Jeremia 15:6 - DIEM PROTESTANTA

⁶ Ianao no nandao Ahy sy niamboho Ahy, hoy ny teny hentitra avy amiko TOMPO. Koa nahinjitro hamely anao ny tanako mba handevona anao fa efa sasatry ny mandefitra Aho.

Baiboly Protestanta Malagasy 2011

⁶ Ianao efa nahafoy Ahy sady efa nihemotra, hoy NY TOMPO; koa atsotrako kosa ny tanako hamely anao, ary efa mandringana anao Aho satria efa sasatra ny manenina.

Dikateny Iombonana Eto Madagasikara

⁶ Ianao no nandao Ahy sy niamboho Ahy, hoy ny teny hentitra avy amiko TOMPO. Koa nahinjitro hamely anao ny tanako mba handevona anao fa efa sasatry ny mandefitra Aho.

Baiboly Katolika

⁶ Efa nakifikao Aho, - teny marin’i Iaveh, - ka lasa nihemotra any ianao; ka indro kosa Aho maninjitra ny tanako aminao handringana anao, fa efa sasatry ny mamindra fo Aho.

Baiboly Protestanta Malagasy

⁶ Hianao efa nahafoy Ahy sady efa nihemotra, hoy Jehovah, Ka dia ahinjitro kosa ny tànako hamely anao, Ka efa mandringana anao Aho, fa efa sasatra ny mandefitra.

Malagasy Bible

⁶ Hianao efa nahafoy Ahy sady efa nihemotra, hoy Jehovah, ka dia ahinjitro kosa ny tanako hamely anao, ka efa mandringana anao Aho, fa efa sasatra ny mandefitra.

La Bible en Malgache

⁶ Ianao efa nahafoy Ahy sady efa nihemotra, hoy NY TOMPO; koa atsotrako kosa ny tanako hamely anao, ary efa mandringana anao Aho satria efa sasatra ny manenina.

Jeremia 15:6 Rohy Ifampitohizana

Isaia 1:4

Loza! firenena mpanota ianao, ry Joda; vahoaka mivesatra heloka ianareo, solofon’ny mpanao ratsy, taranaka lomorina! Nilaozanareo ny TOMPO, nataonareo tsinontsinona ilay Masin’i Israely, fa niamboho Azy ianareo.

Isaia 28:13

Koa ny tenin’ny TOMPO ho azy ireo dia tonga tsy misy heviny toy ny hoe: «TSA ampiana V: TSAV; TSA ampiana V: TSAV. KA ampiana V: KAV; KA ampiana V: KAV. Indray mandeha ity, indray mandeha irỳ. Ka farany ho tafintohina izy raha mandeha, dia hianjera mitsilany ka hahasimba ny voany, ary hifaningotra tongotra ka tsy ho afa-miarina.

Isaia 31:3

Olombelona ihany ny Ejiptianina fa tsy Andriamanitra akory; nofo ihany ny soavaliny fa tsy fanahy; koa vao maninji-tanana ny TOMPO, dia ho solafaka izany mpamonjy izany, hianjera koa ilay natao harovany ary hiara-devona izy roa tonta.

Jeremia 1:16

Havoakako ny didim-pitsarana hamelezana ny mponin’ity tany ity noho ny ratsy rehetra izay nataony: nandao Ahy izy ka nanao sorona ho an’ireo andriamani-kafa, dia ny andriamanitra asan-tanany izay ivavahany!

Jeremia 13:14

Hampifandrotehiko ny olona ka ny ray aman-dreny hamely ny zanany, hoy ny teny hentitra avy amiko TOMPO. Tsy hitsitsy na hiantra na hamindra fo Aho fa handringana azy.»

Jeremia 2:13

Faharatsiana roa sosona no nataon’ny vahoakako: fa sady nahafoy Ahy loharano velona izy no nihady lava-drano ho azy, kanjo lava-drano mitriatra ireny ka tsy nahatan-drano.

Jeremia 2:17

Ny nahatonga izany taminao ve tsy noho ny nandaozanao ny TOMPO Andriamanitrao tamin’ny andro nitantanany anao teny an-dalana?

Jeremia 2:19

Aoka ho voasazy ianao noho ny ratsy nataonao ary hofaizina noho ny fivadihanao! Ho fantatrao amin’izay fa mangidy sy ratsy ny nandaozanao Ahy TOMPO Andriamanitrao sy ny tsy anajanao Ahy intsony, hoy ny teny hentitry ny Tompo, ANDRIAMANITR’izao rehetra izao.

Jeremia 20:9

Ary raha hoy aho anakampoko hoe: «Tsy hisaintsaina izany intsony aho na hiteny amin’ny anaran’ny Tompo intsony», dia misy toy ny afo mandoro ato am-poko, toy ny afo mihanaka ato anatin’ny tenako. Reraka mamono azy aho fa tsy vitako.

Jeremia 44:22

Tsia, tsy lefitry ny TOMPO intsony ny fanao ratsy sy ny zavatra maharikoriko vitanareo. Noho izany, dia rava sy nampahonena ny taninareo ary tsy nisy mponina intsony, ka tonga oha-panozonana tahaka izay misy ankehitriny.

Jeremia 6:11

Feno ny fahatezeranao aho, ry TOMPO, ka tsy mahatsindry izany intsony. Afafazo amin’ny ankizy eny an-dalambe sy amin’ny andian-tanora manontolo izany fahatezerako tsy tantinao izany. Fa na lehilahy na vehivavy na ny antitra na izay efa ela niainana dia samy hosamborina avokoa.

Jeremia 6:12

Ho lasan’olon-kafa ny tranony sy ny sahany ary ny vadiny, satria hahinjitro ny tanako hamely ny mponina amin’ny tany, hoy ny teny hentitry ny TOMPO.

Jeremia 6:19

Mihainoa, ry mponina rehetra eran-tany: Indro hahatonga loza ho an’io firenena io Aho, dia loza vokatry ny hevi-dratsiny ihany, satria tsy niraharaha ny teniko izy sady naniratsira ny fampianarako.

Jeremia 7:16

Ianao kosa, ry Jeremià, aza mivavaka amiko ho an’ity vahoaka ity intsony na mampakatra fitarainana sy fifonana ho azy, fa tsy hihaino anao Aho.

Jeremia 7:24

Kanjo tsy nihaino sady tsy niraharaha Ahy izy fa nanaraka ny heviny araka ny ditran’ny fony. Tsy nitodika tamiko izy fa niamboho Ahy.

Jeremia 8:5

Koa nahoana àry ity vahoaka ity, no niodina, ry Jerosalema, ka mikiribiby amin’izany fiodinany izany? Mifikitra amin’ny andriamani-tsiizy izy ka tsy mety miverina amiko.

Jeremia 8:9

Mahazo henatra ny hendry ary ketraka satria voafandrika; nanamavo ny tenin’ny TOMPO izy ka inona indray no mahahendry azy?

Ezekiela 14:9

«Raha misy mpaminany voataona hamaly araka ny tenany ihany, dia Izaho TOMPO no efa nampanao azy izany; ary hanamparako ny heriko izy ka hoesoriko tsy ho eo amin’i Israely vahoakako.

Ezekiela 25:7

Koa haneho ny heriko hamelezana anareo Aho, ary hanolotra anareo amin’ny firenen-kafa izay handroba anareo tanteraka. Hofoanako tsy ho firenena intsony ianareo, tsy hanan-tany intsony fa haringako tanteraka. Amin’izay dia hoekenareo fa Izaho no TOMPO›. »

Ezekiela 35:3

ary ambarao aminy fa izao no lazain’ny Tompo ANDRIANANAHARY: ‹Hirotsaka an-tsehatra hamely anao Aho, ry tendrombohitra Sehîra. Hanamparako ny heriko ianao, ka hataoko rava sy lao.

Hosea 11:7

Minia miodina amiko ny vahoakako; ary antsoina mba hanatona Ahy ilay Avo izy fa tsy misy mety miainga izy rehetra.

Hosea 13:14

Izaho TOMPO ve hanavotra ireo olona ireo tsy ho voagejan’ny fahafatesana, ka hanafaka azy amin’ny toeran’ny maty? Rafahafatesana ô, aiza ny aretina fandringananao? Ry toeran’ny maty ô, aiza ny loza fandripahanao? Tsy hana-maso miantra Aho.

Hosea 4:16

Fa mafy hatoka toy ny ombivavy tsy mety ziogaina i Israely. Koa nahoana ny TOMPO no hitondra azy toy ny zanak’ondry andrasana eny an-kijana?

Zefania 1:4

«Hirotsaka hamely ny mponin’i Jerosalema sy ny vahoaka rehetra ao Joda Aho. Hofoanako tsy hisy amin’ity toerana ity ny zavatra sisa rehetra tamin’ny fanompoana an’i Bahala; eny, hofoanako hatramin’ny fahatsiarovana ireo mpisoron’io andriamani-tsiizy io koa aza.

Zakaria 7:11

Kanefa tsy nety nihaino izany ny olona; fa nanainga soroka ho fandavana izy sady nanentsin-tadiny mba tsy handre.