Hosea 13 - Baiboly Katolika

Sazin’ny mpanompo sampy

¹ Raha vao niteny i Efraima, dia nihorohoro ny olona; nisandratra izy teo amin’i Israely. Fa tonga meloka izy noho ny amin’i Baala, ka maty.

² Ary ankehitriny izy ireo mandroso manota ihany; nanao sarin-javatra anidina tamin’ny volany, dia sampy araka izay hevitra foroniny; asan’ny mpanao taozavatra foana izany! Izao no filazan’ny olona azy ireo! Mpanao sorona olona, manoroka zanak’omby.

³ Noho izany izy ireo dia ho tahaka ny rahona maraina, ho toy ny ando amin’ny maraina malaky levona, ho tahaka ny akofa paohin’ny rivotra avy eo am-pamoloana, ary ho tahaka ny setroka mivoaka avy eo am-baravarankely.

Sazin’ny tsy mpankasitraka

⁴ Ary Izaho no Iaveh Andriamanitrao, hatrany amin’ny tany Ejipta; tsy hahalala Andriamanitra afa-tsy Izaho ianao; ary eo ivelan’ny Tenako tsy misy mpamonjy.

⁵ Nahalala anao tany an’efitra Aho tany amin’ny tany fahamainana.

⁶ Nony nahazo hanina izy ireo, dia nivoky; nivoky izy ka nisondrotra ny fony; ka izany no nanadinoany Ahy.

⁷ Izaho kosa amin’izy ireo, dia ho toy ny liona, ho tahaka ny pantera, hamitsahako eny amoron-dalana izy.

⁸ Hiantoraka aminy toy ny orsa very anaka Aho, handriatra ny sarom-pony Aho ary handrapaka azy eo, toy ny liom-bavy; ny biby any an-tsaha hamotipotika azy.

Foana ny fanjakana

⁹ Izao no mahavery anao, ry Israely, dia ianao manohitra Ahy, manohitra an’izay vonjinao.

¹⁰ Aiza àry izay mpanjakanao, hamonjy anao ao an-tanànanao rehetra? Ary aiza ireo mpitsaranao, izay nilazanao hoe: Omeo mpanjaka ama-mpanapaka Aho?

¹¹ Omeko mpanjaka ianao amin’ny hatezerako; ary esoriko ireny amin’ny fahavinirako.

Tsy maintsy rava

¹² Voafehy ny helok’i Efraima, atao tsara tahiry ny fahotany.

¹³ Voan’ny fanaintainan’ny vehivavy raha miteraka izy; zaza tsy manam-pahendrena, fa nony tonga ny fotoana, tsy mandroso izy ho teraka.

¹⁴ Hanafaka azy amin’ny herin’ny Seoly Aho, hanavotra azy amin’ny fahafatesana. Ry fahafatesana ô, aiza ny aretina fandripahanao? Ry Seoly ô, aiza ny fandringananao? Miafina amin’ny masoko ny nenina.

¹⁵ Fa hahavokatra eo amin’ny rahalahiny i Efraima; nefa ho tonga ny rivotra avy atsinanana; hiakatra avy any an’efitra ny fofon’ain’i Iaveh; ka ho maina ny loharanony; ho tankina ny fantsakàny; hobaboiny ny firaketan’ny zava-tsarobidy rehetra.