Joba 32 - Baiboly Katolika

3. IREO LAHATENIN’I ELIÒ Teny fanelanelanana nataon’i Eliò.

¹ Dia nitsahatra tsy namaly an’i Jôba intsony izy telo lahy ireo, satria nihombo tamin’ny fanaovana ny tenany ho marina izy io.

² Fa nirehitra tamin’izay kosa ny fahatezeran’i Eliò, zanak’i Barakely, Bozita, fokon’i Rama. Nirehitra tamin’i Jôba ny fahatezerany, satria io nihambo ho marina noho Andriamanitra.

³ Nirehitra tamin’izy telo lahy sakaizany koa ny fahatezerany, satria tsy nahita teny tsara havaly azy izy ireo.

⁴ Noho ny maha-zokiny azy ireo, dia niandry i Eliò, vao niteny tamin’i Jôba.

⁵ Nony hitany anefa, fa tsy misy valy intsony eo am-bavan’ireto sakaizany telo lahy, dia nirehitra ny hatezerany.

⁶ Tamin’izay, dia niteny i Eliò, zanak’i Barakely, Bozita, ka nanao hoe: «Izaho vao tanora, ianareo efa anti-panahy; ka izany no natahorako, tsy nahasahiako ny hampahalala anareo izay mba hevitro.

Sava ranonando

⁷ Hoy aho anakampo: ‹Hiteny ireo be andro, hanambara ny fahendrena ny hamaroan’ny taona›.

⁸ Kanefa ny fanahy napetraka ao anatin’ny olombelona, dia ny fofon’ain’ny Tsitoha no manome ny fahazavan-tsaina.

⁹ Fa tsy ny taona no mampahazo ny fahendrena, tsy ny fahanterana no hahalalana ny rariny.

¹⁰ Koa izao no lazaiko, mihainoa ahy; fa izaho koa mba hanambara ny hevitro.

¹¹ Raha mbola niteny ianareo, dia niandry aho; nampandry sofina tamin’ny porofo nalahatrareo aho, mandra-pahatapitry ny fifandaharanareo.

¹² Narahiko saina mitandrina ny anareo, ary tsy naharesy lahatra an’i Jôba ianareo; tsy nisy nahatohitra ny teniny ianareo.

¹³ Aza manao hoe: ‹Nahita ny fahendrena izahay, Andriamanitra no mamely azy, fa tsy olombelona›.

¹⁴ Tsy mba hamely ahy no nanononany ny lahateniny; nefa tsy mba ny teninareo no hamaliako azy.

¹⁵ Indreo, very hevitra izy ireo, ka tsy mamaly akory; tsy mahita teny halahatra intsony.

¹⁶ Nandrasako izay hahataperan’ny teniny, izay hijanonany tsy miteny, tsy manan-kavaly.

¹⁷ Ka dia mba anjarako kosa izao ny miteny, fa mba te-hilaza izay hevitro kosa aho.

¹⁸ Feno lahateny aho, ka asesiky ny fanahy ato anatiko aho.

¹⁹ Efa toy ny divay voatsentsina ny foko, dia tahaka ny siny hoditra feno divay mila hipoaka.

²⁰ Ka aoka hiteny aho, mba hisy hiainako malalaka; aoka hisokatra ny molotro mba hamaliako.

²¹ Tsy mba hizaha tavan’olona aho, na handoka olona na iza na iza;

²² fa tsy mba mahay mandoka; fa raha tsy izany dia halain’ny Mpahary ahy, eo no ho eo ihany aho.