1Samoela 4 - Baiboly Katolika

¹ Ary natao tamin’i Israely rehetra ny tenin’i Samoela. Dia nivoaka hiady tamin’ny Filistinina i Israely ka nitoby teo akaikin’i Eben-Ezera; ary ny Filistinina nitoby tao Afeka.

2. NY FIARAN’NY FANEKENA TANY AMIN’NY FILISTININA Resy ny Israelita. Nalain’ny Filistinina ny Fiaran’ny Fanekena

² Ary nony nilahatra hiady tamin’i Israely ny Filistinina, ka rafitra ny ady, dia resin’ny Filistinina i Israely, nahafatesany sahabo ho efatra arivo ny olona nilahatra hiady teo amin’ny tany lemaka.

³ Niverina tany an-toby ny olona, ary hoy ny loholon’i Israely: «Nahoana i Iaveh no namely antsika teo anoloan’ny Filistinina androany? Andeha hoentina hankatỳ amintsika avy any silao ny Fiaran’ny Faneken’i Iaveh; aoka ho tonga eo afovoantsika sy hanafaka antsika amin’ny tanan’ny fahavalontsika Izy.»

⁴ Dia naniraka nankany Silao ny olona, ka nentina avy amin’io tanàna io ny Fiaran’ny Faneken’i Iavehn’ny tafika, izay mipetraka amin’ny Kerobima. Niaraka tamin’ny Fiaran’ny Faneken’i Iaveh Andriamanitra izy mirahalahy zanak’i Helì, dia i Ofnì sy i Finea.

⁵ Nony niditra tao an-toby ny Fiaran’ny Faneken’i Iaveh dia nihoby an-kafaliana lehibe i Israely rehetra, ka nanako ny tany.

⁶ Ren’ny Filistinina ny fikotrokotrok’izany hoby izany, ka hoy izy: «Inona no anton’izany hobin-kafaliana mikotrokotroka any an-tobin’ny Hebrio izany?» Dia reny fa ny Fiaran’ny Faneken’i Iaveh no tonga tao an-toby.

⁷ Ka raiki-tahotra ny Filistinina fa nataony hoe: «Tonga ao an-toby Andriamanitra.» Dia hoy izy: «Hahita loza isika fa tsy mbola nisy zavatra toy izao mandraka ankehitriny!

⁸ Hahita loza isika! Iza no hanafaka antsika amin’ny tanan’ireo andriamanitra mahery ireo? Fa ireo andriamanitra ireo no namely ny Ejiptianina tany an’efitra tamin’izao loza rehetra izao.

⁹ Samia matanjaka sy mitomban-dahy ianareo, ry Filistinina, fandrao dia manompo ny Hebrio, toy ny anompoany anareo. Misehoa ho lehilahy ary miadia.»

¹⁰ Dia niady ny Filistinina ka resy i Israely sy samy nandositra ho any an-dainy avy; ary mafy tokoa ny faharesena ka nisy telo alina ny olona an-tongotra no lavo tamin’i Israely.

¹¹ Ny Fiaran’Andriamanitra dia voasambotra ary izy roa lahy zanak’i Helì, Ofnì sy Finea, dia maty.

Ny nahafatesan’i Helì

¹² Androtr’izay ihany dia tonga tao Silao ny lehilahy anankiray amin’i Benjamina nihazakazaka avy any an-tany niadinay, rovitra ny akanjony, nihoso-bovoka ny lohany.

¹³ Tamin’ny fotoana nahatongavany dia nipetraka tamin’ny seza anankiray teo amoron-dalana i Helì ka niandry, fa nangitakitaka ny fony, noho ny amin’ny Fiaran’Andriamanitra. Rehefa tafiditra tao an-tanàna ralehilahy hilaza izany vaovao izany dia nihorakoraka ny tanàna rehetra.

¹⁴ Raha nandre izany horakoraka izany i Helì, dia nanao hoe: «Inona izao fihahohahoam-pitabatabana izao?» Ary niaraka tamin’izay dia tonga ralehilahy nilaza ny vaovao tamin’i Helì.

¹⁵ Ary efa valo amby sivifolo taona i Helì fahizàny; tsy nihetsika ny masony ary tsy nahita intsony izy.

¹⁶ Hoy ralehilahy taminy: «Vao tonga avy any amin’ny tany niadiana aho, ary avy any amin’ny tany niadiana no nandosirako androany.» Hoy i Helì: «Nanao ahoana sy ahoana avy, anaka?»

¹⁷ Dia hoy ity iraka: «Nandositra teo anoloan’ny Filistinina i Israely: be dia be no voavono tamin’ny vahoaka; izy roa lahy zanakao aza maty koa, dia i Ofnì sy i Finea, ary ny Fiaran’Andriamanitra lasan-ko babo.»

¹⁸ Vao notononiny ny hoe Fiaran’Andriamanitra dia lavo nitsilany avy teo ambony sezany teo anilan’ny vavahady i Helì ka folaka ny hatony, dia maty izy, satria olona efa antitra sy mavesatra izy. Efapolo taona no nitsarany an’i Israely.

Ny nahafatesan’i vadin’i Finea

¹⁹ Bevohoka sy efa ho teraka ny vinantony vavy, vadin’i Finea, tamin’izay. Nony reny ny vaovao fa hoe lasan-ko babo ny Fiaran’Andriamanitra ary maty avokoa ny rafozany sy ny vadiny dia nionkina izy ka teraka, fa voan’ny faharariana.

²⁰ Efa ho faty izy no nilazan’ireo vehivavy teo akaikiny nataony hoe: «Aza matahotra fa tera-dahy ianao». Nefa tsy novaliany na nasiany raharaha akory izany.

²¹ Nataony hoe Ikabôda no anaran’ny zaza, fa hoy izy: «Efa voaesotra amin’i Israely ny voninahitra noho ny nahalasan-ko babo ny Fiaran’Andriamanitra sy ny nahafatesan’ny rafozany sy ny vadiny.»

²² Hoy izy: «Efa voaesotra amin’i Israely ny voninahitra fa lasan-ko babo ny Fiaran’Andriamanitra.»