ဗျာဒိတ် 9 - ခေတ်သစ်မြန်မာ သမ္မာကျမ်း1 ပဉ္စမကောင်းကင်တမန်သည် တံပိုးခရာမှုတ်သောအခါ ကြယ်တစ်လုံးသည် ကောင်းကင်မှ ကမ္ဘာမြေပေါ်သို့ ကြွေကျသည်ကို ကျွန်ုပ်မြင်ရ၏။ ထိုကြယ်အား တွင်းနက်ကြီး၏သော့ကို ပေးတော်မူ၏။ 2 သူသည် တွင်းနက်ကြီးကို ဖွင့်လိုက်သောအခါ မီးခိုးသည် မီးဖိုကြီးမှ ထွက်သည့်အလား တွင်းထဲမှ ထွက်လာ၏။ ထိုမီးခိုးကြောင့် နေနှင့် အာကာသမိုးကောင်းကင်သည် မှောင်မိုက်သွားလေ၏။ 3 ထို့နောက် မီးခိုးထဲမှ ကျိုင်းကောင်များသည် မြေကြီးပေါ်သို့ ထွက်လာကြ၏။ သူတို့အား ကမ္ဘာမြေပေါ်ရှိ ကင်းမြီးကောက်အစွမ်းကဲ့သို့သော အစွမ်းကို ပေးထား၏။ 4 သူတို့သည် မြေကြီးပေါ်ရှိ မြက်ပင်များမှစ၍ အခြားစိမ်းစိုသော အပင်ငယ်များ၊ သစ်ပင်များကို ဖျက်ဆီးခွင့်မရှိ။ မိမိတို့၏ နဖူးတွင် ဘုရားသခင်၏ တံဆိပ်ခတ်နှိပ်မထားသော သူများကိုသာ ဖျက်ဆီးရန် အမိန့်ပေးခံရ၏။ 5 ထိုလူတို့ကို အသေမသတ်ဘဲ ငါးလပတ်လုံး ညှဉ်းဆဲရန် ခွင့်ပြုထား၏။ ကျိုင်းကောင်၏ ညှဉ်းဆဲမှုကြောင့် လူတို့ခံရသည့်ဝေဒနာသည် ကင်းမြီးကောက်ကိုက်ခံရသည့် ဝေဒနာကဲ့သို့ဖြစ်၏။ 6 ထိုကာလ၌ လူတို့သည် သေလမ်းကို ရှာသော်လည်း မတွေ့နိုင်ကြ။ သူတို့သည် သေလိုသော်လည်း သေခြင်းသည် သူတို့ထံမှ ထွက်ပြေးသွားလိမ့်မည်။ 7 ကျိုင်းကောင်တို့သည် စစ်တိုက်ရန် ပြင်ဆင်သော မြင်းများနှင့် တူကြ၏။ သူတို့၏ ဦးခေါင်းပေါ်၌ ရွှေသရဖူကဲ့သို့သောအရာကို ဆောင်းထား၍ သူတို့၏ မျက်နှာများသည် လူမျက်နှာကဲ့သို့ဖြစ်၏။ 8 သူတို့၏ဆံပင်များသည် အမျိုးသမီးဆံပင်ကဲ့သို့ဖြစ်၍ သူတို့၏သွားများသည် ခြင်္သေ့သွားများကဲ့သို့ဖြစ်၏။ 9 သူတို့တွင် သံချပ်ဝတ်ကဲ့သို့သော ရင်အုပ်ကာချပ်ဝတ်များပါရှိပြီး သူတို့၏တောင်ပံခတ်သံသည် စစ်ပွဲသို့ ပြေးလာသောမြင်းရထားများ၏အသံကဲ့သို့ဖြစ်၏။ 10 သူတို့တွင် ကင်းမြီးကောက်ကဲ့သို့ အဆိပ်ရှိသောအမြီးများပါ၍ သူတို့၏ အမြီးသည် လူတို့ကို ငါးလပတ်လုံး ညှဉ်းဆဲနိုင်သည့်အစွမ်းရှိ၏။ 11 သူတို့၏ရှင်ဘုရင်မှာ တွင်းနက်ကြီး၏ကောင်းကင်တမန်ဖြစ်၏။ သူ၏ အမည်မှာ ဟေဗြဲဘာသာဖြင့် အာဗဒ္ဒုန်၊ ဂရိဘာသာဖြင့် အပေါလျုန် ဖြစ်၏။ 12 ပထမအမင်္ဂလာသည် လွန်သွားပြီ။ ထို့နောက် အခြားအမင်္ဂလာနှစ်ပါး လာဦးမည်။ 13 ဆဋ္ဌမကောင်းကင်တမန်သည် တံပိုးခရာမှုတ်သောအခါ ဘုရားသခင်ရှေ့တော်၌ရှိသော ရွှေယဇ်ပလ္လင်၏ဦးချိုလေးချောင်းမှ ထွက်လာသောအသံကို ကျွန်ုပ်ကြားရ၏။ 14 ထိုအသံက တံပိုးခရာကိုင်ထားသော ဆဋ္ဌမကောင်းကင်တမန်အား “ယူဖရေးတီးမြစ်ကြီးအနီး၌ ချည်နှောင်ထားသော ကောင်းကင်တမန်လေးပါးကို လွှတ်ပေးလော့” ဟု ဆို၏။ 15 ထိုနှစ် ထိုလ၊ ထိုနေ့ရက်၊ ထိုအချိန် အသီးသီးအတွက် အဆင်သင့်ဖြစ်နေသော ထိုကောင်းကင်တမန်လေးပါးသည် လူသုံးပုံတစ်ပုံကို သတ်ရန် စေလွှတ်ခံကြရ၏။ 16 သူတို့တွင် မြင်းစီးသူရဲ သန်းနှစ်ရာရှိသည်ကို ကျွန်ုပ်ကြားသိရ၏။ 17 ကျွန်ုပ်၏ရူပါရုံတွင် မြင်းများနှင့် မြင်းစီးသူရဲများကို မြင်ရ၏။ သူတို့၏ရင်အုပ်ကာချပ်ဝတ်များသည် မီးလျှံကဲ့သို့သောအနီရောင်၊ နက်ပြာရောင်၊ ကန့်ကဲ့သို့သောအဝါရောင်ဖြစ်၏။ မြင်းတို့၏ဦးခေါင်းသည် ခြင်္သေ့ခေါင်းနှင့်တူ၍ မြင်းတို့၏ပါးစပ်မှ မီးလျှံ၊ မီးခိုး၊ ကန့်များထွက်လာ၏။ 18 မြင်းတို့၏ပါးစပ်မှ ထွက်လာသည့် ဤဘေးဒဏ်သုံးမျိုးကြောင့် လူသုံးပုံတစ်ပုံ သေဆုံးကြ၏။ 19 ဤမြင်းတို့၏ သတ်ဖြတ်နိုင်သည့်အစွမ်းသည် သူတို့၏ပါးစပ်တွင်သာမက အမြီးတွင်လည်း ပါရှိ၏။ သူတို့၏အမြီးများသည် မြွေနှင့်တူ၍ ထိုအမြီး၌ လူကိုအန္တရာယ်ပြုနိုင်သော ဦးခေါင်းပါရှိ၏။ 20 ဤဘေးဒဏ်ကြောင့် မသေဘဲ ကျန်ရစ်သောလူတို့သည် မိမိတို့ကျူးလွန်သောအရာများအတွက် နောင်တမရကြ။ ရွှေ၊ ငွေ၊ ကြေး၊ ကျောက်၊ သစ်သားတို့ဖြင့် ပြုလုပ်ထားသည့် မမြင်နိုင်၊ မကြားနိုင်၊ မသွားနိုင်သော ရုပ်တုများနှင့်နတ်ဆိုးများကို ဆက်လက်ကိုးကွယ်ကြ၏။ 21 သူတို့သည် မိမိတို့ပြုသည့် လူသတ်ခြင်း၊ ပြုစားခြင်း၊ တရားနှင့်မညီသောမေထုန်ပြုခြင်း၊ ခိုးခြင်းတို့အတွက် နောင်တမရကြ။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.