Ohabolana 6 - Baiboly Katolika

Antoka diso toerana

¹ Anaka, raha niantoka ny sakaizanao ianao, raha nametra-teny hiantoka ny hafa,

² raha voasingotry ny teny naloaky ny vavanao, sy azon’ny teny naloaky ny vavanao,

³ dia izao no mba ataovy, ry havako: mitsoaha amin’izany! Matoa latsaka eo an-tanan’ny namanao ianao, dia mandehana mihohoka aminy ary mandodona azy mafy!

⁴ Aza avela hatory ny masonao, na ho rendremana akory ny hodi-masonao;

⁵ mitsoaha, toy ny serfa vavy eo an-tanan’ny mpihaza; toy ny vorona eo an-tanan’ny mpamandrika.

Ny kamo sy ny vitsika

⁶ Mandehana mankany amin’ny vitsika, ry ilay kamo; diniho ny lalany ka mbà hendry.

⁷ Tsy mana-mpifehy izy, na mpitandrina ny ataony, na mpanjaka,

⁸ nefa fahavaratra izy mamory hanina, manangona ny fivelomany izy amin’ny fijinjana.

⁹ mandra-pahoviana no mbola handrianao, ry ilay kamo, rahoviana ianao no vao hifoha amin’ny torimasonao?

¹⁰ Torimaso kely, faharendremana kely, fanohonan-tanana kely eo am-pandriana.

¹¹ Dia ho tonga toy ny mpivahiny ny fahantranao, ary toy ny lehilahy mitam-piadiana ny tsy fahampian-kanina!

Ny tsy misaina

¹² Ny olona ratsy fanahy, ny olona tsy marina, dia mandroso, ka ao am-bavany ny faharatsiana;

¹³ Mipipy maso, mihehy amin’ny tongony, manao famantarana amin’ny rantsan-tanany.

¹⁴ Ao am-pony ny faharatsiana, misaintsaina ny ratsy lalandava izy, ary manangana ady.

¹⁵ Koa ho avy tampoka ny faharavàny; ho torotoro tampoka tsy azo sitranina izy.

Ny zavatra fito fankahala

¹⁶ Misy zavatra enina halan’i Iaveh, misy fito no ataony fahavetavetana:

¹⁷ ny maso miavonavona, ny lela mandainga, ny tanana mandatsa-dra tsy manan-tsiny,

¹⁸ ny fo mamoron-tsain-dratsy, ny tongotra faingam-piriotra hanao ratsy,

¹⁹ ny vavolombelona tsy marina mamoaka lainga, ary ny mamafy ady amin’ny mpirahalahy.

Anatra tohizin’ny ray

²⁰ Anaka, tandremo ny didin-drainao, ary aza ariana ny fampianaran-dreninao.

²¹ Fehezo eo ambonin’ny fonao mandrakariva ireo, ary afatory eo amin’ny vozonao.

²² Hitarika anao amin’izay halehanao, hiambina anao amin’ny torimasonao, ary hiresaka aminao amin’ny fifohazanao.

²³ Fa jiro ny didy, fahazavana ny lalàna, ary lalan’aina ny fananarana mahahendry.

²⁴ Hiaro anao amin’ny vehivavy ratsy fanahy izy, dia amin’ny lela mandrobon’ny vehivavy an’olon-kafa.

²⁵ Aza maniry ny hatsaran-tarehiny, ao am-ponao, ary aza mety hambosin’ny hodi-masony ianao.

²⁶ Fa vehivavy janga no mila tsy hananan’ny olona sombi-mofo; ary vehivavy manam-bady no tonga fandriky ny aina sarobidy.

²⁷ Mety hisy ve ny olona toy izao: hisy olona hanao afo amin’ny tratrany, ka tsy ho may ny akanjony?

²⁸ Na hoe hisy olona handeha ambony vain’afo mivaivay, ka tsy ho may ny tongony?

²⁹ Toy izany izay mankamin’ny vadin’ny namany: rehefa mikasika azy izy tsy maintsy hitondra faisana.

³⁰ Tsy misy manafòka ny mpangalatra mandroba hialany hanoanana, raha tsy manan-kohanina izy;

³¹ raha azo, dia hanonitra avo fito heny izy, ka hanome ny fananany rehetra ao an-tranony.

³² Fa tsy misy saina kosa izay manangy vehivavy, manary tena izay olona manao izany;

³³ fery amam-pahafaham-baraka no hany azony, sady tsy hiala aminy intsony ny fanazimbana.

³⁴ Fa entin’ny hasarotam-piaro ny lehilahy nalainy vady dia misafoaka: ka tsy hamindra fo izy amin’ny andro hamaliany faty.

³⁵ Tsy hasiany raharaha akory izay vola fanavotana; tsy horaisiny na ataonao miavosa aza ny fanatitra.