Salamo 18 - Baiboly Katolika

SALAMO 18 (Volgata 17)

¹ Ho an’ny mpampianatra hira. Salamon’ilay mpanompon’i Iaveh, Davida, izay nanao ny tenin’izao tononkira izao tamin’i Iaveh, tamin’ny andro nanafahan’i Iaveh azy tamin’ny fahavalony rehetra, sy tamin’i Saola. Hoy izy:

² Tiako Ianao, ry Iaveh heriko!

³ Iaveh, harambatoko, mandako, mpanafaka ahy, Andriamanitro, vatolampiko izay hahitako fialofana, ampingako, tandro-pamonjena ahy, trano mimandako!

⁴ Niantso an’izay mendrika hoderaina, an’i Iaveh, aho, dia voavonjy tamin’ny fahavaloko.

⁵ Nanodidina ahy ny fatoram-pahafatesana; nampitahotra ahy ny riakan’i Beliala,

⁶ nihodidina tamiko ny fatoran’ny Seoly; ary latsaka teo anatrehako ny fandrika haraton’ny fahafatesana.

⁷ Niantso an’i Iaveh tao anatin’ny fahoriako aho, ary nitaraina tamin’ny Andriamanitro aho; ka reny tany an-tempoliny ny feoko; tonga tao an-tsofiny ny fitarainako teo anatrehany.

⁸ Nihozongozona sy nihorohoro ny tany; nihararetra ny fanambanin’ny tendrombohitra; ka ireo no nihozongozona dia Izy io no tezitra;

⁹ nisy setroka nisavoana avy ao am-bavorony, sy afo mandevona nivoaka avy any am-bavany; ary vainafo midedadeda nipoitra avy eo aminy.

¹⁰ Naletsiny ny lanitra dia nidina Izy; rahona matevina no teo ambanin’ny tongony.

¹¹ Nitaingina Kerobima Izy dia nanidina; nanidina nisononoka teo ambonin’ny ela-drivotra.

¹² Ny haizina no nataony fitoerany mangingina, ny lainy manodidina Azy dia rano maizina sy rahona manjombona.

¹³ Niantoraka avy amin’ny fahazavana nialoha Azy ny rahona izay nitondra havandra mbamin’ny vainafo mivaivay.

¹⁴ Nampikotrokotroka tany an-danitra i Iaveh, nampanakoako ny feony ny Avo indrindra; dia nisy havandra mbamin’ny vainafo mivaivay!

¹⁵ Nandefa ny zana-tsipìkany Izy ka nampiely azy ireo; nataony maro ny varany, ka nampifanaritaka an’ireny Izy.

¹⁶ Dia niseho tamin’izay ny mason-drano, niposaka ny fanambanin’ny tany, noho ny teny mafy nataonao, ry Iaveh, sy noho ny fifofofofon’ny rivotra ny vavoronao.

¹⁷ Naninjitra ny tanany avy any ambony Izy nandray ahy, nisarika ahy avy tamin’ny rano be Izy.

¹⁸ Nanafaka ahy tamin’ny fahavaloko mahery Izy, dia tamin’izay nankahala ahy, fony izy ireo mahery noho izaho.

¹⁹ Nosovohin’ireny aho tamin’ny andron’ny fahoriako, fa i Iaveh kosa no mpanohana ahy tamin’izay.

²⁰ Nataony amin’ny malalaka aho, novonjeny aho satria nankasitrahany.

²¹ Novalian’i Iaveh aho araka ny fahamarinako, novaliany araka ny fahadiovan’ny tanako.

²² Fa nanaraka ny lalàn’i Iaveh aho, ary tsy mba nanota hialako tamin’ny Andriamanitro.

²³ Ny fitsaràny rehetra dia teo anatrehako, ny lalàny koa tsy nariako lavitra ahy.

²⁴ Tsy nanan-tsiny taminy aho; ary nitandrin-tena tamin’ny haratsiako.

²⁵ Koa namaly ahy araka ny fahamarinako i Iaveh, araka ny hadiovan’ny tanako teo imasony.

²⁶ Miseho ho tsara Ianao amin’izay tsara; miseho ho marina Ianao amin’izay marina;

²⁷ miseho ho madio Ianao amin’izay madio, fa amin’izay manao an-kafetsena dia anaovanao an-kafetsena koa.

²⁸ Fa ny vahoaka voaetry, vonjenao, ary ny misolanandrana kosa aetrinao.

²⁹ Eny, Ianao no mampirehitra ny faniloko; i Iaveh Andriamanitro no manazava ny haiziko.

³⁰ Raha ombanao aho, dia mirotsaka amin’ny antoko-miaramila mitam-piadiana; omban’ny Andriamanitro aho mitsambikina mihoatra ny manda.

³¹ Andriamanitra... lavorary ny lalany; azo antoka ny tenin’i Iaveh, ampinga Izy ho an’izay rehetra mifefy aminy.

³² Fa iza moa no Andriamanitra afa-tsy i Iaveh ihany? ary zovy no vatolampy afa-tsy ny Andriamanitsika?

³³ Dia ilay Andriamanitra mampisikina hery ahy, mandavorary ny lalako,

³⁴ mampanahaka ny tongotro amin’ny an’ny serfa vavy, mampijoro ahy any amin’ny fitoerako avo;

³⁵ mampianatra ny tanako hiady Izy, ka ny sandriko manenjana tsipìka varahina.

³⁶ Ny ampingan’ny famonjenao nomenao ahy; ny tananao ankavanana manohana ahy; ary ny hamoram-ponao no mahalehibe ahy.

³⁷ Manalalaka ny dian-tongotro eo ambaniko Ianao, ka tsy mangozohozo ny tongotro.

³⁸ Manenjika ny fahavaloko aho, ka mahatratra azy, ary tsy miverina aho, raha tsy efa nataoko lany ritra ireny.

³⁹ Atontako izy, dia tsy afa-mifongatra dia lavo ao ambanin’ny tongotro.

⁴⁰ Mampisikina hery ahy ho amin’ny ady Ianao, folahinao ao ambaniko ny rafilahiko rehetra.

⁴¹ Ireo fahavaloko... Ataonao miamboho ahy izy ireo; ka aringako izay mankahala ahy.

⁴² Mitaraina ireny fa tsy misy mpamonjy; miantso an’i Iaveh fa tsy valiany akory.

⁴³ Torotoroiko tahaka ny vovoka entin’ny rivotra izy; ary ataoko mafafa tahaka ny fotaka eny an-dalam-be.

⁴⁴ Manafaka ahy amin’ny fikomian’ny vahoaka Ianao, sady manandratra ahy ho lohan’ny firenen-tsamihafa; vahoaka tsy fantatro avy no manompo ahy koa.

⁴⁵ Vao nandre Izy dia manoa ahy; ny zanaky ny hafa firenena dia mandoka ahy.

⁴⁶ Ketraka ny zanaky ny hafa firenena, ialany amin-kovitra ny trano mimandany.

⁴⁷ Ho velona anie i Iaveh, ary hisaorana anie ny vatolampiko! Hankalazaina anie ny Andriamanitry ny famonjeko,

⁴⁸ dia Andriamanitra izay mpanao famaliana ho ahy, mampanaiky ahy ny firenena,

⁴⁹ manafaka ahy amin’ny fahavaloko. Eny manandratra ahy ho ambonin’ny rafy lahiko Ianao, mamonjy ahy amin’ny olona mpanao an-keriny.

⁵⁰ Noho izany dia hidera Anao aho, ry Iaveh, eo amin’ny firenena, hihira ho an’ny voninahitry ny Anaranao aho.

⁵¹ Manao famonjena mahagaga ho an’ny mpanjaka voatendriny Izy, mamindra fo amin’izay voahosony Izy, dia amin’i Davida sy ny taranany mandrakizay.