Salamo 149 - Baiboly Katolika Baiboly Katolika
Salamo 149

¹ Mihirà fihiram-baovao ho an’i Iaveh: hanakoako eo amin’ny fiangonan’ny olo-masina anie ny fiderana Azy!

² Hifaly amin’ny Mpahary azy anie i Israely, hientan-karavoana amin’ny Mpanjakany anie ny zanak’i Siôna!

³ Aoka izy ireo hidera ny Anarany amin’ny dihiny; aoka hihira Azy amin’ny ampongatapaka sy ny harpa!

⁴ Fa ankasitrahin’i Iaveh ny vahoakany; manome voninahitra ny ambany toetra, amin’ny famonjeny azy Izy.

⁵ Mandresy amim-boninahitra ny mpino, mienta-kafaliana eo am-pandriany izy ireo.

⁶ Eo am-bavany ny fiderana an’Andriamanitra, ary eo an-tanany ny sabatra roa lela.

⁷ Mba hanao famaliana an’ireo firenena, sy hamay an’ireo vahoaka,

⁸ mba hamatotra ny mpanjakan’ireny amin’ny gadra, ary ny olo-malazan’ireny amin’ny gadra vy;

⁹ mba hampihatra amin’izy ireo ny teny fitsarana voasoratra: Voninahitra voatokana ho an’ny mpino azy rehetra izany. Aleloia!