Romana 10 - Baiboly Katolika

Ny Jody tsy nahalala ny fahamarinana avy amin’Andriamanitra

¹ Ry hava-malala, ny irin’ny foko sy angatahiko amin’Andriamanitra ho azy ireo, dia ny hahazoany famonjena.

² Fa vavolombelon’ny fahazotoany ho an’Andriamanitra aho, saingy fahazotoana tsy ara-pahalalana ny azy;

³ satria tsy nahalala ny fahamarinana avy amin’Andriamanitra izy, ka nitady hanamarin-tena, fa tsy nanaiky ny fahamarinana avy amin’Andriamanitra.

⁴ I Kristy ihany anefa no anton’ny Lalàna, mba ho fanamarinana an’izay rehetra mino.

Ny fahamarinana nambaran’i Môizy

⁵ Izany no nilazan’i Môizy fa ny olona manatanteraka ny fahamarinana avy amin’ny Lalàna no ho velona amin’izany;

⁶ ary izao kosa no lazain’ny fahamarinana avy amin’ny finoana: Aza manao anakam-po hoe: Iza no hiakatra any an-danitra? dia ny hampidina an’i Kristy izany;

⁷ na hoe: Iza no hidina any amin’ny tevam-be? dia ny hampiakatra an’i Kristy avy any amin’ny maty izany.

⁸ Fa ahoana, hoy izy? Izao: Eo akaikinao ny teniny, fa eo am-bavanao sy ao am-ponao, dia ny teny finoana izay torinay.

⁹ Ka raha manaiky amin’ny vavanao ianao fa i Jesoa no Tompo, sy mino amin’ny fonao fa Andriamanitra nanangana Azy ho velona, dia ho voavonjy ianao.

¹⁰ Satria ny finoana amin’ny fo no ahazoana fahamarinana; ary ny fanekena amin’ny vava no ahazoana famonjena,

¹¹ araka ny tenin’ny Soratra Masina hoe: «Izay mino Azy tsy mba ho menatra.»

¹² Tsy misy hafa na Jody na Jentily; satria ny Tompo iray no iombonan’izy rehetra, manan-karena ho an’izay rehetra miantso Azy;

¹³ fa izay rehetra hiantso ny Anaran’ny Tompo no hovonjena.

Tsy afa-tsiny ireo

¹⁴ Hatao ahoana àry no fiantso izay mbola tsy ninoana? Hatao ahoana no fino izay mbola tsy re? Hatao ahoana no fandre raha tsy misy mitory?

¹⁵ Ary hatao ahoana no fitory raha tsy misy irahina? araka ny voasoratra hoe: «Endrey ny hatsaran’ny tongotr’ireto mitory hasambarana!»

¹⁶ Tsy ny rehetra anefa no nanaiky ny Evanjely, araka ny tenin’i Izaia hoe: «Tompo ô, iza no nino ny teny notorinay?»

¹⁷ Koa avy amin’ny toriteny ny finoana; ary avy amin’ny tenin’i Kristy no toriteny.

¹⁸ Fa hoy izaho: Sao dia tsy nandre izy ireo? Tsy izany akory; lasa nanerana ny tany rehetra ny feony, ary tonga hatramin’ny faravazantany ny teniny.

¹⁹ Fa hoy indray aho: Sao tsy nahalala kosa i Israely? Ehe, i Môizy ihany no voalohany nanoratra hoe: Hataoko velom-pialonana an’izay tsy firenena akory ianareo; ary hataoko entin-katezerana amin’ny firenena tsy misy saina.

²⁰ Ny an’i Izaia indray aza no manoatra, fa hoy izy: «Hitan’izay tsy nitady Ahy Aho, ary niseho tamin’izay tsy nanontany Ahy.»

²¹ Fa hoy kosa Izy nony milaza ny amin’i Israely: Naninjitra ny tanako isan’andro amin’ny firenena tsy mino sy mpikomy Aho.