Romana 16 - Baiboly Katolika

Hafatrafatra sy veloma

¹ Indro i Febe anabavintsika, lazaiko tsara aminareo, fa mpikarakara ny Eglizy ao Senkrea,

² mba handraisanareo azy tsara ao amin’ny Tompo, araka ny mendrika ny olo-masina, sy hanampianareo azy amin’izay rehetra ilàny anareo, araka ny nanampiany olona maro, hatramin’ny tenako aza.

³ Veloma any amin’i Priska sy Akilasy mpiara-miasa amiko ao amin’i Jesoa Kristy;

⁴ nanao vy very hamonjy ny aiko izy mivady ireo, ka tsy izaho irery no misaotra azy, fa ny Eglizy rehetra any amin’ny Jentily koa,

⁵ ary veloma any amin’ny Eglizy rehetra izay ao an-tranony. Veloma any amin’i Epeneto malalako, izay santatr’i Azia ho an’i Kristy.

⁶ Veloma any amin’i Maria, izay niasa mafy ho anareo.

⁷ Veloma any amin’i Andrônika sy i Joniasa havako sy niara-nifatotra tamiko, izay sady tsara laza amin’ny Apôstôly no tao amin’i Kristy talohako aza.

⁸ Veloma any amin’i Anfiasa, malalako ao amin’ny Tompo.

⁹ Veloma any amin’i Orbano, mpiara-miasa amintsika ao amin’i Kristy, sy i Stakisa malalako.

¹⁰ Veloma any amin’i Apela, mpanompo mahatokin’i Kristy. Veloma any amin’i Aristôbola mianakavy.

¹¹ Veloma any amin’i Herôdiôna havako. Veloma any amin’i Narsisy mianakavy, izay ao amin’ny Tompo.

¹² Veloma any amin’i Trifeno sy i Trifaozy, izay miasa ao amin’ny Tompo. Veloma any amin’i Persida malala, izay miasa fatratra ao amin’ny Tompo.

¹³ Veloma any amin’i Rofosa olo-malaza ao amin’ny Tompo, sy any amin-dreniny izay reniko koa.

¹⁴ Veloma any amin’i Asinkrito, i Flegôna, i Hermesy, i Patrôbosa, i Hermasy, mbamin’ny havana iray finoana ao aminy.

¹⁵ Veloma any amin’i Filologo sy i Jolia, ary i Nerea mianadahy, sy i Olimpià, mbamin’ny olo-masina rehetra ao aminy.

¹⁶ Mifampiarahabà amin’ny fanorohana masina. Manao veloma anareo ny Eglizin’i Kristy rehetra.

Fampitandremana Soratra fanampiny voalohany

¹⁷ Mangataka aminareo aho, ry kristianina havana, mba hitandrin-tena amin’ireo mahatonga fisarahana sy fanafintohinana, fa tsy manaraka ny fampianarana efa noraisinareo; halaviro ireny.

¹⁸ Fa tsy mba i Kristy no tompoin’ny olona toy ireny, fa ny kibony, ary teny malefaka sy manodòka no entiny mamitaka ny tsy ampy saina.

¹⁹ Efa niely amin’ny olona rehetra ny lazan’ny fanekenareo izao, ka faly aminareo tokoa aho; fa hany iriko dia izao: mba ho hendry ianareo raha ny amin’ny tsara, fa tsy hahalala kosa raha ny amin’ny ratsy.

²⁰ Ny Andriamanitry ny fiadanana anie hanorotoro faingana an’i Satana eo ambanin’ny tongotrareo. Ary ho ao aminareo rehetra anie ny fahasoavan’i Jesoa Kristy Tompontsika.

Veloma farany Soratra fanampiny faharoa

²¹ Manao veloma anareo i Timote, mpiara-miasa amiko, sy i Losiosy ary i Jasôna mbamin’i Sôsipatera havako.

²² Izaho Tersiosy, izay nanoratra ity taratasy ity koa, manao veloma anareo ao amin’ny Tompo.

²³ Manao veloma anareo i Gaiosy, ilay itoeranay, mbamin’ny Eglizy rehetra. Manao veloma anareo i Erasta, mpitahiry ny volam-panjakana eto an-tanàna, sy i Koartosy havantsika.

²⁴ Ho ao aminareo rehetra anie ny fahasoavan’i Jesoa Kristy Tompontsika. Amen.

Dôksôlôjia, fiderana an’Andriamanitra

²⁵ Ary ho an’Ilay mahay mankahery anareo araka ny Evanjeliko, izay nitoriana an’i Jesoa Kristy sy nanambaràna ny zava-miafina tsy voalaza hatrizay hatrizay,

²⁶ fa voaseho ankehitriny tamin’ny soratry ny mpaminany, araka ny didin’ny Andriamanitra mandrakizay; ka nampahafantarina ny firenena rehetra mba hanekeny ny finoana

²⁷ dia ho an’Andriamanitra, Ilay hany hendry anie, ny voninahitra mandrakizay mandrakizay, amin’ny alalan’i Jesoa Kristy. Amen.