ဗျာ​ဒိတ် 10 - ခေတ်သစ်​မြန်မာ သမ္မာကျမ်း ခေတ်သစ်​မြန်မာ သမ္မာကျမ်း
ဗျာ​ဒိတ် 10

¹ ထို့နောက် တန်ခိုးကြီးသော ကောင်းကင်တမန်​တစ်ပါး​သည် မိုးတိမ်​ခြုံလွှမ်း​လျက် ကောင်းကင်ဘုံ​မှ ဆင်းသက်လာသည်​ကို ကျွန်ုပ်​မြင်ရ၏။ သူ​၏​ဦးခေါင်း​ပေါ်တွင် သက်တံ​တည်ရှိ၏။ သူ​၏​မျက်နှာ​သည် နေ​ကဲ့သို့​ဖြစ်ပြီး ခြေတို့​သည် မီးတိုင်​ကဲ့သို့​ဖြစ်၏။

² သူ​၏​လက်ထဲ​တွင် ဖွင့်ထားသည့် စာလိပ်​ငယ်​ကို ကိုင်ထား၏။ သူ​၏​ညာခြေ​ကို ပင်လယ်​ပေါ်သို့​လည်းကောင်း ဘယ်ခြေ​ကို မြေ​ပေါ်သို့​လည်းကောင်း ချထား​လျက်

³ ခြင်္သေ့​ဟောက်​သကဲ့သို့ ကျယ်လောင်​စွာ ကြွေးကြော်လေ၏။ ထိုသို့​ကြွေးကြော်​သောအခါ မိုးခြိမ်းသံ​ခုနစ်ချက်​သည် မိမိတို့​အသံ​ဖြင့် ပြောဆို၏။

⁴ ထို​မိုးခြိမ်းသံ ခုနစ်ချက်တို့​ပြောဆို​သောအခါ ကျွန်ုပ်​သည် ရေးမှတ်​ရန်​ပြင်​စဉ် “မိုးခြိမ်းသံ ခုနစ်ချက်တို့​ပြောဆိုသော​စကား​ကို လျှို့ဝှက်ထားလော့။ မရေးမှတ်နှင့်” ဟူ၍ ကောင်းကင်ဘုံ​မှ ထွက်လာသော​အသံ​ကို ကျွန်ုပ်​ကြားရ၏။

⁵ ထိုအခါ ပင်လယ်​နှင့် ကုန်းမြေ​ပေါ်​တွင် ရပ်နေသည့် ကျွန်ုပ်​မြင်ခဲ့သော ကောင်းကင်တမန်​သည် သူ​၏​လက်ယာလက်​ကို ကောင်းကင်​သို့ မြှောက်လေ၏။

⁶ ထို့နောက် အစဉ်​ထာဝရ​အသက်ရှင်တော်မူပြီး ကောင်းကင်၊ မြေကြီး၊ ပင်လယ်​နှင့် အရပ်ရပ်တို့​၌ ရှိသမျှ​အရာတို့​ကို ဖန်ဆင်းတော်မူသော ဘုရားသခင်​ကို တိုင်တည်​၍ ထို​ကောင်းကင်တမန်​က “နောက်ထပ် အချိန်​ကြန့်ကြာ​တော့မည် မဟုတ်။

⁷ သတ္တမ​ကောင်းကင်တမန်​သည် တံပိုးခရာ​မှုတ်ရမည့်​နေ့ရက်​တွင် ဘုရားသခင်​သည် မိမိ​အစေအပါး ပရောဖက်များ​အား ဟောပြော​ကြေညာတော်မူသည့်​အတိုင်း မိမိ​၏ လျှို့ဝှက်​နက်နဲသော​အကြံအစည်​သည် ပြီးမြောက်​လိမ့်မည်” ဟု ကျိန်ဆို၏။

⁸ ထို့နောက် ကောင်းကင်ဘုံ​မှ ကျွန်ုပ်​ကြားခဲ့ရသည့် အသံ​က ကျွန်ုပ်​အား “ပင်လယ်​နှင့် မြေ​ပေါ်​တွင် ရပ်နေသည့်​ကောင်းကင်တမန်​၏​လက်​မှ ဖွင့်ထားသော​စာလိပ်​ကို သွား​၍​ယူလော့” ဟု ဆိုပြန်၏။

⁹ ထို့ကြောင့် ကျွန်ုပ်​သည် ထို​ကောင်းကင်တမန်​ထံသို့ သွားပြီး ကျွန်ုပ်​အား စာလိပ်​ငယ်​ကို ပေး​ရန် တောင်း၏။ ကောင်းကင်တမန်​က “စာလိပ်​ကို ယူ​၍​စားလော့။ သင်​၏​ဝမ်း​ထဲ၌ ခါး​သော်လည်း သင်​၏ ခံတွင်း​၌ ပျားရည်​ကဲ့သို့ ချို​လိမ့်မည်” ဟု ကျွန်ုပ်​အား ပြော၏။

¹⁰ ထို့ကြောင့် ကျွန်ုပ်​သည် ကောင်းကင်တမန်​၏​လက်​ထဲမှ စာလိပ်​ငယ်​ကို ယူ​၍ စား​လိုက်ရာ ခံတွင်း​၌ ပျားရည်​ကဲ့သို့ ချို​သော်လည်း စား​ပြီးနောက် ဝမ်း​ထဲ၌ ခါးလေ၏။

¹¹ ထိုအခါ ကောင်းကင်တမန်​က “သင်​သည် များစွာသော​လူမျိုး၊ တိုင်းနိုင်ငံများ၊ ဘာသာစကား​အသီးသီး​ပြောဆိုသူများ၊ ဘုရင်များ​ကို တစ်ဖန်​ပရောဖက်ပြု​ဟောပြော​ရမည်” ဟု ကျွန်ုပ်​အား​ဆို၏။