3Jaona 1 - Baiboly Katolika

Fiarahabana

¹ Izaho anti-dahy, mamangy an’i Gaiosy malala, izay tiako araka ny marina.

² Ry malala, iriko ho toraka ny an’ny fanahinao koa ny fanambinana ny raharahanao rehetra amam-pahasalamanao.

Fiderana an’i Gaiosy

³ Faly loatra aho, fa nisy havana iray finoana tonga nanambara ny fahamarinanao, na ny andehananao araka ny fahamarinana.

⁴ Tsy misy mahafaly ahy mihoatra noho ny mandre fa mandeha araka ny fahamarinana ny zanako.

⁵ Ry malala, tsara tokoa ny ataonao rehetra amin’ny havana iray finoana, fa indrindra amin’ireo vahiny;

⁶ ka nambaran’izy ireo teo anatrehan’ny Eglizy ny fitiavanao namana. Ary tsara raha mamatsy azy araka ny mendrika an’Andriamanitra ianao, amin’ny fandehanan’izy ireo;

⁷ fa ho voninahitry ny Anarany no nandehanan’izy ireo, ka tsy nandray na inona na inona tamin’ny Jentily izy.

⁸ Tsy maintsy manohana ny olona toy ireny isika, mba ho mpiara-miasa aminy amin’ny fahamarinana.

Fihetsik’i Diôtrefesy

⁹ Nanoratra kely tamin’ny Eglizy aho, nefa tsy te-handray anay i Diôtrefesy izay te-ho lohan’izy ireo.

¹⁰ Ka rehefa tonga aho dia hopotsiriko ny nataony, sy ny bedibedy foana anaratsiany anay. Sady tsy afa-po amin’izany ihany izy; fa ny tenany, tsy mandray ny rahalahy; izay te-handray ireo koa, sakanany sy roahiny amin’ny Eglizy.

¹¹ Ry malala, aza ny ratsy no alain-tahaka, fa ny tsara. Izay manao ny tsara no avy amin’Andriamanitra; fa izay manao ny ratsy, tsy mba nahita an’Andriamanitra.

Fiderana an’i Demetriosa

¹² Milaza soa an’i Demetriosa ny olona rehetra mbamin’ny fahamarinana aza; izahay koa milaza izany, ary fantatrao fa marina ny filazanay.

Fehin-tantara

¹³ Manan-javatra maro hosoratana aminao aho, fa tsy tiako atao amin’ny ranomainty sy ny penina izany.

¹⁴ Fa manantena hahita anao faingana aho, ka dia hiresaka mifanatrika isika. Ho ao aminao anie ny fiadanana. Manao veloma anao ny sakaizantsika. Veloma any amin’ny sakaizantsika tsirairay avy.