Romana 9 - Baiboly Katolika

TOERANA MISY AN’I ISRAELY Ny tombon-tsoa nomena an’i Israely

¹ Milaza ny marina ao amin’i Kristy aho, ka tsy mandainga, ary ny Fanahy Masina sy ny hitsim-poko no vavolombeloko,

² fa malahelo mafy aho, ory lalandava ny foko,

³ satria saiky niriko aza ny ho voaozona ho lavitra an’i Kristy ny tenako, hamonjeko ny rahalahiko, izay havako araka ny nofo,

⁴ dia ireo Israelita, izay manana ny fananganan-janaka, sy ny voninahitra, sy ny fanekena, sy ny Lalàna, sy ny fombam-pivavahana, ary ny fampanantenana;

⁵ azy koa ny Patriarka, sady avy aminy araka ny noho i Kristy, izay ambonin’ny zavatra rehetra, Andriamanitra isaorana mandrakizay. Amen.

Andriamanitra tsy mba mivadika

⁶ Tsy dia ny tenin’Andriamanitra tsy akory no foana; fa izay taranak’i Israely no tsy tena Israely avokoa,

⁷ ary izay terak’i Abrahama no tsy zanany daholo, fa izao: Ny avy amin’i Isaaka ihany no hantsoina ho taranakao;

⁸ izany hoe: tsy ny zanaky ny nofo no zanak’Andriamanitra, fa ny zanaky ny fampanantenana no isaina ho taranaka.

⁹ Ary toy izao no teny fampanantenana iray: Amin’ny herintaona toy izao dia ho avy indray Aho, ary hahazo zazalahy i Sarà.

¹⁰ Ary tsy i Sarà ihany, fa toy izany koa i Rebekà, ilay nanan-janaka roa tamin’ny lehilahy iray, dia i Isaaka raintsika:

¹¹ satria mbola tsy teraka akory ireo, ka mbola tsy nanao soa na ratsy (mba tsy hiova ny laha-pifidianan’Andriamanitra, tsy avy amin’ny asa, fa amin’ny safidin’Izy niantso),

¹² no nilazana tamin-dravehivavy hoe: Ny zokiny hanompo ny zandriny

¹³ araka ny voasoratra hoe koa: i Jakôba no tiako, fa i Esao no hàlako.

Andriamanitra tsy manao ny tsy rariny

¹⁴ Inona àry no holazaintsika: misy tsy fahamarinana ao amin’Andriamanitra? Sanatria izany!

¹⁵ Fa hoy Izy tamin’i Môizy: Hamindra fo amin’izay tiako hamindram-po Aho, ary hiantra izay tiako hiantrana.

¹⁶ Koa tsy izay maniry na mihazakazaka, fa Andriamanitra mamindra fo no antony.

¹⁷ Fa hoy ny Soratra Masina tamin’i Faraôna: Ny hoentiko mampiharihary ny heriko, sy hanambaràna ny Anarako amin’ny tany rehetra no nananganako anao.

¹⁸ Koa dia izay tiany hamindram-po no amindrany fo, ary izay tiany hohamafisim-po no hamafisiny fo.

¹⁹ Fa ianao kosa hanao amiko hoe: «Ka ahoana indray no anomezan’Andriamanitra tsiny, nefa tsy misy mahatohitra izay sitrapony tsinona?»

²⁰ Eisy! iza moa ianao, ry olombelona, no sahy hifamaly amin’Andriamanitra? Moa ny vilany tany va hanao amin’izay nanefy azy hoe: «Nahoana aho no nataonao toy izao?»

²¹ Moa tsy tompon’ny tanimanga va ny mpanefy vilany, ka mahazo manao zavatra samihafa amin’ny vongana iray monja: ny iray moa hohajaina, ny iray kosa hatao tsinontsinona?

²² Koa maninona, raha te hampiseho ny fahatezerany Andriamanitra, sy te hampahafantatra ny heriny, ka mbola naharitra tamim-pandeferana lehibe an’ireo fanaky ny fahatezerana nanoman-tena ho an’ny fahaverezana?

²³ na te hampahafantatra ny haren’ny voninahiny koa Izy, ka nanomana rahateo an’ireo fanaky ny famindram-po ho amin’ny voninahitra,

²⁴ dia ho antsika izay tsy nalainy tamin’ny Jody ihany, fa tamin’ny Jentily koa?

Efa voalaza ao amin’ny Testamenta Taloha ny hivadihan’i Israely sy ny hiantsoana ny firenen-kafa

²⁵ Izany indrindra no lazainy ao amin’i Osea hoe: «Hiantso ny tsy oloko hoe oloko Aho, sy ny tsy malala hoe malala, ary ny tsy namindram-po hoe namindram-po.

²⁶ Ary any amin’ny tany nilazana hoe tsy oloko ianareo, no hiantsoana ny any hoe zanak’Andriamanitra velona»

²⁷ Izany koa no iantsoan’i Izaia mafy ny amin’i Israely hoe: «Na dia toy ny fasika any amin’ny ranomasina aza ny isan’ny zanak’i Israely, dia izay sisa ihany no ho voavonjy.

²⁸ Andriamanitra dia faingam-panatanteraka ny teniny an-tsakany sy an-davany, ka hotanterahiny tokoa izany eto ambonin’ny tany.»

²⁹ Ary izany no nilazan’i Izaia rahateo hoe: «Raha tsy namelàn’Andriamanitry ny tafika, taranaka isika, efa tonga iray lasitra tamin’i Sôdôma, sy nanahaka an’i Gômôra.»

³⁰ Inona àry no holazaintsika? Ny Jentily izay tsy nitady ny fahamarinana ity no nahazo ny fahamarinana, dia ny fahamarinana avy amin’ny finoana;

³¹ fa i Israely nitady lalàn’ny fahamarinana kosa, tsy tojo azy.

³² Nahoana re? Satria tsy tamin’ny finoana, fa tamin’ny asa no nataony hahazoana azy; ka tafintohina tamin’ny vato manafintohina izy,

³³ araka ny voasoratra hoe: Indro, apetrako ao Siôna ny vato manafintohina sy ny vatolampy mahasolafaka; fa izay mino Azy ihany no tsy mba ho menatra.