1Korintiana 16 - Baiboly Katolika

FAMARANANA

¹ Ary ny amin’ny famoriam-bola ho an’ny olona masina, dia mba manaova koa ianareo, toy ny nasaiko nataon’ny Eglizy rehetra any Galasia.

² Amin’ny andro voalohany isan-kerinandro.

³ Ka rehefa tonga aho, dia hanendry olona ianareo hampitondraiko taratasy hanatitra ny fiantrànareo any Jerosalema., dia samia ianareo manokan-javatra any an-tranony, sy mandatsa-drakitra araka izay azony atao avy, mba ho vita rahateo ny famoriam-bola rehefa tonga aho.

⁴ Ary raha mendrika ny fankanesako any aza izany, dia hiaraka amiko izy ireo.

⁵ Ho any aminareo aho rehefa namaky an’i Masedônia, fa hamaky an’i Masedônia aho.

⁶ Ary angamba hitoetoetra any aminareo aho, na handany ny ririnina any aza, dia ianareo no hanatitra ahy any amin’izay halehako rehetra any.

⁷ Tsy dia ny hamangy anareo toy ny mandalo fotsiny no kasaiko amin’ity, fa ny hitoetra elaela no antenaiko, raha sitrapon’ny Tompo.

⁸ Hijanona ao Efezy anefa aho, hatramin’ny Pantekôty,

⁹ satria varavarana lehibe no mivoha ho ahy hahazoako miasa tsara, nefa maro ny mpanohitra.

¹⁰ Rehefa tonga atỳ aminareo i Timote, ataovy izay tsy hananany tahotra eo aminareo, fa manao ny asan’ny Tompo toa ahy izy.

¹¹ Koa aoka tsy hisy hanao tsinontsinona azy. Atero izy ho tonga soa aman-tsara atỳ amiko, fa miandry azy mbamin’ny havana iray finoana sasany aho.

¹² Ary ny amin’i Apôlô havantsika, dia niangavy mafy taminy aho mba hiara-mandeha amin’ny havana iray finoana sasany hankany aminareo izy, saingy tsy mbola sitrany ny handeha ankehitriny, fa rehefa misy hahafahany dia ho avy ihany izy.

¹³ Miambena, mahareta amin’ny finoana, misehoa ho lehilahy, ary mahereza fo.

¹⁴ Ataovy amim-pitiavana ny zavatra rehetra.

¹⁵ Izao koa no hafatra ataoko aminareo, ry kristianina havana: fantatrareo fa ry i Stefanasy, dia voaloham-bokatra tany Akaia, sady nanokan-tena hanampy ny olona masina,

¹⁶ ka aoka ianareo hanaiky amim-panajana ny olona mendrika toy ireny, sy izay rehetra miara-miasa sy misasatra amin’ny asa toy izany.

¹⁷ Faly aho noho ny nahatongavan’i Stefanasy sy i Fôrtonato ary i Akaîko, fa ireo no nanao izay tsy efanareo.

¹⁸ Namelombelona ny fanahiko sy ny anareo koa izy ireo; ka mahaiza manaja ny olona toy ireny.

¹⁹ Manao veloma anareo ny Eglizy rehetra atỳ Azia; manao veloma anareo indrindra ao amin’ny Tompo i Akilasy sy i Prisila mbamin’ny Eglizy izay ao an-tranony.

²⁰ Manao veloma anareo ny havana rehetra iray finoana. Mifanaova veloma amin’ny fanorohana masina.

²¹ Izaho Paoly, manao veloma anareo, amin’ny sora-tanako.

²² Raha misy tsy tia an’i Jesoa Kristy Tompontsika, dia aoka ho voaozona izy! Maran-Atha (Tamy ny Tompontsika).

²³ Ho ao aminareo anie ny fahasoavan’i Jesoa Kristy Tompo.

²⁴ Ny fitiavako dia ao aminareo rehetra ao amin’i Kristy Jesoa. Amen.