Salamo 86 - Baiboly Katolika

SALAMO 86 (Volgata 85) Vavaka raha tojo fitsapana

¹ Vavak’i Davida. Mandrenesa, ry Iaveh, ekeo vavaka aho, fa ory sy mahantra aho.

² Arovy ny fanahiko, fa tia vavaka aho, vonjeo ny mpanomponao, ry Andriamanitro ô; fa Ianao no ametrahany ny fitokiany!

³ Mamindrà fo amiko, ry Tompo ô, fa mitaraina aminao, manontolo andro, aho!

⁴ Ampifalio ny fanahin’ny mpanomponao, fa any aminao, Tompo, no anondrotako ny fanahiko.

⁵ Satria tsara fo sy miantra Ianao, Tompo, ary feno indrafo ho an’izay rehetra miantso Anao.

⁶ Ry Iaveh, atongilano ny sofinao amin’ny fivavahako, henoy tsara ny feon’ny fitarainako.

⁷ Miantso Anao amin’ny andron’ny fahoriako, aho, ka hamaly vavaka ahy, Ianao.

⁸ Tsy misy toa Anao eo amin’ireo andriamanitra, tsy misy mahatakatra ny asanao, ry Tompo.

⁹ Ho avy ny firenena rehetra nataonao, hiankohoka eo anatrehanao, Tompo, ka hanome voninahitra ny Anaranao.

¹⁰ Fa lehibe sy mahavita fahagagana Ianao, Ianao irery no Andriamanitra.

¹¹ Ampianaro ny lalànao aho, ry Iaveh; fa te-handeha amin’ny fahitsianao! Araiketo amin’ny fahatahorana Anao ny foko.

¹² Hidera Anao amin’ny foko rehetra aho, ry Tompo Andriamanitra ô, ary hanome voninahitra ny Anaranao mandrakizay.

¹³ Fa lehibe ny hatsaram-ponao amiko, notsoahanao tany amin’ny Seoly ny fanahiko.

¹⁴ Andriamanitra ô, mitsangan-kamely ahy ny mpiavonavona, mitady ny aiko ny antokon’olona mpanao an-keriny, ka tsy asiany raharaha akory Ianao.

¹⁵ Fa Ianao kosa, Tompo ô, dia Andriamanitra mamindra fo sy miantra, mahari-po sy be indrafo amam-pahamarinana.

¹⁶ Mitodiha atỳ amiko, ka amindrao fo aho; omeo ny herinao ny mpanomponao; ary vonjeo ny zanaky ny ankizivavinao.

¹⁷ Aharihario ny indrafonao amiko, ka hahita izany ny fahavaloko, dia ho menatra! Fa Ianao, ry Iaveh, no mamonjy sy mampionona ahy.