့​သည် နဂါး​ကို ကိုးကွယ်ကြ၏။ “မည်သူ​သည် သားရဲ​နှင့် တူသနည်း။ မည်သူ​သည် သူ့​ကို တိုက်နိုင်သနည်း” ဟု ပြောဆို​လျက် သားရဲ​ကိုလည်း ကိုးကွယ်ကြ၏။

5 ထို​သားရဲ​သည် ကြွားလုံးထုတ်​၍ ဘုရားသခင်​အား စော်ကား​ပြောဆိုတတ်သည့်​နှုတ်​ကို ရရှိထား၏။ လေးဆယ့်​နှစ်လ​ပတ်လုံး မိမိ​အလို​ရှိသမျှ လုပ်နိုင်သော​အခွင့်အာဏာ​ကိုလည်း ရရှိထား၏။

6 သူ​သည် ဘုရားသခင်​၏ နာမတော်​ကို​လည်းကောင်း၊ စံမြန်းရာ​တဲတော်​ဖြစ်သည့် ကောင်းကင်ဘုံ​၌​စံမြန်းသော​သူတို့​ကိုလည်းကောင်း ရှုတ်ချ​လျက် ကိုယ်တော်​အား အသရေဖျက်​ပြောဆိုလေ၏။

7 ထို​သားရဲ​သည် ဘုရားသခင်​၏ သန့်ရှင်းသူတို့​ကို တိုက်​၍ အောင်နိုင်ခွင့်​ရ၏။ မျိုးနွယ်စု​အသီးသီး၊ လူမျိုး​အသီးသီး၊ ဘာသာစကား​အသီးသီး​ပြောသည့်​သူများ​နှင့် တိုင်းနိုင်ငံ​အသီးသီးတို့​ကို အုပ်စိုးခွင့်​လည်း ရ၏။

8 အသေ​သတ်ခြင်း​ခံရသော သိုးသငယ်တော်​၏ အသက်​စာစောင်​၌ ကမ္ဘာဦး​အစ​ကပင် အမည်​စာရင်း​ပါသောသူများ​မှလွဲ၍ ကမ္ဘာလောက​၌ နေထိုင်ကြသောသူ​အပေါင်းတို့​သည် ထို​သားရဲ​ကို ကိုးကွယ်ကြ​လိမ့်မည်။

9 နား​ရှိသောသူ​သည် ကြား​၍ နားလည်ပါစေ။

10 ထောင်​ကျမည့် သူ​သည် ထောင်ချ​ခံရ​လိမ့်မည်။ ဓား​ဖြင့် အသတ်ခံရမည့် သူ​သည်​လည်း ဓား​ဖြင့် အသတ်ခံရ​လိမ့်မည်။ ဤ​အကြောင်း​ကြောင့် ဘုရားသခင်​၏ သန့်ရှင်းသူတို့​သည် သည်းခံ​၍ ယုံကြည်​ရန် ဖြစ်၏။


မြေကြီး​ထဲမှ ထွက်လာသည့်​သားရဲ

11 ထို့နောက် မြေကြီး​ထဲမှ ထွက်လာသော အခြား​သားရဲ​တစ်ကောင်​ကို ကျွန်ုပ်​မြင်ရပြန်၏။ ထို​သားရဲ​သည် သိုးသငယ်​၏​ဦးချို​နှင့်​တူသော ဦးချို​နှစ်ချောင်း ပါရှိ​ပြီး နဂါး​ကဲ့သို့ စကားပြော၏။

12 သူ​သည် ပထမ​သားရဲ​၏ အခွင့်အာဏာ​အလုံးစုံ​ကို သူ​၏​ကိုယ်စား​အသုံးပြု၏။ ထို့ပြင် ကမ္ဘာ​မြေကြီး​နှင့် ကမ္ဘာလောက​၌ နေထိုင်ကြသော​သူတို့​အား သေနိုင်လောက်သော​ဒဏ်ရာ​မှ ပျောက်ကင်းသွား​သည့် ပထမ​သားရဲ​ကို ကိုးကွယ်​စေ၏။

13 သူ​သည် နိမိတ်​လက္ခဏာကြီးများ​ကို ပြ​လျက် လူအပေါင်းတို့​ရှေ့​တွင် ကောင်းကင်ဘုံ​မှ မီး​ကိုပင် မြေကြီး​ပေါ်သို့ ကျစေ၏။

14 သူ​သည် ပထမ​သားရဲ ကိုယ်စား ပြခွင့်​ရသည့် နိမိတ်​လက္ခဏာများ​ဖြင့် ဤ​ကမ္ဘာလောက​၌ နေထိုင်ကြသော​လူအပေါင်းတို့​ကို လှည့်ဖြား၏။ ဓား​ဒဏ်ရာ​ရထား​သော်လည်း အသက်ရှင်​သေးသော ပထမ​သားရဲ​၏ ရုပ်တု​ကို ပြုလုပ်​ရန် လူတို့​အား အမိန့်ပေး၏။

15 ထို​သားရဲ​သည် ထို​ရုပ်တု​အား အသက်​သွင်းသည့် အခွင့်အာဏာ​ကို ရရှိ၏။ ဤ​သည်​မှာ ထို​ရုပ်တု​အား စကားပြော​စေရန်​နှင့် ထို​ရုပ်တု​ကို မကိုးကွယ်သော​သူတို့​အား သတ်​ရန်​ဖြစ်၏။

16 ထို့ပြင် သူ​သည် လူတန်းစား​အနိမ့်​အမြင့်၊ ချမ်းသာသူ​နှင့် ဆင်းရဲသူ၊ လွတ်လပ်သူ​နှင့် ကျွန်ဖြစ်သူ​စသည့် လူအပေါင်းတို့​၏ လက်ယာလက်၊ သို့မဟုတ် နဖူး​ပေါ်တွင် အမှတ်တံဆိပ်​ကို ရိုက်နှိပ်စေ၏။

17 ထို​သားရဲ​၏ အမည်၊ သို့မဟုတ် သူ​၏ အမည်​ကို ကိုယ်စားပြုသော​ကိန်းဂဏန်း​ဖြစ်သည့် ထို​အမှတ်တံဆိပ် မရှိ​လျှင် မည်သူ​မျှ အရောင်းအဝယ် ပြုခွင့်​မရ။

18 ဤ​ကိစ္စ​နှင့်​ပတ်သက်​၍ ဉာဏ်ပညာ ရှိ​ရန် လိုအပ်၏။ ဉာဏ်ပညာ​ရှိသူ​သည် သားရဲ​၏ ကိန်းဂဏန်း​ကို တွက်ချက်​၍ အဓိပ္ပာယ်​ဖွင့်နိုင်၏။ အဘယ်ကြောင့်ဆိုသော် ထို​ကိန်းဂဏန်း​သည် လူတစ်ဦး​ကို ကိုယ်စားပြု​သောကြောင့်​ဖြစ်၏။ သူ​၏ ကိန်းဂဏန်း​မှာ ခြောက်ရာ​ခြောက်ဆယ့်ခြောက် ဖြစ်၏။

ခေတ်သစ်​မြန်မာ သမ္မာကျမ်း™

မူပိုင်ခွင့်၊ © Biblica Inc. ၁၉၈၅၊ ၂၀၂၄

ခွင့်ပြုချက်​ဖြင့် အသုံးပြုသည်။ ကမ္ဘာတစ်ဝန်း​မူပိုင်ခွင့်များ​ရယူပြီးဖြစ်သည်။

Burmese Contemporary Bible™

Copyright © 1985, 2024 by Biblica, Inc.

Used with permission. All rights reserved worldwide.

Biblica, Inc.
ကြှနျုပျတို့နောကျလိုကျပါ:



ကြော်ငြာတွေ