Hosea 12 - Baiboly Katolika

Helok’i Israely ara-pivavahana sy ara-pitondram-panjakana

¹ I Efraima nanodidina Ahy tamin’ny lainga, ary ny taranak’i Israely tamin’ny fitaka, i Jodà koa efa tapa-kofehy ny amin’ny momba an’Andriamanitra, ny amin’ny momba an’ilay Masina izay mahatoky.

² I Efraima, mihinan-drivotra, sy manenjika ny rivotra avy atsinanana. Mampiavosa lainga amam-pandozàna mandritra ny andro izy; manao fanekena amin’i Asora izy ireo, ka entina ho any Ejipta ny diloilo.

Famelezana an’i Jakôba

³ Manana ady amin’i Jodà koa i Iaveh; efa hamay an’i Jakôba, araka ny lalany izy, sady hamaly azy araka ny asa nataony.

⁴ Mbola tao am-bohoka i Jakôba nanongona ny rahalahiny, ary tamin’ny fahavitrìhany dia nitolona tamin’Andriamanitra.

⁵ Niady tamin’ilay Anjely ka nandresy azy; nitomany sy nifona taminy; dia nahita azy tao Betela indray, ary tao no niresahan’Andriamanitra tamintsika.

⁶ Ary i Iaveh no Andriamanitry ny tafika; i Iaveh no anarany.

⁷ Ary ianao kosa dia mba hiverina amin’ny Andriamanitrao; tandremo ny famindram-po sy ny rariny; ary miandrasa ny Andriamanitrao mandrakariva.

I Israely maimaim-bola sy voasazy

⁸ I Kanaana mitana mizàna mandainga; ny miharaka no tiany.

⁹ I Efraima nanao hoe: Mba nihary harena ihany aho anefa, ka nahazo fananana be aho; ary amin’izay azoko rehetra, dia tsy ho hita amiko izay famonoana antoka azo atao ho fahotana.

Fihavanana kasaina

¹⁰ Ary Izaho no Iaveh Andriamanitrao hatrany amin’ny tany Ejipta; mbola hampitoetra an-day anao Aho toy ny amin’ny andro fety.

¹¹ Niteny tamin’ny mpaminany Aho, ary Izaho koa no nahamaro ny fahitana, ary niteny tamin’ny fanoharana Aho tamin’ny alalan’ny mpaminany.

Fanambanana indray

¹² Raha zava-poana i Galaada, dia ho tsinontsinona koa izy ireo; nanao sorona omby tany Galgalà izy; noho izany ny ôteliny ho toy ny antontam-bato eny amin’ny saha voasoritsoritra.

Famelezana an’i Jakôba sy i Efraima

¹³ Nandositra ho any amin’ny tany Arama i Jakôba; nanompo mba hahazoany vady i Israely; dia niandry ondry izy hahazoany vady.

¹⁴ Ary mpaminany no nentin’Andriamanitra nampiakatra an’i Israely avy tany Ejipta, mpaminany no nentiny niahy azy.

¹⁵ Nanantsy mafy ny fahatezeran’Andriamanitra i Efraima, ka havelany hitsingerina aminy ny rany, ary hovalian’ny Tompo izy noho ny fanalam-baraka nataony.