Jona 1 - Baiboly Katolika

Nandà ny nanirahana azy i Jônasy

¹ Ary tonga tamin’i Jônasy zanak’i Amatì, ny tenin’i Iaveh, nanao hoe:

² «Mitsangana ianao, ka mankanesa any Niniva, tanàna lehibe, hitory ny hamelezana azy, fa tafakatra hatraty Amiko ny haratsian’izy ireo».

³ Dia nitsangana i Jônasy handositra ho any Tarsisa, lavitra ny tavan’i Iaveh. Nidina tany Jôpe izy, dia nahita sambo ho any Tarsisa, ka naloany ny saran-tsambo, dia niditra tao izy, hiaraka amin’izy ireo ho any Tarsisa, lavitra ny tavan’i Iaveh.

⁴ Fa i Iaveh kosa nampifofofofo ny rivo-mahery teny amin’ny ranomasina, ka nisy tafio-drivotra teny amin’ny ranomasina; ny sambo efa nila ho vaky.

⁵ Raiki-tahotra ny matilò ka samy nitaraina tamin’izay andriamaniny avy, sady nanary ny zavatra tao an-tsambo tany anaty ranomasina, mba hanamaivana azy; fa i Jônasy kosa nidina tao ambodi-sambo, dia nandry ka renoka natory tao.

⁶ Avy nanatona azy ny kapitenin-tsambo, ka nanao taminy hoe: «Inona ity ataonao no matory foana? Mitsangàna antsoy ny Andriamanitrao, ndrao mba mihevitra antsika Andriamanitra, ka tsy ho faty isika».

⁷ Ary nifampilaza izy ireo nanao hoe: «Avia, hanao filokàna isika, mba hahafantarantsika izay mahatonga izao loza izao amintsika». Dia nanao filokana izy dia i Jônasy no voan’ny filokana.

⁸ Izay izy ireo nanao taminy hoe: «Lazao aminay re, izay mahatonga izao loza izao amintsika! Inona no raharahanao; avy aiza ianao; aiza no taninao; ary inona no firenenao?»

⁹ Ka izao no navaliny azy ireo: «Hebrio aho, ary i Iaveh, Andriamanitry ny lanitra, izay nanao ny tany aman-dranomasina, no ivavahako».

¹⁰ Dia raiki-tahotra mafy ireo olona ireo, ka nanao taminy hoe: «Inona izany ataonao izany!» Satria fantatr’ireo olona ireo fa nandositra lavitra ny tavan’i Iaveh izy, fa efa nambarany taminy izany.

¹¹ «Hataonay ahoana ianao, hoy ireo taminy, dia hitony amintsika ny ranomasina?» Fa mbola nihananonja, nihananonja mafimafy kokoa ny ranomasina.

¹² Ka hoy ny navaliny azy: «Raiso aho ka atsipazo any anaty ranomasina, ka hitony aminareo ny ranomasina; satria fantatro fa noho ny amiko, no mahatonga izao tafio-drivotra mafy izao aminareo».

¹³ Nivory ny olona mba hitondra ny sambo hitody amin’ny tany maina, fa tsy afaka; satria nihananonja mafimafy kokoa nanohitra azy ny ranomasina.

¹⁴ Koa dia niantso an’i Iaveh izy nanao hoe: «Endrey! ry Iaveh ô! aoka tsy ho faty noho ny amin’ny ain’ity lehilahy ity izahay na ataonao milonjo ny ra tsy manan-tsiny, satria Ianao no nanao araka izay sitrakao, ry Iaveh ô!»

¹⁵ Dia noraisiny i Jônasy, natsipiny tany amin’ny ranomasina, ka nitony ny fisafoakan’ny ranomasina. Ary raiki-tahotra mafy an’i Iaveh ny olona, ka nanatitra sorona ho an’i Iaveh, sy raki-boady.