Salamo 148 - Baiboly Katolika

SALAMO 148 Fideràn’izao tontolo izao

¹ Miderà an’i Iaveh any an-tampon’ny lanitra, miderà Azy any ambony any!

² Miderà Azy ianareo Anjeliny rehetra, miderà Azy ianareo tafiny rehetra!

³ Miderà Azy, ry masoandro amam-bolana; miderà Azy, ianareo kintana mamirapiratra rehetra.

⁴ Miderà azy ry lanitry ny lanitra ary ianareo rano ambonin’ny lanitra.

⁵ Aoka hidera ny Anaran’i Iaveh ireo: fa mandidy Izy, dia àry izy ireo.

⁶ Nampitoetra ireo ho mandrakizay doria Izy, ary nametraka lalàna izay tsy hodikaina.

⁷ Miderà an’i Iaveh etỳ an-tany, ry biby goay be anaty ranomasina, mbaminareo rehetra ranomasin-dehibe,

⁸ afo aman-kavandra, oram-panala aman’etona, rivotra mahery izay manatanteraka ny fandaharany,

⁹ tendrombohitra mbaminareo havoana rehetra, hazo fihinam-boa mbaminareo sedera rehetra,

¹⁰ biby dia amam-biby fiompy isan-karazany; biby mandady amam-boro-manana elatra,

¹¹ mpanjakan’ny tany mbamin’ny vahoaka rehetra, mpanapaka mbaminareo rehetra mpitsara amin’ny tany,

¹² zatovo lahy sy virjiny tanora, lahy antitra sy zaza.

¹³ Aoka hidera ny Anaran’i Iaveh izy ireo, fa ny Anarany no hany lehibe, ny voninahiny dia ambonin’ny lanitra sy ny tany.

¹⁴ Nanandratra ny fahefan’ny vahoakany Izy, foto-piderana amin’izay rehetra miraiki-po aminy, dia amin’ny zanak’i Israely firenena akaiky Azy. Aleloia!