Lioka 2 - Baiboly Katolika

Ny nahaterahan’i Jesoa sy ny famangian’ny mpiandry ondry

¹ Tamin’izany andro izany dia namoaka didy i Sezara Aogosta hampanoratra ny anaran’ny vahoakany amin’ny tany rehetra:

² dia fony i Sirinosy no governoran’i Siria no natao izany fanoratana voalohany izany.

³ Dia samy nankany amin’ny tanàna niaviany avy izy rehetra mba hosoratana.

⁴ Ary i Josefa koa niakatra avy tany Galilea avy tao an-tanàna Nazareta hankany Jodea ho ao an-tanànan’i Davida atao hoe Betlehema, fa taranaka sy fianakavian’i Davida izy,

⁵ mba hosoratana izy sy i Maria vadiny izay bevohoka.

⁶ Fa raha tao izy, dia tonga ny fotoana hiterahan’i Maria,

⁷ ary niteraka ny Zanany lahy matoa izy, dia nohodidininy lamban-jaza ka nampandriany teo amin’ny fihinanam-bilona, fa tsy nisy hitoerany tao an-tranom-bahiny.

⁸ Ary tamin’izany tany izany nisy mpiandry ondry nitoetra tany an-tsaha niambina ny ondriny nandritra ny alina.

⁹ Ary nisy Anjelin’ny Tompo nitsangana teo anilany, ary ny voninahitr’Andriamanitra nanelatrelatra manodidina azy ireo ka natahotra dia natahotra izy.

¹⁰ Fa hoy ny Anjely taminy: «Aza matahotra ianareo, fa indro fifaliana lehibe ho an’ny vahoaka rehetra no lazaiko aminareo:

¹¹ fa Mpamonjy no teraka ho anareo anio ao an-tanànan’i Davida, dia i Kristy Tompo.

¹² Ary izao no ho famantarana ho anareo: dia hahita zaza kely voahodidina lamban-jaza, sady mandry ao amin’ny fihinanam-bilona, ianareo.»

¹³ Ary niaraka tamin’izay nisy antokon’ny tafika any an-danitra tonga teo amin’ilay Anjely, ka nidera an’Andriamanitra, nanao hoe:

¹⁴ «Voninahitra anie ho an’Andriamanitra any amin’ny avo indrindra, ary fiadanana anie ho an’ny olona etỳ ambonin’ny tany, fa nanehoany ny hatsaram-pony.»

¹⁵ Ary rehefa nandao azy ireo ny Anjely ka nankany an-danitra, dia niresaka ny mpiandry ondry nanao hoe: «Andeha isika ho any Betlehema hizaha izany zavatra vao tonga nampahafantarin’ny Tompo antsika izany.»

¹⁶ Dia nankany haingana izy, ka nahita an’i Maria sy i Josefa ary ny Zaza kely mandry amin’ny fihinanam-bilona;

¹⁷ ary rehefa nahita izy ireo, dia nampiely ny teny nolazaina taminy ny amin’izany Zaza izany.

¹⁸ Ary izay rehetra nandre dia gaga avokoa tamin’izay nolazain’ny mpiandry ondry taminy;

¹⁹ fa i Maria kosa nitadidy izany zavatra rehetra izany, ka nieritreritra azy tao am-pony.

²⁰ Ary nody ny mpiandry ondry nidera sy nankalaza an’Andriamanitra noho ny zavatra rehetra reny sy hitany, araka izay nolazaina taminy.

Ny namoràna an’i Jesoa

²¹ Ary rehefa afaka ny havaloan’andro ka hoforàna ny Zaza, dia natao hoe Jesoa no Anarany, araka ilay nataon’ny Anjely fony tsy mbola torontoronina tao an-kibo izy.

Ny nanolorana an’i Jesoa tany an-Tempoly

²² Ary rehefa tapitra ny andro fidiovany araka ny lalàn’i Môizy, dia nentiny ho any Jerosalema izy mba hatolotra amin’ny Tompo,

²³ araka ny voasoratra ao amin’ny Lalàn’ny Tompo hoe: «Ny lahy voalohan-teraka rehetra dia hatao hoe masina ho an’ny Tompo,

²⁴ ary mba hanatitra fanatitra domohina roa, na zana-boromahailala roa, araka ny voalaza ao amin’ny Lalàn’ny Tompo.»

²⁵ Ary indro, nisy lehilahy atao hoe Simeôna tao Jerosalema; ary marina sady mpivavaka tsara izany lehilahy izany ka niandry ny fanalana alahelo an’i Israely, ary tao aminy ny Fanahy Masina,

²⁶ sady efa nanambaràn’ny Fanahy Masina izy fa tsy hahita fahafatesana mandra-pahitany an’i Kristin’ny Tompo.

²⁷ Dia nentin’ny Fanahy Masina izy hankao amin’ny Tempoly, ka nony nitondra an’i Jesoa zazakely ny rainy aman-dreniny hanao araka ny voadidin’ny Lalàna ny aminy,

²⁸ dia nitrotro Azy izy ka nisaotra an’Andriamanitra nanao hoe:

Ny «Nunc dimittis»

²⁹ «Ankehitriny, ry Tompo, vao alefanao am-piadanana araka ny teninao ny mpanomponao,

³⁰ fa ny masoko nahita ny famonjena avy aminao,

³¹ izay namboarinao teo anatrehan’ny firenena rehetra,

³² dia fahazavana hanilo ny Jentily sady voninahitr’i Israely olonao.»

Ny faminanian’i Simeôna

³³ Dia gaga ny ray aman-drenin’ny Zaza noho ny zavatra nolazaina ny aminy.

³⁴ Ary nitso-drano azy ireo i Simeôna, ka nilaza tamin’i Maria renin’ny Zaza hoe: «Indro, ity Zaza ity no voatendry ho fandavoana sy ho fananganana ny maro amin’i Israely ary ho famantarana hotoherina,

³⁵ – ary ny fanahinao aza hotanterahin-tsabatra - mba hiseho ny hevitry ny fo maro.»

Faminanian’i Ana

³⁶ Ary nisy koa mpaminany vavy anankiray dia i Ana, zanak’i Fanoela fokon’i Asera; efa antitra dia antitra izy, dia fito taona no nanambadiany taorian’ny nahavirjiny azy,

³⁷ ary efa mpitondratena tokony ho efatra amby valopolo taona, sady tsy niala tao amin’ny Tempoly, fa nanompo an’Andriamanitra andro aman’alina tamin’ny fifadian-kanina sy ny fivavahana.

³⁸ Tonga koa izy tamin’izany fotoana izany, ka nidera an’Andriamanitra, ary nilazalaza ny Zaza tamin’izay rehetra niandry ny fanavotana an’i Jerosalema.

Fiainana miafin’i Jesoa tany Nazareta

³⁹ Ary nony tanterak’izy ireo ny zavatra rehetra araka ny Lalàn’ny Tompo, dia nody tany Galilea tao Nazareta tanànany izy.

⁴⁰ Ary nitombo sy nihanatanjaka ny Zaza sady feno fahendrena, ary tao aminy ny fahasoavan’Andriamanitra.

I Jesoa niaraka amin’ireo mpampiana-dalàna

⁴¹ Ary isan-taona ny ray aman-dreniny dia nankany Jerosalema amin’ny andro fetin’ny Paka;

⁴² ka nony efa roa ambin’ny folo taona Izy, dia niakatra araka ny fanao amin’izany fety izany izy ireo,

⁴³ ary nony tapitra ny andro fety ka nody izy, dia nijanona tany Jerosalema i Jesoa Zazakely, nefa tsy fantatry ny rainy aman-dreniny izany.

⁴⁴ Nataon’izy ireo ho niaraka tamin’ny niray dia taminy Izy, ka nandeha lalana indray andro vao nitady Azy tamin’ny havany sy ny olom-pantany;

⁴⁵ ary nony tsy nahita Azy, dia niverina tany Jerosalema indray nitady Azy.

⁴⁶ Ary nony afaka hateloana, dia hitany tao anatin’ny Tempoly Izy nipetraka teo afovoan’ny mpampianatra ka nihaino sady nanontany azy,

⁴⁷ ary talanjona izay rehetra nandre Azy noho ny fahendreny sy ny famaliny.

⁴⁸ Ary nony nahita Azy izy ireo dia gaga, ary hoy ireniny taminy: «Anaka, nahoana Ianao no nanao toy izany taminay? Inty rainao sy izaho malahelo nitady Anao.»

⁴⁹ Fa hoy Izy taminy: «Nahoana no nitady Ahy ianareo? Tsy fantatrareo va fa tsy maintsy ho ao amin’ny Raiko Aho?»

⁵⁰ Faingy tsy azon’izy ireo ny teny nolazainy taminy.

Mbola ny fiainana miafina tao Nazareta

⁵¹ Dia niara-nidina taminy nankany Nazareta Izy, ary dia nanaiky azy; fa ireniny kosa nandinika tsara izany zavatra rehetra izany tao am-pony.

⁵² Ary i Jesoa nitombo fahendrena sy tena, ary nandroso nahatehotia tamin’Andriamanitra sy ny olona.