Hagay 1:1 - DIEM PROTESTANTA

¹ Tamin’ny taona faharoa nanjakan’i Dariôsa, fony andro voalohan’ny volana fahenina, dia nisy tenin’ny TOMPO tamin’ny alalan’i Hagay mpaminany. Hafatra ho an’ny governoran’i Joda, dia i Zerobabela zanakalahin’i Sealtiela, sy ho an’i Josoa mpisorombe zanakalahin’i Jôtsadaky izany ka nanao hoe:

Baiboly Protestanta Malagasy 2011

¹ Tamin’ny andro voalohany tamin’ny volana fahenina tamin’ny taona faharoa nanjakan’i Dariosy mpanjaka no nahatongavan’ny tenin’NY TOMPO izay noentin’i Hagay mpaminany tamin’i Zerobabela, zanak’i Sealtiela, governora tany Joda, sy tamin’i Josoa, zanak’i Jozadaka, Mpisoronabe, nilaza hoe:

Dikateny Iombonana Eto Madagasikara

¹ Tamin’ny taona faharoa nanjakan’i Dariôsa, fony andro voalohan’ny volana fahenina, dia nisy tenin’ny TOMPO tamin’ny alalan’i Hagay mpaminany. Hafatra ho an’ny governoran’i Joda, dia i Zerobabela zanakalahin’i Sealtiela, sy ho an’i Josoa mpisorombe zanakalahin’i Jôtsadaky izany ka nanao hoe:

Baiboly Katolika

¹ Tamin’ny taona faharoa nanjakan’i Dariosa mpanjaka, tamin’ny volana fahenina, andro voalohan’ny volana, no nahatongavan’ny tenin’i Iaveh, tamin’ny alalan’i Akjea, mpaminany, tamin’i Zôrôbabela, zanak’i Salatiela, governora tany Jodà, sy tamin’i Jesosy, zanak’i Josedeka, mpisorona lehibe, nanao hoe:

Baiboly Protestanta Malagasy

¹ TAMIN’ny andro voalohany tamin’ny volana fahenina tamin’ny taona faharoa nanjakan’i Dariosa mpanjaka no nahatongavan’ny tenin’i Jehovah nentin’i Hagay mpaminany tamin’i Zerobabela, zanak’i Sealtiela, governora tany Joda, sy tamin’i Josoa, zanak’i Jozadaka, mpisoronabe, nanao hoe:

Malagasy Bible

¹ Tamin'ny andro voalohany tamin'ny volana fahenina tamin'ny taona faharoa nanjakan'i Dariosa mpanjaka no nahatongavan'ny tenin'i Jehovah nentin'i Hagay mpaminany tamin'i Zerobabela, zanak'i Sealtiela, governora tany Joda, sy tamin'i Josoa, zanak'i Jozadaka, mpisoronabe, nanao hoe:

La Bible en Malgache

¹ Tamin’ny andro voalohany tamin’ny volana fahenina tamin’ny taona faharoa nanjakan’i Dariosy mpanjaka no nahatongavan’ny tenin’NY TOMPO izay noentin’i Hagay mpaminany tamin’i Zerobabela, zanak’i Sealtiela, governora tany Joda, sy tamin’i Josoa, zanak’i Jozadaka, Mpisoronabe*, nilaza hoe:

Hagay 1:1 Rohy Ifampitohizana

1Mpanjaka 10:15

ankoatra ny haba nalainy tamin’ny mpandranto sy ny mpivarotra ary ny hetra naloan’ny mpanjaka vahiny na voaangon’ireo governoran’ny tany.

1Mpanjaka 14:18

Dia nalevina io sady nanaovan’ny vahoaka Israely rehetra fisaonana, araka ny tenin’ny TOMPO tamin’ny alalan’i Ahià mpaminany mpanompony.

2Mpanjaka 14:25

Izy no namerina indray ny tanin’i Israely hatreo Lebô-Hamata any avaratra ka hatrany amin’ny Ranomasina Maty any atsimo araka ny nambaran’ny TOMPO Andriamanitr’i Israely tamin’ny alalan’i Jônà mpaminany zanakalahin’i Amitahy avy any Gata-Hefera.

1Tantara 3:17

Ireo zanakalahin’i Jekônià, ilay lasan-ko babo tany Babilôna, dia i Sealtiela

1Tantara 3:19

Ny zanakalahin’i Pedaià dia i Zerobabela sy i Simehỳ; ny zanak’i Zerobabela dia i Mesolama sy i Hananià mirahalahy, i Selômita anabaviny,

Ezra 1:8

I Mitredata, mpitahiry ny harem-panjakana, no nasainy namoaka ireny fanaka ireny sy nanisa azy ary nanolotra azy tamin’i Sesebatsàro, taranaky ny mpanjakan’i Joda.

Ezra 10:18

Tamin’ireo taranaky ny mpisorona dia nisy naka vehivavy hafa firenena ho vady, ka ireto avy: tamin’ny taranak’i Jesoa mirahalahy avy, zanakalahin’i Jôtsadàka, dia ry i Mahaseià sy i Elihezera ary i Jariba sy i Gedalià;

Ezra 2:2

ireo no nandeha niaraka tamin’ireto mpitarika azy ireto, dia ry i Zerobabela, i Jesoa, i Nehemià, i Seraià, i Relaià, i Môrdôkay, i Bilsàna, i Mispara, i Bigvay, i Rehoma, ary i Bahanà. Izao kosa no isan’ny vatan-dehilahy tao anatin’izany andian’Israelita izany:

Ezra 2:63

Noraran’ny governora tsy hihinana ny zava-masina dia masina izy mandra-pitsangan’izay mpisorona anankiray hanapa-kevitra momba azy amin’ny alalan’ny Orîma sy Tomîma.

Ezra 3:2

Tamin’izay i Jesoa, zanakalahin’i Jôtsadàka, sy ireo mpisorona mpiombom-panompoana aminy, ary koa i Zerôbabela, zanakalahin’i Sealtiela, sy ireo olona iray tarika aminy no nirotsaka nanorina ny alitaran’Ilay Andriamanitr’i Israely mba hanolorana sorona dorana manontolo, araka izay voasoratra ao amin’ny lalànan’i Mosesy, olon’Andriamanitra.

Ezra 3:8

Ary tamin’ny volana faharoan’ny taona faharoa nahatongavany teo amin’ny tranon’Andriamanitra tao Jerosalema, dia nisantatra ilay asa i Zerobabela zanakalahin’i Sealtiela, sy i Jesoa zanakalahin’i Jôtsadàka mbamin’ireo mpisorona mpiombom-panompoana aminy sy ny levita ary izay rehetra tafaverina avy any an-tsesitany ka tonga tao Jerosalema. Nanendry ny Levita hatramin’ny roapolo taona no ho miakatra ny daholobe mba ho tonian’izao asa amin’ny tranon’ny TOMPO izao;

Ezra 4:2

Dia nanatona an’i Zerobabela sy ny loham-pianakaviana ireo valovotaka ireo ka nanao taminy hoe: –Aoka izahay mba hiara-manorin-trano aminareo. Ilay Andriamanitrareo manko dia hajainay tahaka ny anajanareo Azy sady Izy mihitsy no toloranay sorona hatramin’ny andron’i Esara-Hadôna, mpanjaka asirianina, izay nampiakatra anay ho atỳ.

Ezra 4:24

Dia nitsahatra ny asa fanorenana ny tranon’Andriamanitra tao Jerosalema; ary naharitra hatramin’ny taona faharoa nanjakàn’i Dariôsa, amperôran’i Persia, izany fiatoana izany.

Ezra 5:1

Indray andro, ny mpaminany Hagay sy ny mpaminany Zakarià zanakalahin’i Hidao dia nitondra hafatra ho an’ny Jiosy tao Jerosalema sy Joda, tamin’ny anaran’Ilay Andriamanitr’i Israely, Izay nanentana azy.

Ezra 5:3

Tamin’izay ihany dia tonga teo amin’ireto mpanorina ny tranon’Andriamanitra i Tatenay governoran’ny faritra andrefan’ny ony Eofrata sy i Setara-Bôzenay mbamin’ireo namany ka nanontany azy hoe: –Iza no nanome baiko anareo hanorina indray io trano io sy hanangana ny manda?

Ezra 6:14

Dia nanohy ny taotrano ireo loholona jiosy ka nambinina, araka ny hafatra nentin’ny mpaminany Hagay sy ny mpaminany Zakarià zanakalahin’i Hidao. Nanorina ka nahavita ny tempoly ry zareo, araka ny didin’Ilay Andriamanitr’i Israely sy araka ny baikon-dry i Kirôsa sy i Dariôsa ary i Artakserksesa, amperôran’i Persia.

Nehemia 12:1

Ireto no mpisorona sy levita izay niverina avy any an-tsesitany niaraka tamin’i Zerobabela zanakalahin’i Sealtiela sy niaraka tamin’i Jesoa: I Seraià sy i Jeremià ary i Hezrà,

Nehemia 12:10

I Jesoa no ray niteraka an’i Jôiakima; i Jôiakima no ray niteraka an’i Eliasiba; i Eliasiba no ray niteraka an’i Jôiadà;

Nehemia 5:14

Nanomboka tamin’ny andro nanendrena ahy ho governoran’ny faritanin’i Joda, dia ny taona faha-roapolo nanjakàn’i Artakserksesa ka niafara tamin’ny taona faha-32 nitondrany, na izaho na ny havako, nandritra izany 12 taona izany, dia tsy mba nitaky ny anjara-fiveloman’ny governora.

Nehemia 7:7

ireo no nandeha niaraka tamin’ireto mpitarika azy ireto, dia ry i Zerobabela, i Jesoa, i Nehemià, i Hazarià, i Rahamià, i Nahamany, i Môrdôkay, i Bilsana, i Mispereta, i Bigvay, i Nehoma, ary i Bahanà. Izao kosa ny isan’ireo vatan-dehilahy tao anatin’izany andian’Israelita izany:

Nehemia 8:9

Nitomany ny vahoaka rehetra teo, raha nandre ny tenin’ny lalàna. Noho izany i Nehemià governora sy i Hezrà mpisorona sady mpahay lalàna ary ny levita izay nampianatra ny olona dia niteny tamin’izy rehetra hoe: –Voatokana ho an’ny TOMPO Andriamanitrareo ity andro ity; koa aza malahelo na mitomany!

Eksodosy 4:13

Fa hoy i Mosesy hoe: –Mifona aho, Tompo ô, mba olon-kafa re irahina!

Hagay 1:12

I Zerobabela zanakalahin’i Sealtiela ary koa i Josoa mpisorombe zanakalahin’i Jôtsadaky mbamin’izay rehetra tafaverina avy any an-tsesitany dia nandray tsara ny tenin’ny TOMPO Andriamaniny, izay nampitain’i Hagay mpaminany araka ny efa nanirahan’ny TOMPO Andriamaniny azy; ary naneho fanajana ny TOMPO ireo olona ireo.

Hagay 1:14

Dia notairin’ny TOMPO ny risi-pon’i Zerobabela governoran’i Joda sy ny an’i Josoa mpisorombe ary ny an’izay rehetra tafaverina avy any an-tsesitany; ary dia rafitra ireo nanao ny tranon’ilay TOMPOn’izao rehetra izao sady Andriamaniny,

Hagay 1:15

tamin’ny taona faharoa nanjakan’i Dariôsa, volana fahenina, andro faha-24.

Hagay 1:2

–Izao no lazain’ny TOMPOn’izao rehetra izao: «Ny vahoakan’ity firenena ity milaza fa tsy mbola tonga ny fotoana hananganana indray ny tranoko.»

Hagay 1:3

Dia nisy indray tenin’ny Tompo tamin’ny alalan’i Hagay mpaminany. Hafatra ho an’ny vahoaka izany ka nanao hoe:

Hagay 2:10

Tamin’ny taona faharoa nanjakan’i Dariôsa, volana fahasivy, andro faha-24, dia nisy tenin’ny TOMPO indray tamin’ny mpaminany Hagay.

Hagay 2:20

Tamin’io andro io ihany, andro faha-24 amin’y volana fahasivy, dia mbola nisy tenin’ny TOMPO fanindroany tamin’i Hagay.

Hagay 2:21

Hafatra ho an’i Zerobabela governoran’i Joda izany, ka hoy i Hagay taminy: –Izao no teny hentitra ataon’ny TOMPOn’izao rehetra izao: «Hohozongozoniko ny lanitra sy ny tany.

Hagay 2:4

Koa izao no teny hentitra avy amiko TOMPO: Mahereza, ry Zerobabela! Mahereza, ry Josoa mpisorombe zanakalahin’i Jôtsadaky. Mahereza, ianareo rehetra sarambabem-bahoakan’ity tany ity; teny hentitra avy amiko TOMPO izany. Miasà fa Izaho no miaraka aminareo, hoy ny teny hentitra avy amiko TOMPOn’izao rehetra izao,

Zakaria 1:1

Tamin’ny volana fahavalon’ny taona faharoa nanjakan’i Dariôsa dia nisy tenin’ny TOMPO tamin’i Zakarià mpaminany zanakalahin’i Berekià sady zafikelin’i Hidào.

Zakaria 3:1

Ary nasehon’ny TOMPO tamiko i Josoa mpisorombe izay nitsangana teo anatrehan’ny anjelin’ny TOMPO. Ary nijoro teo ankavanan’i Josoa i Satàna mba hiampanga azy.

Malakia 1:8

Raha biby jamba na mandringa na marary no entinareo hatao sorona amiko, moa heverinareo fa tsy ratsy ve izany? Biby tahaka izany ange aterina ho an’ny governora, dia ho hitanareo raha hahazo sitraka na fitia aminy ianareo, hoy Izaho TOMPOn’izao rehetra izao.

Lioka 3:27

zafin-dohalik’i Jôhanàna, zafin-kitrokelin’i Resà, zafim-paladian’i Zerobabèla ary zafin-dorian’i Sealtièla; dia i Sealtièla zanakalahin’i Nerỳ,