1Mpanjaka 11 - Baiboly Katolika

4. IREO KILEMA TEO AMIN’NY FANJAKANA Ireo vadin’i Salômôna

¹ Afa-tsy ny zanaka vavin’i Faraôna, maro koa ny vehivavy hafa firenena tian’i Salômôna, dia ny Moabita, ny Amônita, ny Edômita, ny Sidonianina, ny Heteanina,

² ary amin’ireo firenena nilazan’ny Tompo tamin’ny zanak’i Israely hoe: «Ianareo tsy handeha amin’ireny, izy ireny tsy handeha aminareo, satria tsy maintsy havilin’ireny ny fonareo mankamin’ny andriamaniny», kanjo raiki-pitia tamin’ireo i Salômôna.

³ 700 no vadiny andriambavy, ary 300 ny vaditsindranony, ka ireo vadiny ireo no nampivily ny fony.

⁴ Fa nony tamin’ny fahanteran’i Salômôna, dia natongilan’ny vadiny ho amin’ny andriamani-kafa ny fony, ka tsy mba an’i Iaveh Andriamaniny manontolo, toy ny an’i Davida rainy, ny fony,

⁵ fa nanaraka an’i Astarte andriamani-bavin’ny Sidonianina i Salômôna, sy an’i Melkôma, fahavetavetan’ny Amônita.

⁶ Koa nanao izay ratsy teo imason’i Iaveh i Salômôna, fa tsy mba nanaraka an-tsakany sy an-davany an’i Iaveh, tahaka an’i Davida rainy.

⁷ Tamin’izany nanorina toerana avo i Salômôna teo amin’ny tendrombohitra tandrifin’i Jerosalema, ho an’i Kamosa fahavetavetan’i Moaba, sy ho an’i Môlôka, fahavetavetan’ny taranak’i Amôna.

⁸ Nanao toy izany koa izy ho an’ny vadiny hafa firenena rehetra, izay nandoro zava-manitra sy nanatitra sorona ho an’ny andriamanitr’izy ireo.

⁹ Dia tezitra tamin’i Salômôna i Iaveh noho ny nivilian’ny fony niala tamin’i Iaveh Andriamanitr’i Israely izay efa niseho taminy indroa,

¹⁰ sady efa nandrara azy ny amin’izany, mba tsy hanarahany andriamani-kafa, nefa tsy nitandrina ny didin’i Iaveh izy.

¹¹ Ka hoy i Iaveh tamin’i Salômôna: «Noho izao fitondran-tenanao izao, ka tsy mba nitandrina ny fanekeko sy ny lalàko izay nandidiako anao ianao, dia hotsoahako marina tokoa eo an-tananao ny fanjakana, ka homeko ny mpanomponao.

¹² Tsy hataoko amin’ny andronao anefa izany, noho ny amin’i Davida rainao, fa rehefa mby amin’ny zanakao vao hoendahako aminy izy.

¹³ Ary tsy dia ny fanjakana manontolo koa aza no hoendahako, fa hamelako foko iray ihany ny zanakao, noho ny amin’i Davida mpanompoko, sy noho ny amin’i Jerosalema izay voafidiko.»

Ireo fahavalon’i Salômôna avy any ivelany

¹⁴ Nananganan’i Iaveh fahavalo i Salômôna, dia i Adada Edômita, tamingam-panjakan’i Edôma.

¹⁵ Tamin’ny andro niadian’i Davida tamin’i Edôma, raha niakatra handevina ny maty i Jôaba filohan’ny tafika, dia namono ny lehilahy rehetra tany Edôma.

¹⁶ Ary nitoetra tany enim-bolana i Jôaba mbamin’i Israely rehetra, mandra-pandringany ny lehilahy rehetra tany Edôma.

¹⁷ Tamin’izany i Adada niara-nandositra tamin’ny Edômita sasany, izay isan’ny mpanompon-drainy, mba ho any Ejipta. Mbola zazalahy tanora i Adada fahizay.

¹⁸ Nony niala tany Madiàna izy, dia nankany Faràna, ary naka olona avy tao Faràna hiaraka aminy izy ireo, dia tonga tany Ejipta ao amin’ny Faraôna mpanjakan’i Ejipta, ka nomen’izy io trano i Adada, namononany fivelomana, sady notolorany tany.

¹⁹ Nahita fitia teo imason’i Faraôna tokoa i Adada, fa nomeny ho vadiny aza ny rahavavin’ny vadiny, dia ny rahavavin’i Tafnesa mpanjakavavy.

²⁰ Nitera-dahy taminy ny rahavavin’i Tafnesa, dia i Genobata, izay notazan’i Tafnesa tao an-tranon’i Faraôna, dia nipetraka tao an-tranon’i Faraôna i Genobata teo afovoan’ny zanak’i Faraôna.

²¹ Nony ren’i Adada, tany Ejipta, fa hoe nody mandry any amin’ny razany i Davida, ary maty koa i Jôaba filohan’ny tafika, dia hoy izy tamin’i Faraôna: «Avelao aho hody any amin’ny taniko.»

²² Fa hoy i Faraôna taminy: «Inona no tsy mahampy ny ilainao, no dia maniry hody any amin’ny taninao ianao?» Ary hoy ny navaliny: «Tsy inona tsy inona akory fa avelao ihany aho mba handeha.»

²³ Nananganan’Andriamanitra fahavalo hafa koa i Salômôna dia i Razôna, zanak’i Eliadà, izay nandositra niala tao amin’i Adarezera tompony, mpanjakan’i Sobà.

²⁴ Namory olona homba azy izy, ka tonga lehiben’ny andiam-pireneny fony i Davida namono ny antoko miaramilan’ny tompony. Dia nankany Damasy i Razôna ka niorim-ponenana tao, dia nanjaka tao Damasa.

²⁵ Nandritra ny andro rehetra niainan’i Salômôna izy, dia nitsangan-ko fahavalon’i Israely, nanampy ny ratsy nafitsok’i Adada, ary nankahala an’i Israely. Nanjaka tamin’i Siria izy.

Fikomian’i Jerôbôama

²⁶ Nanainga tanana tamin’ny mpanjaka, i Jerôbôama, zanak’i Nabata, Efrateanina, avy any Sareda izy; ary vehivavy mpitondra tena atao hoe Sarvà no reniny ary mpanompon’i Salômôna izy.

²⁷ Izao no nahatonga azy hikomy amin’ny mpanjaka: Nanorina an’i Melao sy nanampina ny banga tamin’ny tanànan’i Davida rainy i Salômôna.

²⁸ Ary io Jerôbôama io dia lehilahy matanjaka sy mahery fo, ka hitan’i Salômôna ny fahavitrihan’io zatovo io amin’ny raharaha, ka nataony mpitandrina ny mpanao fanompoana rehetra tamin’ny taranak’i Josefa.

²⁹ Tamin’izany andro izany, raha nivoaka avy tao Jerosalema i Jerôbôama dia nifanojo teny an-dalana tamin’i Ahiasa mpaminany, avy any Silao, sy nitafy kapaoty vaovao; izy roa lahy ihany tany an-tsaha tamin’izay.

³⁰ Nalain’i Ahiasa ny kapaoty vaovao teny aminy, ka notriatriariny ho 12,

³¹ dia hoy izy tamin’i Jerôama: «Raiso ho anao ny tapatapany folo, fa izao no lazain’i Iaveh Andriamanitr’i Israely: Indro, hendahako avy eo an-tanànan’i Salômôna ny fanjakana, ka homeko anao ny foko folo,

³² fa ny foko iray ihany no sisa azy, noho ny amin’i Davida mpanompoko sy noho ny amin’i Jerosalema, tanàna voafidiko tamin’ny fokon’i Israely rehetra.

³³ Ary ny anton’izany dia noho izy ireo efa nandao Ahy ka niankohoka teo anatrehan’i Astarte, andriamanibavin’ny Sidonianina, sy teo anatrehan’i Melkôma, andriamanitry ny taranak’i Amôna, ary noho izy ireo tsy nandeha tamin’ny lalako, mba hanao izay mahitsy eo imasoko sy hitandrina ny didy amam-pitsipiko, tahaka ny nataon’i Davida rain’i Salômôna.

³⁴ Amin’ny andro rehetra hiainany anefa, tsy hanatsoahako eo am-pelatanany akory ny fanjakana na tapany aza, fa hampaharetiko ho Andriana izy noho ny amin’i Davida mpanompoko, izay nofidiko, sy nitandrina ny didy aman-dalàko.

³⁵ Fa rehefa mby an-tanan’ny zanany vao hesoriko ny fanjakana, ka homeko anao ny foko folo.

³⁶ Homeko foko iray ny zanany mba hananan’i Davida mpanompoko, fanilo eo anatrehako mandrakariva, any Jerosalema izay tanàna voafidiko hametrahako ny Anarako.

³⁷ Halaiko ianao, ka hanjaka amin’izay rehetra irin’ny fanahinao, ary ho mpanjaka amin’i Israely.

³⁸ Raha manaraka izay rehetra andidiako anao ianao, ka mandeha amin’ny lalako, sy manao izay mahitsy eo imasoko, mitandrina ny lalàna aman-didiko, tahaka ny nataon’i Davida mpanompoko, dia homba anao Aho, hanao trano maharitra ho anao, tahaka ny nataoko tamin’i Davida Mpanompoko ary homeko anao i Israely.

³⁹ Fa ny taranak’i Davida kosa haetriko noho ny fivadihany; tsy ho mandrakizay anefa izany.»

⁴⁰ Notadiavin’i Salômôna hovonoina i Jerôbôama; fa nitsoaka nandositra nankany Ejipta amin’i Sesàka, mpanjakan’i Ejipta, i Jerôbôama ka nonina tany Ejipta mandra-pahafatin’i Salômôna.

Fiafaran’ny fanjakany

⁴¹ Ny sisa amin’ny asa nataon’i Salômôna, ny zavatra rehetra nataony sy ny fahendreny, moa tsy voasoratra ao amin’ny bokin’ny Asan’i Salômôna va?

⁴² Efapolo taona no andro nanjakan’i Salômôna tao Jerosalema tamin’i Israely rehetra.

⁴³ Dia nody mandry any amin’ny razany i Salômôna ka nalevina tao an-tanànan’i Davida rainy. Ary i Rôbôama zanany no nanjaka nandimby azy.