1Tantara 14 - Baiboly Katolika

I Davida ao Jerosalema; ny lapany sy ireo zanany

¹ Ary i Hirama mpanjakan’i Tira, nandefa iraka tany amin’i Davida nitondra hazo sedera sy tambato ary mpandrafitra, hanao trano ho azy.

² Dia fantatr’i Davida, fa efa nampiorina azy ho mpanjaka amin’i Israely i Iaveh, satria voasandratra ny fanjakany, noho i Israely vahoakany.

³ Mbola naka vady koa i Davida tany Jerosalema ka mbola niteraka zazalahy aman-jazavavy.

⁴ Izao no anaran’ny zanany naterany tany Jerosalema: Samoà, Sôbada, Natàna, Nôga,

⁵ Salômôna, Jebahara, Elisoa,

⁶ Elifata, Nefega, Jafia,

⁷ Elisamà, Baniadà ary Elifata.

Ny nandresena ny Filistinina

⁸ Ren’ny Filistinina fa hoe voahosotra ho mpanjaka amin’i Israely rehetra i Davida; dia niakatra hitady an’i Davida ny Filistinina rehetra. Nahare izany i Davida ka dia nivoaka hanoloana an’ireo izy.

⁹ Nony tonga ny Filistinina dia nirotsaka teny amin’ny lohasahan’ny Refaima.

¹⁰ Nanontany an’Andriamanitra i Davida nanao hoe: «Hiakatra hamely ny Filistinina va aho? Hatolotrao eo an-tanako va izy?» Ka hoy i Iaveh taminy: «Miakara, ary hatolotro eo an-tananao izy.»

¹¹ Dia niakatra nankany Baala-Farasìna izy ireo ka nandresy azy tao i Davida. Ary hoy i Davida: «Ny tanako no namakian’Andriamanitra ny fahavaloko, toy ny amakian’ny rano ny fefiloha.» Izany no nanaovana ny anaran’io fitoerana io hoe: Baala-Farasìna.

¹² Nilaozan’irerỳ tao ny andriamaniny, ka nasain’i Davida nodorana tamin’ny afo.

¹³ Nirotsaka indray ny Filistinina teny amin’ny lohasaha.

¹⁴ Dia nanontany an’Andriamanitra i Davida, ka hoy Andriamanitra taminy: «Aza miakatra manaraka azy fa mivilia azy, ary hivarina aminy ianao avy eo amin’ny lafiny misy ny balsamie.

¹⁵ Ka rehefa mandre fingodongodon’olona any an-tendron’ny balsamie ianao, miroata hiady amin’izay, fa Andriamanitra hivoaka mialoha anao hamely ny tafiky ny Filistinina.»

¹⁶ Dia nataon’i Davida izay nandidian’Andriamanitra azy, ka nandresy ny tafiky ny Filistinina, hatrany Gabaôna ka hatrany Gazera izy ireo.

¹⁷ Dia niely eran’ny tany rehetra ny lazan’i Davida, ary nataon’i Iaveh natahotra azy ny firenena rehetra.